CEO ធនាគារ Bank of America ព្យាករណ៍ថា វិបត្តិសេដ្ឋកិច្ច អាមេរិក នឹង​កើតមានឡើងនៅឆមាសទី ២

នាយកប្រតិបត្តិធនាគារអាមេរិក Bank of America លោក Brian Moynihan បាននិយាយកាលពីថ្ងៃអាទិត្យថា សហរដ្ឋអាមេរិក អាចប្រឈមនឹងវិបត្តិសេដ្ឋកិច្ចកម្រិតស្រាលនៅក្នុងឆមាសទី២ នៃឆ្នាំនេះ និងនៅក្នុងត្រីមាសទី១ នៃឆ្នាំ ២០២៤ ។

ក្នុងបទសម្ភាសន៍ជាមួយសារព័ត៌មាន CBS News លោក Moynihan លើកឡើងថា អាមេរិកនឹងកើតមានវិបត្តិសេដ្ឋកិច្ច ដោយចាប់ផ្តើមពីឆមាសទី២ នេះទៅ ​ហើយអាចបន្តដល់ត្រីមាសទី​១ នៅឆ្នាំ​ក្រោយ ដែលជាការធ្លាក់ចុះ​នៃសេដ្ឋកិច្ចកម្រិតស្រាល និងនាំឲ្យភាពគ្មានការងារធ្វើកើនឡើងដល់កម្រិតខ្ពស់រហូត ៤ ភាគរយ ។

ការព្យាករណ៍របស់ CEO នៃធនាគារអាមេរិក Bank of America រូបនេះ គឺមិនខុសគ្នាទៅនឹងការលើកឡើងរបស់ប្រធានធនាគារកណ្តាលអាមេរិកលោក Jerome Powell នោះទេ ពោលលោកបានអះអាងកាលពីខែឧសភាថា សហរដ្ឋអាមេរិកអាចនឹងឆ្ពោះទៅរកវិបត្តិសេដ្ឋកិច្ច​ តែក្នុងកម្រិតស្រាលប៉ុណ្ណោះ ។

ចំណែកអ្នកបង្កើតគោលនយោបាយនៅធនាគារកណ្តាលក៏បានព្យាករណ៍ដូចគ្នា​នេះដែរថា ប្រទេសដឹកនាំសេដ្ឋកិច្ចពិភពលោកមួយនេះ នឹងជួបប្រទះវិបត្តិសេដ្ឋកិច្ចកម្រិតស្រាលនៅចុងឆ្នាំនេះ ហើយអាចចំណាយពេលរហូតដល់ទៅ ២ ឆ្នាំដើម្បីដោះស្រាយបញ្ហាបាន ។

ទោះយ៉ាងណា ពាក់ព័ន្ធ​ជាមួយវិបត្តិសេដ្ឋកិច្ចរបស់អាមេរិក ជាពិសេសបញ្ហាបំណុលនេះដែរ, ទាំងលោក Kevin McCarthy ប្រធានសភាអាមេរិក និងលោកប្រធានាធិបតី Joe Biden បានព្រមព្រៀងគ្នាដំឡើងបំណុលអតិបរមា ដើម្បីជាជំហានអាចឲ្យរដ្ឋាភិបាលលមានពេលក្នុងការដោះស្រាយបញ្ហាចំពោះមុខទាំងអស់ ៕

ប្រែសម្រួល៖ នាង រតនៈ

ប្រភព៖ Sputnik

ចុចអាន៖ ទីក្រុងប៉េកាំង ព្រមានថា ជម្លោះ ចិន-អាមេរិក នឹងក្លាយជាមហន្តរាយសម្រាប់ពិភពលោកទាំងមូល