ត្រាំ និងស៊ី សន្ទនាគ្នាតាមទូរស័ព្ទ ជុំវិញបញ្ហាផ្សេងៗរួមទាំងជម្លោះពាណិជ្ជកម្ម

មន្ត្រីសេតវិមានម្នាក់បានបញ្ជាក់ប្រាប់បណ្ដាញទូរទស្សន៍ CNBC ថា ​ប្រធានាធិបតីសហរដ្ឋអាមេរិក លោក​ ដូណាល់ ត្រាំ បាន​សន្ទនាគ្នាតាមទូរស័ព្ទជាមួយ​សមភាគីចិន លោក​ ស៊ី ជីនពីង ​កាលពីព្រឹកថ្ងៃចន្ទ លើបញ្ហាផ្សេងៗ រាប់បញ្ចូលទាំងជម្លោះពាណិជ្ជកម្ម​។

មកទល់ពេលនេះ មិនទាន់មាន​​ព័ត៌មានលម្អិតថាតើអ្នកណាជាស្នើឱ្យមាន​ការសន្ទនាទូរស័ព្ទនោះទេ។ យ៉៉ាងណាមិញ លោក ត្រាំ បានបញ្ជាក់អំពីកិច្ចសន្ទនាដដែល ដោយ​សរសេរ​បង្ហោះនៅលើបណ្ដាញសង្គម Truth Social ថា៖ «យើងបានពិភាក្សាអំពីប្រធានបទជាច្រើន រួមទាំងអ៊ុយក្រែន/រុស្ស៊ី ហ្វេនតានីល សណ្តែកសៀង និងផលិតផលកសិកម្មផ្សេងៗទៀត។​ យើងបានធ្វើកិច្ចព្រមព្រៀងដ៏ល្អ និងសំខាន់មួយសម្រាប់កសិករដ៏អស្ចារ្យរបស់យើង ​ហើយវានឹងកាន់តែប្រសើរឡើង»។

លោកបន្ថែមយ៉ាងដូច្នេះថា៖ «ទំនាក់ទំនងរបស់យើងជាមួយ​ចិន គឺរឹងមាំខ្លាំងណាស់!»។ លោកក៏បានកត់​ឱ្យដឹងផងដែរថា មេដឹកនាំទាំង២បានព្រមព្រៀងគ្នា​សម្រាប់ជំនួបពិភាក្សា​ដោយផ្ទាល់។ កិច្ចប្រជុំលើកដំបូងនឹងធ្វើឡើងនៅទីក្រុងប៉េកាំង​នា​ខែមេសា ហើយ​ដំណើរទស្សនកិច្ចផ្លូវរដ្ឋ​របស់លោក ស៊ី ទៅសហរដ្ឋអាមេរិក នឹងត្រូវកំណត់ពេលនៅពេលក្រោយក្នុងឆ្នាំនេះ។

​ទន្ទឹមនឹង​នោះផងដែរ ក្រសួងការបរទេសចិនឯណោះវិញ បាន​និយាយក្នុងសេចក្ដីថ្លែងការណ៍មួយថា ​ចិន និងអាមេរិក ​«កំពុងអនុវត្តធាតុផ្សំទាំងអស់នៃអ្វីដែលយើងបានព្រមព្រៀងគ្នា» ​ពេលមេដឹកនាំ​នៃប្រទេសទាំង២ បានជួបគ្នានៅទីក្រុងប៊ូសាន ប្រទេសកូរ៉េខាងត្បូង ​កាលពីចុងខែមុន។

ក្នុងជំនួបនាពេលនោះ ភាគីទាំង២បាន​ឯកភាពគ្នា​ថា អាមេរិក​បន្ថយពន្ធលើទំនិញចិន ​ហើយ​ចិន​ផ្អាកការ​រឹតត្បឹតការនាំចេញថ្មីលើរ៉ែ​កម្រ ​ក្នុងចំណោមលក្ខខណ្ឌផ្សេងៗ ដែលកាត់បន្ថយកម្ដៅរវាង​មហាអំណាចទាំង២ រួមទាំងការប្ដេជ្ញារបស់់ចិនលើការទិញសណ្ដែកសៀងអាមេរិកជាដើម។

រដ្ឋាភិបាលចិន​ក៏បាន​និយាយក្នុងសេចក្ដីថ្លែងការណ៍នៅថ្ងៃចន្ទផងដែរថា ​«ទំនាក់ទំនងចិន-សហរដ្ឋអាមេរិករក្សាបាននូវគន្លងស្ថិរភាព និងវិជ្ជមាន» ចាប់តាំងពីកិច្ចប្រជុំនៅទីក្រុងប៊ូសាន៕