កសិករដាំដំណាំពោតនៅខេត្តបាត់ដំបងកំពុងប្រឈមបញ្ហាសត្វដង្កូវ

កសិករដាំដំណាំពោតនៅស្រុកនួន៣ គឺស្រុកភ្នំព្រឹក ស្រុកសំឡូត ស្រុកបាណន់ ក្នុងខេត្តបាត់ដំបង កំពុងប្រឈមបញ្ហាសត្វដង្កូវដែលបានស៊ីបំផ្លាញទ្រង់ទ្រាយធំ ទោះបីពួកគាត់ប្រើថ្មាំបាញ់សម្លាប់យ៉ាងណាក៏ដោយ។

លោក រិនដា កសិករនៅស្រុកភ្នំព្រឹក ដែលជាកសិករមួយរូបមានទំហំដីកសិកម្មច្រើនជាងគេ លោកបានប្រាប់ថា ” វាពិបាកពេកចឹង ខ្ញុំចង់លក់ដីចម្ការទាំងអស់ ហើយឈប់ធ្វើកសិកម្ម យកលុយរករបរផ្សេង ព្រោះការប្រឈមវាច្រើនពេក អស់ពីរាំងស្ងួត ដង្កូវបំផ្លាញធ្វើឲ្យការថែទាំបង្កើនការចំណាយច្រើន ហើយទីផ្សារឡើងចុះៗដូចគេឡើងដើមត្នោតយកទឹកអ៊ីចឹង”។

ការលើកឡើងពី កសិករនៅស្រុកភ្នំព្រឹកនេះ ធ្វើឲ្យកសិករនៅស្រុកសំឡូត និងស្រុកបាណន់សម្តែងការគាំទ្រទាំង
ស្រុង ព្រោះពួកគាត់ថា ការលើកឡើងរបស់កសិករខាងលើ គឺជាការឆ្លុះបញ្ចាំងលើគំណិតពួកគាត់ដែលចង់និយាយបែបនេះដែរ។

លោក ឈាង រុំ កសិករនៅស្រុកបាណន់លើកឡើងថា “និយាយពីដង្កូវវិញ ពោតខ្ញុំស្ទើរមិនបានទទួលផល ខ្ញុំបានប្រើថ្នាំ
បាញ់ដែរតែក្រោយមក ខ្ញុំស្មានតែអស់ហើយក៏ស្រាប់តែដើម និងផ្លែពោតដូចខ្មួតសុីឈើ”។ ចំណែកលោក ផាត កសិករ នៅស្រុកសំឡូត សម្តែងអារម្មថា “កសិករ ទាំង២បានលើកឡើងខាងលើត្រឹមត្រូវហើយ ខ្ញុំក៏អត់មានអីនិយាយក្រៅពីនេះដែរតែគ្រាន់ថា តើយើងរកវិធីប្រើថ្នាំអ្វីទៀត ដើម្បីទប់ទល់ ព្រោះការខិខំដាំពោតនេះវាគ្រាន់បានដោះស្រាយជីវភាព គ្រួសារបានពីមួយឆ្នាំទៅមួយឆ្នាំដែរ ព្រោះដំណាំពោត ខ្ញុំបានផលក្នុងមួយឆ្នាំ២ដងដែរ ក្នុងទំដី៥ហិកតា ខ្ញុំបានដាំពោតខ្មែរយើងសម្រាប់ឲ្យគ្រួសារស្ងោរលក់មួយផ្នែក ហើយក៏បានលទ្ធផលចំណូលគ្រាន់បើដែរ ហើយ៤ហិកតាទៀតលក់គ្រាប់”។

បើតាមការស្រាវជ្រាវ របស់មន្ត្រីកសិកម្មបានឲ្យដឹងថា ដង្កូវដែលបំផ្លាញដំណាំពោតកសិករ គឺផ្តើមចេញពីសត្វមេអំបៅ ដែលវាទៅពងដាក់នៅតាមផ្កាពោត ហើយវាក្លាយជាដង្កូវតែម្តង។ ហើយសត្វមេអំបៅ ក៏វាមានកំណើតពីសត្វដង្កូវដែរ តែវាមានពីរប្រភេទ គឺប្រភេទធំនិងតូច។ សត្វមេអំបៅត្រូវបានគេចាត់ទុកថា ជាសុខុម​សត្វ​មួយ​ប្រភេទមាន​ច្រើន​បែប,មានស្លាបបួនផ្នែកសណ្ឋាន​ ស្រទាង(ត្រដាងស្លាប) មាន​សាច់​ទន់​ផុយឬ​ជា​ផង់​ធូលីសម្បុរ​តែ​មួយ​ព័ណ៌ ឬ​រំលេច​ព័ណ៌​ផ្សេង​ៗ,ជាសត្វមានកំណើតក្លាយមក​ពី​ដង្កូវ ហើយមេ​អំបៅ​នេះជា​សត្វ​ទិវា​ចរ​ក៏​មាន, រត្តិ​ចរ​ក៏​មាន មានន័យថា ហើររកសុីពេលថ្ងៃក៏មានពេលយប់ក៏មាន ។

បើទោះបីបែបណា លោក ហេង សិទ្ធ មន្ត្រីកសិកម្មខេត្តបានពន្យល់ដល់កសិករថា “ដង្កូវដែលបានបំផ្លាញពោត ឬលើផលដំណាំដែលមានផ្កាផ្សេងៗទៀត វាកើតពីពងសត្វមេអំបៅ កសិករត្រូវទិញថ្នាំពីក្រុមហ៊ុនស្របច្បាប់ណាមួយ គឺត្រូវប្រើថ្នាំបាញ់សម្លាប់សត្វដង្កូវនេះ ជ្រើសយកប្រភេទ (ថ្នាំជ្រាប) និងរយៈពេលខ្លី តែកសិករត្រូវប្រាប់ទៅក្រុមហ៊ុនលក់ថ្នាំអំពីអាយុកាលពោតរបស់ខ្លួនផង ឬអាចដកយកដើមពោត១ដើមទៅបង្ហាញអ្នកលក់ថ្នាំ ដើម្បីអ្នកលក់គេតម្រូវថ្នាំឲ្យយកទៅប្រើប្រាស់តាមអាយុកាលពោត”។ លោកថា ថ្នាំប្រភេទជ្រាបនេះ វាអាចជ្រាបសម្លាប់ដល់ក្នុង មានន័យថា បើបាញ់លើផ្លែវាជ្រាបពីសំបកផ្លែសម្លាប់ដល់គ្រាប់ ឬស្នូលផ្លែពោតតែម្តង ពេលនោះវាអស់អីហើយ។ លោកថា ឲ្យប្រើកម្រិតរយៈពេលខ្លី ចៀវវាងជាតិពុលមិនទាន់សាបហើយយើងប្រមូលផលនាំឲ្យប៉ះពាល់ដល់សុខភាពធ្ងន់ធ្ងរ ទើបតម្រូវឲ្យប្រើទៅតាមអាយុកាលពោត។ លោកថា កសិករច្រើនប្រើប្រាស់ថ្នាំតៗគ្នាដោយមិនបានសួរនាំពីខាងមន្ត្រីបច្ចេកទេស ទើបលទ្ធផលវាមិនមានប្រសិទ្ធិភាពបែបនឹង៕

អត្ថបទ៖ សៅ សារិទ្ធ