​ផលិតកម្មពោតក្រហមរំពឹងថា ​មានកំណើនដល់ ១,៦ ​លានតោននៅឆ្នាំនេះ ​

ក្រសួងកសិកម្មរុក្ខាប្រមាញ់ និងនេសាទ ​ប៉ាន់ស្មានថា ​ការបង្កបង្កើនផលពោតក្រហមរបស់​កម្ពុជា​នឹង​មានការកើនឡើងដល់ ១,៦ ​លានតោន នៅឆ្នាំ ២០២៤ នេះ ដែលកើនលើសឆ្នាំមុន ដែលមានចំនួន ១,៥ លានតោន។​

​​របាយការណ៍របស់ក្រសួងកសិកម្មបង្ហាញថា ​ផ្ទៃដីដាំដុះពោតក្រហមបានកើនពី ២៧ ម៉ឺន ៧ ពាន់ហិកតា នៅឆ្នាំ ២០២៣ ​ដល់ជាង ២៨ ម៉ឺនហិកតានៅឆ្នាំ ២០២៤ ខណៈការនាំ​ចេញ​សម្រេចបាន​ប្រមាណតែ ៧ ម៉ឺនតោនប៉ុណ្ណោះកាលពីឆ្នាំមុន។

​លោក យ៉ង សាំងកុមារ រដ្ឋលេខាធិការ ក្រសួងកសិកម្ម ​រុក្ខាប្រមាញ់ និងនេសាទ ​មានប្រសាសន៍ថា អ្វីដែលជាតម្រូវការ​នៅពេលដែលកម្ពុជាមានរោងចក្រផលិតចំណីសត្វដែលធ្វើពីពោត ​ហើយទិន្នផលកើនឡើងបែបនេះ ​ជាសញ្ញាវិជ្ជមានសម្រាប់វិស័យចិញ្ចឹមសត្វ ​និងផលិតកម្មកសិកម្មដែលយើងមានវត្ថុធាតុដើមស្រាប់។​

​សហគមន៍កសិករដាំពោតនៅខេត្តស្ទឹងត្រែង បានឱ្យដឹងថា​ នៅឆ្នាំនេះ ​ដំណាំពោតបាន​រងផលប៉ះ​ពាល់​ពីអាកាសធាតុក្តៅបង្កឱ្យផល​ធ្លាក់ចុះ និងគ្មានអ្នកបញ្ជាទិញធ្វើឱ្យកសិករ​ខាតទុន​ប្រមាណ ២០ ភាគរយតាមចម្ការនីមួយៗ។

​យោងតាមអគ្គនាយកដ្ឋានគយ និងរដ្ឋាករកម្ពុជា នៅក្នុងរយៈពេល ៥ ខែឆ្នាំ ២០២៤ កម្ពុជានាំចេញ​ពោតបានទឹកប្រាក់ ៧,៥ លានដុល្លារ កើនឡើង ១៤៦៣​% បើធៀបនឹងរយៈពេលដូចគ្នានៅឆ្នាំ ២០២៣៕

អត្ថបទ៖ ឡេង ដេត