ចិនប្រើច្បាប់​ប្រឆាំង​ទណ្ឌកម្ម​ ​ក្រោយអាមេរិកបញ្ចូលក្រុមហ៊ុនចម្រាញ់ប្រេងរបស់ខ្លួន​​ទៅ​ក្នុងបញ្ជីខ្មៅ​

ប្រទេសចិន​បាន​​ប្រើប្រាស់ច្បាប់ប្រឆាំងទណ្ឌកម្មជាលើកដំបូង ដោយ​កំណត់គោលដៅលើក្រុមហ៊ុន​អន្តរជាតិ​ណាដែលអនុវត្តតាមទណ្ឌកម្មបរទេស ដើម្បីជាការឆ្លើយតបទៅនឹង​ចំណាត់ការរបស់សហរដ្ឋអាមេរិក ដែលដាក់បញ្ចូល​រោងចក្រចម្រាញ់ប្រេងចិន​ជាច្រើនទៅក្នុងបញ្ជីខ្មៅ ចំពោះការទិញប្រេងឆៅពីអ៊ីរ៉ង់។ ​នេះបើតាមការចុះផ្សាយរបស់ទីភ្នាក់ងារសារព័ត៌មាន​រ៉យទ័រកាលពីថ្ងៃចន្ទ ទី ៤ ឧសភា។

ក្រសួងពាណិជ្ជកម្មចិន កាលពីថ្ងៃសៅរ៍ បានបញ្ជាឱ្យក្រុមហ៊ុននានាមិនគោរពតាមទណ្ឌកម្មរបស់អាមេរិក ប្រឆាំងនឹងក្រុមហ៊ុនចម្រាញ់ប្រេងចំនួន ៥ រួមទាំងក្រុមហ៊ុន Hengli Petrochemical ​ដោយលើកឡើងពីច្បាប់ប្រឆាំងទណ្ឌកម្ម ដែលចិនរាប់ទុកថាខុសច្បាប់។ ​

​កន្លងមក សហរដ្ឋអាមេរិក​ និងរដ្ឋាភិបាលលោកខាងលិចផ្សេងទៀត បានដាក់ទណ្ឌកម្មលើក្រុមហ៊ុនចិនមួយចំនួន សម្រាប់ការជួញដូរប្រេងអ៊ីរ៉ង់ ឬរុស្ស៊ី ​ដោយបង្កការរិះគន់ម្តងហើយម្តងទៀតពីទីក្រុងប៉េកាំង។

ក្រុមហ៊ុន Hengli Petrochemical បានបដិសេធការចោទប្រកាន់របស់​អាមេរិកថាខ្លួនបានជួញដូរជាមួយអ៊ីរ៉ង់។ ប៉ុន្តែមែនទែនទៅ ក្រុមហ៊ុនចម្រាញ់ប្រេងឯករាជ្យ​ជាច្រើន​នៅចិន​ គឺជា​អតិថិជនដ៏​សំខាន់សម្រាប់​ការនាំចេញប្រេងរបស់អ៊ីរ៉ង់។

គេមើលឃើញថា​ ការប្រើច្បាប់ប្រឆាំងទណ្ឌកម្មរបស់ចិន ធ្វើឡើងតិចជាង ២​ សប្ដាហ៍ប៉ុណ្ណោះ មុនពេលប្រធានាធិបតីអាមេរិក លោក ដូណាល់ ត្រាំ ធ្វើដំណើរទស្សនកិច្ចទៅទីក្រុងប៉េកាំង ដែលនេះបង្ហាញពីឆន្ទៈរបស់ចិន​​ក្នុងការប្រើប្រាស់យន្តការ​ដាក់សម្ពាធសេដ្ឋកិច្ច​ឆ្លើយតបនឹងគំនាបរបស់លោកខាងលិច។

យោងតាមច្បាប់ដែល​ដាក់ចេញនៅឆ្នាំ ២០២១ និងត្រូវបានកែសម្រួលថ្មីៗនេះ​ក្នុងខែមេសា ប្រទេសចិនអាចដាក់វិធានការតបតប្រឆាំងទណ្ឌកម្ម​ដោយកំណត់គោលដៅ​លើក្រុមហ៊ុន និងបុគ្គល រួមទាំងការរឹតបន្តឹងពាណិជ្ជកម្ម និងវិនិយោគ និងការរឹតបន្តឹងការចេញ-ចូលចិន​ជាដើម​។

អ្នកវិភាគផ្នែកច្បាប់ បាន​ប្រាប់រ៉យទ័រថា ​ ច្បាប់នេះ​ធ្វើឱ្យ​ដៃគូអាជីវកម្មរបស់ក្រុមហ៊ុនដែលរង​ទណ្ឌកម្ម ស្ថិតក្នុងស្ថានភាពលំបាកមួយ ដោយ​ពួកគេអាចបំពានច្បាប់ចិន ប្រសិនបើ​អនុវត្តតាមទណ្ឌកម្មបរទេស ឬប្រឈមមុខនឹងការពិន័យនៅ​បរទេស ឬប្រភពនៃទណ្ឌកម្ម​ ប្រសិនបើពួកគេមិន​អនុវត្តតាម​​៕

​