ហាងឆេងមាសនៅលើទីផ្សារបានហក់ឡើងជាថ្មី

តម្លៃហាងមាសនៅលើទីផ្សារកម្ពុជាបន្តហក់ឡើងជាថ្មីនៅ​ក្នុង​ខែកក្កដា ឆ្នាំ ២០២៤ ដោយលក់ចេញមួយ​តម្លឹង​​ក្នុងតម្លៃជាង ២ ពាន់​ ៩ រយដុល្លារ។

អាជីវករលក់មាសនៅផ្សារជម្ពូវ័នបានប្រាប់ថា តម្លៃ​មាស​​បានកើនឡើងវិញនៅរយៈពេល ៣ ទៅ ៤ ថ្ងៃ​កន្លង​មកនេះដោយលក់ចេញក្នុងតម្លៃ ២៩៣ ដុល្លារ​​​​​ក្នុង​មួយជីនៅថ្ងៃទី ១៦ ខែកក្កដា ឆ្នាំ ២០២៤។

លោក ឡុង សំណាង ​ប្រធានផ្នែកប្រឹក្សាយោបល់​ហិរញ្ញ​វត្ថុ​​នៅក្រុមហ៊ុន ​PP Link securities ​ប្រាប់​កម្ពុជាថ្មីនៅថ្ងៃទី ​១៦ ខែកក្កដា ឆ្នាំ ២០២៤ នេះថា ការកើនឡើងតម្លៃមាសនៅលើទីផ្សារ គឺពាក់ព័ន្ធនឹង​ទំនុក​ចិត្តនៃការប្រើប្រាស់លុយដុល្លារ ដោយវិនិយោ​គិន​មួយចំនួនបាន​ដកលុយ​ទៅប្រើប្រាស់​វិនិយោគទៅ​លើហាងឆេងមាស និងភាគហ៊ុន។

មួយផ្នែកទៀត ព័ត៌មាន​នៅអាមេរិក​ចំណូល​​របស់ពួក​គាត់​មិនបានកើនឡើង​ទេក្នុងមួយ​ម៉ោង ខណៈ​កំណើន​​​អត់ការ​​ងារ​ធ្វើបែរជាកើន​ឡើងទៅវិញ ដែល​រុញ​​​ច្រាន​ឱ្យតម្លៃ​ហាងឆេង​​មាស​ហក់​ឡើង។

បើតាមលោក ឡុង សំណាង មួយរយៈនេះ ពិភពលោកជាប់រវល់នឹងការបោះឆ្នោត ដូចជាប្រទេសបារាំង អង់គ្លេស ដែលបានបោះឆ្នោតរួចហើយ ខណៈអាមេរិកកំពុងឃោសនាបោះឆ្នោត ដែលតម្លៃមាសអាចនឹងមានការប្រែប្រួលបន្ថែមទៀតនៅពេលខាងមុខ។

លោក ឡុង សំណាង៖ «នៅថ្ងៃទី ០៥ ខែ វិច្ឆិកា​ខាង​មុខ តម្លៃមាសនឹងមានការប្រែប្រួល​ខ្លាំងតែ​ម្ដង យើង​អត់​ដឹងថា ជាប់បេក្ខភាពប្រធានាធិបតី​មួយ​ណា​ទេ ចូ បៃឌិន ឬ ដូ ណាល់ត្រាំ ខណៈកន្លង​មកនៅពេល​ជាប់​លោក ត្រាំ តម្លៃហាងឆេងមាស​មាន​ការ​ធ្លាក់​ចុះ»។

បើតាមលោក ឡុង សំណាង ស្ថិរភាពវិស័យហិរញ្ញវត្ថុនៅលើពិភពលោក មិនទាន់មានភាពល្អប្រសើរនោះទេ ដែលប្រទេស​​មួយ​ចំនួននៅតែគិតអំពីបញ្ហាភូមិសាស្ត្រនយោបាយ ដែលនាំឱ្យបង្អាក់វិស័យហិរញ្ញវត្ថុ ធ្វើឱ្យសេដ្ឋកិច្ចធ្លាក់ចុះ ទើបធ្វើឱ្យតម្លៃមាសបន្តកើនឡើង ហើយអាចនឹង​ឡើង​ដល់ ៣ ពាន់ដុល្លារក្នុងមួយតម្លឹង​នៅចុងឆ្នាំនេះ៕

អត្ថបទ៖ ឡេង ដេត