វិស័យឯកជនគាំទ្រកញ្ចប់ទេសចរណ៍ របស់រដ្ឋាភិបាល ដឹកប្រជាជនធ្វើដំណើរកម្សាន្តនៅខេត្តភាគឦសាន ឥតគិតថ្លៃ

លោក ធួន ស៊ីណាន ប្រធាន​សមាគម​ទេសចរណ៍​អាស៊ី​ប៉ាស៊ីហ្វិក​កម្ពុជា គាំទ្រកម្មវិធីកញ្ចប់​ទេសចរណ៍​របស់រាជរដ្ឋាភិបាល ប៉ុន្តែលោកថា រដ្ឋាភិបាលគួតែគិតអំពីកោះដែល​នៅដាច់​ស្រយាលមិនសូវមានមនុស្សទៅដល់ ដែលមានតែកងកម្លាំងស្នាក់នៅ​គួរតែមានការ​ដឹកជញ្ជូនប្រជាពលរដ្ឋទៅមើលឱ្យស្គាល់ និងលើកទឹកចិត្តកងកម្លាំងផងដែរ។

លោក ធួន ស៊ីណានលើកឡើងថា៖ «ខេត្តដ៏ទៃទៀត ដូចជាខេត្តព្រះវិហារ ខេត្តឧត្តរមានជ័យ ក៏ដូចគ្នា កុំទៅតែម្ដុំ ពីព្រោះដែនដីយើងធំណាស់ ជាពិសេសនៅសមុទ្រ យើងមានតែកងកម្លាំងប៉ុន្មានរយនាក់ អញ្ចឹងហើយយើងកុំទុកឱ្យពួកគាត់នៅឯកោ ហ្នឹងនៅក្នុងន័យទេសចរណ៍ហើយ ព្រោះ​ទេសចរណ៍ត្រូស្គាល់ទឹកដី ទេសចរណ៍និយាយអំពីការស្នេហារជាតិ»។

លោក ធួន ស៊ីណាន បញ្ជាក់ថា សម្រាប់កញ្ចបប់ទេសចរណ៍នៅក្នុងវិស័យឯកជន​ គឺបានរៀប​ចំធ្វើឡើងជាហូរហែរតាមតម្រូវការទីផ្សារ ហើយគេរកតែតំបន់ណាថ្មី ផលិតផលថ្មី ដែល​មាន​ការទាក់ទាញនោះក្រុមហ៊ុនទេសចរណ៍ចាប់ផ្ដើមរៀបចំហើយ។

ប្រមុខដឹកនាំរាជរដ្ឋាភិបាលកម្ពុជា សម្ដេចធិបតី ហ៊ុន ម៉ាណែត នៅថ្ងៃទី ២២ ខែសីហា ឆ្នាំ ២០២៤ បានប្រកាសរៀបចំដំណើរកម្សាន្តដោយដឹកប្រជាពលរដ្ឋទៅមើលអំពីការអភិវឌ្ឍនៅខេត្តភាគឦសានដូចជាខេត្តក្រចេះ ស្ទឹងត្រែង មណ្ឌលគិរី និងខេត្តរតនគិរី។

សម្ដេច ហ៊ុន ម៉ាណែតថ្លែងថា៖ «​រាជរដ្ឋាភិបាលនឹងរៀបចំនូវកម្មវិធីដំណើរ​កម្សាន្តនេះ​ដោយផ្តល់​ជូននូវមធ្យោបាយដឹកជញ្ជូន រថយន្ត និងអាហារដោយមិនគិតថ្លៃ»។

កម្មវិធី​ដំណើរ​កម្សាន្តដោយឥតគិតថ្លៃ នឹងចាប់ផ្ដើមអនុវត្តនៅខែកញ្ញាខាងមុខនេះ នៅរៀងរាល់ចុងសប្ដាហ៍ រហូតដល់ដំណាច់ឆ្នាំ ២០២៤។

យោងតាមរបាយការណ៍របស់ខេត្តទាំង៤ បង្ហាញថា វិស័យទេសចរក្នុងខេត្តក្រចេះ បានរួមចំណែកក្នុងការអភិវឌ្ឍសេដ្ឋកិច្ច តាមរយៈការបង្កើតការងារជូនប្រជាពលរដ្ឋនៅមូលដ្ឋាន និងចំណូលផ្ទាល់ពីភ្ញៀវទេសចរ។

ខេត្តក្រចេះ មានរមណីយដ្ឋានជាច្រើនកន្លែង ពិសេសគឺធនធានសត្វផ្សោត ដែលជាគោលដៅទេសចរដ៍សំខាន់។ នៅឆ្នាំ ២០២២ ខេត្តទទួលបានភ្ញៀវទេសចរជាង ៣៦ ម៉ឺននាក់ (៣៦៣៩៨២) ក្នុងនោះទេសចរអន្តរជាតិចំនួន ៧ ០៧៦ នាក់ និងទេសចរជាតិ ៣៥៧៩១៧ នាក់។

ចំណែកឯខេត្តស្ទឹងត្រែង សម្បូរទៅដោយធនធានធម្មជាតិ ព្រៃភ្នំ ទន្លេ ដី កោះ តំបន់ជីវៈចម្រុះ និងតំបន់ការពារធម្មជាតិ ដែលជាសក្ដានុពលទាក់ទាញភ្ញៀវទេសចរ។ ខេត្តស្ទឹងត្រែង មានមូល​ដ្ឋាន និងសហគមន៍អេកូទេសចរណ៍ធម្មជាតិ ប្រវត្តិសាស្ត្រ និងវប្បធម៌ សំខាន់ៗ ចំនួន ១២ កន្លែង អាចទាក់ទាញភ្ញៀវទេសចរប្រមាណ ១២ ម៉ឺន ទៅ ១៦ ម៉ឺននាក់ក្នុងមួយឆ្នាំ។

រីឯខេត្តមណ្ឌលគិរី មានតំបន់រមណីយដ្ឋាន វប្បធម៌ និងធម្មជាតិសរុប ១០៥ កន្លែង ខណៈភ្ញៀវទេសចរមានកំណើន ២១.៨២% នៅឆ្នាំ ២០២២។

ដោយឡែក ខេត្តរតនគិរី ទទួលបានទេសចរជិត ៣ សែននាក់ (២៩៣៤២៤) នៅឆ្នាំ ២០២២៕

អត្ថបទ៖ ឡេង ដេត