មកដឹងបណ្ដាប្រទេស អាស៊ាន ត្រៀមបើកទទួលភ្ញៀវ​ទេសចរបរទេស (មានវីដេអូ)

បច្ចុប្បន្នបណ្ដាប្រទេសអាស៊ានមួយចំនួនកំពុងមើលឃើញពីការបើកប្រទេសឡើងវិញ ដើម្បីទទួលភ្ញៀវទេសចរ បន្ទាប់ពីវិស័យមួយនេះបានដាំក្បាលចុះ ដោយសាររោគរាតត្បាតកូវីដ ១៩ ។

នេះជាការក្រឡេកមើលថាតើប្រទេសណាខ្លះនៅតំបន់អាស៊ានកំពុងបើកទូលាយទទួលអ្នកទេសចរ និងប្រទេសណាដែលនៅតែបិទព្រំដែនរបស់ខ្លួន ។

ព្រះរាជាណាចក្រកម្ពុជា

កម្ពុជាប្រកាសបើកទទួលទេសចរណ៍វ៉ាក់សាំង ដែលការបើកដំបូង គឺនៅក្រុងព្រះសីហនុ ក្រុងកោះរ៉ុង នៃខេត្តព្រះសីហនុ និងនៅតារាសាគរ នៃខេត្តកោះកុង ចាប់ពីថ្ងៃទី ៣០ ខែវិច្ឆិកា ឆ្នាំ ២០២១នេះតទៅ ។

ថៃ

ថៃនឹងអនុញ្ញាតឲ្យអ្នកដំណើរដែលបានចាក់វ៉ាក់សាំងពីប្រទេស និងដែនដីចំនួន ៤៦ ចូលក្នុងប្រទេស ដោយមិនឲ្យធ្វើចត្តាឡីស័ក ចាប់ពីថ្ងៃទី ១ ខែវិច្ឆិកាតទៅ ខណៈដែលប្រទេសមួយនេះកំពុងស្វែងរកការធ្វើឲ្យឧស្សាហកម្មទេសចរណ៍ដ៏សំខាន់របស់ខ្លួនរស់ឡើងវិញ ។

សិង្ហបុរី

មជ្ឈមណ្ឌលពាណិជ្ជកម្មសិង្ហបុរីបានចាប់ផ្តើមបើកដំណើរការធ្វើដំណើរដោយមិនចាំបាច់ធ្វើចត្តាឡីស័ក សម្រាប់ភ្ញៀវទេសចរដែលបានចាក់វ៉ាក់សាំងពេញដូសពីប្រទេសចំនួន ១០ រួមទាំងសហរដ្ឋអាមេរិក និងបណ្តាប្រទេសអឺរ៉ុបមួយចំនួន ហើយនឹងបន្ថែមទៀតក្នុងពេលឆាប់ៗនេះ ។

ឥណ្ឌូណេស៊ី

ប្រទេសឥណ្ឌូណេស៊ីបានបើកដំណើរការឡើងវិញនូវកោះបាលីក្នុងខែនេះដល់ភ្ញៀវទេសចរមកពីប្រទេសមួយចំនួន ប៉ុន្តែអ្នកធ្វើដំណើរនៅតែតម្រូវឲ្យធ្វើចត្តាឡីស័ករយៈពេល ៥ ថ្ងៃ នៅពេលមកដល់ ។

វៀតណាម

វៀតណាមគ្រោងនឹងអនុញ្ញាតឲ្យភ្ញៀវបរទេសចូលកម្សាន្តនៅកោះ Phu Quoc ចាប់ពីខែក្រោយនេះ ។

ម៉ាឡេស៊ី

ប្រទេសម៉ាឡេស៊ីក៏មានផែនការដូចគ្នាទៅនឹងវៀតណាមផងដែរ ដោយត្រៀមបើកកោះ Langkawi នៅខែក្រោយនេះ ។

គួរបញ្ជាក់ថា ប្រទេសមួយចំនួនទៀតរួមទាំង ហ្វីលីពីន ព្រុយណេ ឡាវ និងមីយ៉ាន់ម៉ា នៅតែបិទព្រំដែនមិនទាន់ទទួលភ្ញៀវទេសចរបរទេសឡើយ ៕

សូមទស្សនាវីដេអូ!

ប្រែសម្រួលដោយ ៖ ជីវ័ន្ត

ប្រភព ៖ Bangkok Post

ចុចអាន ៖ ប្រជុំលើកដំបូងជាមួយ អាស៊ាន អាមេរិក ​​ផ្តល់​ថវិកា ១០២ លាន​ដុល្លារដល់ប្លុកមួយនេះ