ព័ត៌មានជាតិ

ផ្លូវជាតិលេខ ៦ ខេត្តកណ្តាលពង្រាយបង្គោលភ្លើងបំភ្លឺផ្លូវ លើកសោភណភាព សុវត្ថិភាំពធ្វើដំណើរយប់ព្រលប់

បានផុស

៥ years មុន

នៅ

ថ្ងៃពុធ ៤ សីហា ២០២១

ដោយ

អាជ្ញាធរខេត្តកណ្តាល បានចាប់ផ្តើមពង្រាយបង្គោលភ្លើងបំភ្លឺផ្លូវតាមផ្លូវជាតិលេខ ៦ ចាប់ព្រំប្រទល់រាជធានីភ្នំពេញក្នុងទឹកដីខេត្តកណ្តាលដល់រកាកោង និងបន្តរហូតដល់ថ្នល់កែងព្រំប្រទល់ខេត្តកំពង់ចាម។

លោក នូវ ប៉េងច័ន្ទតារា អភិបាលរងខេត្តកណ្តាលបានប្រាប់សារព័ត៌មានកម្ពុជាថ្មីនៅព្រឹកនេះថា រដ្ឋបាលខេត្តកំពុងរៀបចំបង្គោលភ្លើងបំភ្លឺផ្លូវគ្រប់គោលដៅតាមទីប្រជុំជន តាមផ្លូវជាតិចេញពីខេត្តកណ្តាលទាំងអស់ ដើម្បីលើកកម្ពស់សោភណភាព និងសុវត្ថិភាពសម្រាប់ការធ្វើដំណើរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកបញ្ជាក់ថា មិនថាតែទីប្រជំជននោះទេ បើតាមការណែនាំរបស់អភិបាលខេត្តគ្រប់ផ្លូវជាតិទាំងអស់ត្រូវរៀបចំភ្លើងបង្គោលភ្លើងបំភ្លឺ ដើម្បីលើកកម្ពស់សោភណភាព និងសុវត្ថិភាពពលរដ្ឋធ្វើដំណើរយប់ព្រលប់។

លោកបន្តថា ដោយឡែកផ្លូវជាតិលេខ ៦ ក្នុងមូលដ្ឋានខេត្តកណ្ដាលបានពង្រាយចាប់តាំងពីព្រំប្រទល់រាជធានីភ្នំពេញដល់រកាកោងជាង ២០ គីឡូម៉ែត្រ និងបន្តរហូតដល់ថ្នល់កែងព្រំប្រទល់ខេត្តកំពង់ចាម។

ឯកឧត្ដម គង់ សោភ័ណ្ឌ អភិបាលខេត្តកណ្ដាល បានដាក់ផែនការដំឡើងបង្គោលដងគោមអគ្គិសនីបំភ្លឺផ្លូវសាធារណៈ និងតាមបណ្ដាស្រុកនានាត្រូវមានភ្លើងបំភ្លឺផ្លូវសាធារណៈនៅគ្រប់ផ្លូវទាំងអស់។

អភិបាលខេត្តកណ្តាលបានលើកឡើងថា នៅក្រុងតាខ្មៅនឹងមានភ្លើងបំភ្លឺផ្លូវសាធារណៈ ហើយនៅគ្រប់ផ្លូវទាំងអស់ក្នុងក្រុងក៏ដូចជានៅតាមផ្លូវសំខាន់ៗមួយចំនួននៅតាមបណ្ដាស្រុកដទៃទៀត ក៏នឹងមានភ្លើងបំភ្លឺផ្លូវសាធារណៈ។ ការដាក់ភ្លើងបំភ្លឺផ្លូវសាធារណៈនេះ មិនត្រឹមតែសម្រាប់បំភ្លឺផ្លូវប៉ុណ្ណោះទេ តែក៏បានលើកកម្ពស់សោភណភាពផ្លូវ និងសោភណក្រុងស្រុកផងដែរ។

បើតាមការឲ្យដឹងបន្ថែមរបស់អាជ្ញាធរខេត្តកណ្តាល ក្រៅពីការដំឡើងភ្លើងបំភ្លឺផ្លូវសាធារណៈ នៅតាមបណ្ដាបង្គោលភ្លើង ត្រូវបំពាក់កាមេរ៉ាសុវត្ថិភាព ដើម្បីងាយស្រួលក្នុងការអនុវត្តគោលនយោបាយភូមិឃុំ មានសុវត្ថិភាព៕

អត្ថបទ៖ ប៊ុណ្ណារ៉ា

Related Topics: