សេដ្ឋកិច្ច

កម្ពុជាស្វាគមន៍ភ្ញៀវទេសចរអន្តរជាតិជាង ៤,៧ លាននាក់ ត្រឹមរយៈពេល ១០ ខែ ឆ្នាំនេះ

បានផុស

៦ ខែ មុន

នៅ

ថ្ងៃព្រហស្បតិ៍ ៤ ធ្នូ ២០២៥

ដោយ

កម្ពុជាបានស្វាគមន៍ភ្ញៀវទេសចរអន្តរជាតិជាង ៤,៧ លាននាក់ (៤ ៧៥០ ០៧៥) នៅក្នុងរយៈពេល ១០ ខែ ឆ្នាំ ២០២៥ ធ្លាក់ចុះ ១១,៦% ធៀបនឹងរយៈពេលដូចគ្នានៅឆ្នាំ ២០២៤។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមក្រសួងទេសចរណ៍ ក្នុងចំណោមភ្ញៀវទេសចរអន្តរជាតិជាង ៤,៧ លាននាក់ ទេសចរណ៍វៀតណាមឈរនៅលំដាប់លេខរៀងទី១ ចំនួនជាង ១ លាននាក់ ធ្លាក់ចុះ ៦,៨% ចិន ១ លាននាក់ កើនឡើង ៤៤,៦% ថៃ ៩៩ ម៉ឺននាក់ ធ្លាក់ចុះ ៤២,៣% អាមេរិកជាង ១៦ ម៉ឺននាក់ ធ្លាក់ចុះ ២,៦% កូរ៉េជិត ១៤ ម៉ឺននាក់ ធ្លាក់ចុះ ១២%។

លោក ធួន ស៊ីណាន ប្រធានសមាគមទេសចរណ៍អាស៊ីប៉ាស៊ីហ្វិកកម្ពុជា (PATA) មានប្រសាសន៍ថា ពិភពលោកកំពុងប្រឈមនឹងបញ្ហាភូមិសាស្ត្រនយោបាយ សេដ្ឋកិច្ចសកល និងជំងឺឆ្លង។

លោក ធួន ស៊ីណាន យល់ឃើញថា៖ «យើងអាចរក្សាលំនឹងប៉ុណ្ណឹង ជារឿងកត់សម្គាល់មួយ ចំណុចដែលធ្លាក់ចុះដែលយើងមើលឃើញគឺ នៅពេលដែលបិទព្រំដែនកម្ពុជា-ថៃភ្ញៀវដែលបាត់បង់គឺភ្ញៀវដែលមកលេងកាស៊ីណូតាមព្រំដែន ហ្នឹងឯង ភ្ញៀវទាំងអស់នោះ មិននាំប្រយោជន៍ច្រើនដល់ប្រជាជនកម្ពុជានោះទេ គឺបានតែមួយផ្នែកទៅលើម្ចាស់កាស៊ីណូ ដែលជាជនជាតិថៃ ចិន និងពន្ធដារមករដ្ឋាភិបាល និងកំណើនការងារក្នុងការស៊ីណូ ប៉ុន្តែមិនទូលំទូលាយដូចទេសចរមកលេងស្រុកយើងទេ»។

ធនាគារអភិវឌ្ឍន៍អាស៊ី (ADB) បានអះអាងថា វិស័យទេសចរណ៍បង្ហាញពីការបន្តងើបឡើងវិញនៅក្នុងឆមាសទីមួយឆ្នាំ ២០២៥ ជាមួយនឹងការកើនឡើងនៃចំនួនភ្ញៀវទេសចរពីសាធារណៈរដ្ឋប្រជាមានិតចិន។

ប៉ុន្តែភាពតានតឹងនៅតាមព្រំដែនជាមួយប្រទេសថៃដែលកំពុងបន្តកើតមាន នឹងរំខានដល់វិស័យទេសចរណ៍ និងសកម្មភាពនានាក្នុងវិស័យសេវាកម្មទូទៅនៅក្នុងឆមាសទីពីរនៃឆ្នាំនេះ និងពេលខាងមុខ។

នៅក្នុងឆ្នាំ ២០២៤ កម្ពុជាទទួលបានភ្ញៀវទេសចរអន្តរជាតិចំនួន ៦,៧ លាននាក់ កើនឡើង ២២,៩% ធៀបនឹងឆ្នាំ ២០២៣៕

អត្ថបទ៖ ឡេង ដេត