ថៃចេញយុទ្ធនាការ​ «ថៃគួរឱ្យទុកចិត្ត» ខណៈទេសចរបរទេសធ្លាក់ទំនុកចិត្ត ជុំវិញកង្វល់សុវត្ថិភាព​

ប្រតិបត្តិករទេសចរណ៍ថៃ បាន​ចាប់ផ្ដើមដំណើរការយុទ្ធនាការ «ថៃគួរឱ្យទុកចិត្ត» ឬ «Trusted Thailand» ក្នុងកិច្ចខិតខំប្រឹងប្រែង​ស្តារទំនុកចិត្ត​ទេសចរបរទេសឡើងវិញ ចំពេលដែលកង្វល់សុវត្ថិភាពបន្តរួមរឹតវិបត្តិទេសចរណ៍ថៃ។

តាមការចុះផ្សាយរបស់កាសែតបាងកកប៉ុស្តិ៍នៅថ្ងៃចន្ទនេះ ​ពួកគេក៏ជំរុញឱ្យរដ្ឋាភិបាលថៃរៀបចំយុទ្ធនាការទីផ្សារមុនបុណ្យចូលឆ្នាំចិនឆ្នាំ ២០២៦ និងដោះស្រាយបញ្ហាដដែលៗដូចជាជម្លោះព្រំដែនថៃ-កម្ពុជា ផងដែរ​។

​«Trusted Thailand» គឺជាលិខិតបញ្ជាក់ ឬវិញ្ញាបនបត្រ របស់រដ្ឋាភិបាលថៃ ដែលគ្របដណ្តប់លើអាជីវកម្មចំនួន ៤ ប្រភេទ៖ កន្លែងស្នាក់នៅ ភោជនីយដ្ឋាន កន្លែង​ទេសចរណ៍​ និងផ្សារទំនើប។ អាជ្ញាធរទេសចរណ៍ថៃ (TAT) មានគោលបំណងទាក់ទាញប្រតិបត្តិករទេសចរណ៍យ៉ាងហោចណាស់ ៥ ០០០ ​ឱ្យចុះឈ្មោះក្នុងគម្រោង «វិញ្ញាបនបត្រ»នេះ ដែលផ្ដោត​លើ​ស្តង់ដារសុវត្ថិភាព និងសន្តិសុខ ត្រឹមខែមករា ឆ្នាំ ២០២៦។ ​​

លោក Sukkajorn Chaitraguntong អ្នកគ្រប់គ្រងទូទៅនៃសណ្ឋាគារ BCP និងជាអនុប្រធានក្រុមប្រឹក្សាទេសចរណ៍ខេត្តរយ៉ង បាននិយាយថា គម្រោងនេះគួរតែជួយបង្កើនចំនួនភ្ញៀវទេសចរចិន។

ទេសចរចិនទៅលេងថៃឆ្នាំនេះ បាន​ធ្លាក់ចុះជាគំហុកប្រមាណ ៣៤% ក្នុងរយៈពេល ១០ ខែដើមឆ្នាំ ដោយ​សារតែកង្វល់សុវត្ថិភាព​ ជាពិសេសក្រោយ​មាន​ករណីជួញដូរមនុស្សលើតួសម្ដែងចិន​ឱ្យ​ធ្វើការកន្លែងបោកប្រាស់អនឡាញនៅមីយ៉ាន់ម៉ា។ ក្រៅពីនេះ កង្វល់ពាក់ព័ន្ធនឹង​ការវាយប្រហារភេរវកម្មនៅភាគខាងត្បូងប្រទេស និងជម្លោះប្រដាប់អាវុធនៅព្រំដែនជាមួយ​កម្ពុជា ក៏រួមចំណែកដល់ការធ្លាក់ចុះជាទូទៅនៃភ្ញៀវទេសចរបរទេសទៅថៃផងដែរ។

ប្រតិបត្តិការទេសចរណ៍ថៃ​លើកឡើងថា គម្រោង «Trusted Thailand» ​មិនអាចជំរុញការស្ទុះងើបឡើងវិញនៃវិស័យទេសចរណ៍ឱ្យ​ពេញលេញបានទេ ដោយសារថៃនៅតែប្រឈមមុខនឹងបញ្ហាប្រឈមដែលមិនទាន់ដោះស្រាយ ដូចជាជម្លោះព្រំដែនជាមួយ​កម្ពុជា និងអស្ថិរភាពនយោបាយ​ជាដើម។

ប្រធានគណៈកម្មាធិការគុណភាពទេសចរណ៍របស់សភាពាណិជ្ជកម្មថៃ លោកស្រី Supawan Tanomkieatipume បាន​ថ្លែងថា TAT គួរតែផ្សព្វផ្សាយកម្មវិធី «Trusted Thailand» មុនបុណ្យចូលឆ្នាំចិន និងធ្វើការជាមួយវិស័យឯកជនលើយុទ្ធនាការពិសេសដើម្បីជំរុញការមកដល់របស់ភ្ញៀវទេសចរចិន។ លោកស្រីបានបន្ថែមថា យុទ្ធនាការនេះ ក៏គួរតែផ្តោតលើទីផ្សារផ្សេងទៀតផងដែរ ជាពិសេសនៅក្នុងតំបន់អាស៊ីប៉ាស៊ីហ្វិក ដែលកំណើនភ្ញៀវមកពីទីនោះ​នៅតែខ្សោយ។

បើតាមបាងកកប៉ុស្តិ៍ ដើម្បីទទួលបានសញ្ញាសម្គាល់ «Trusted Thailand» ប្រតិបត្តិករត្រូវតែបំពេញតាមតម្រូវការសំខាន់ៗចំនួន៤៖ ការអនុវត្តវិធានការសុវត្ថិភាពដូចជាការបំពាក់កាមេរ៉ាសុវត្ថិភាព ​និងសមយុទ្ធសង្គ្រោះបន្ទាន់ ការផ្តល់ជូនប្រព័ន្ធទូទាត់ដែលមានសុវត្ថិភាព ការអាចទំនាក់ទំនងជាមួយភ្ញៀវទេសចរជាភាសាបរទេស និង​ការធានាសុវត្ថិភាពកន្លែងស្នាក់នៅជាដើម៕