កម្ពុជា-កាណាដា មានឆន្ទៈពង្រីកការវិនិយោគលើវិស័យថាមពលប្រេង និងរ៉ែ

លោក Paul J. Thoppil តំណាងពាណិជ្ជកម្មតំបន់ឥណ្ឌូប៉ាស៊ីហ្វិករបស់កាណាដានៅថ្ងៃទី ១៤ ខែកញ្ញា ឆ្នាំ ២០២៤ បានជួបជាមួយ លោក កែវ រតនៈ រដ្ឋមន្ត្រីក្រសួងរ៉ែ និងថាមពល ​បានពិភាក្សាលើការសហការផ្នែកថាមពល ប្រេង​ និងរ៉ែជាមួយកម្ពុជា។

ក្នុងជំនូបនោះភាគីទាំងពីរផ្តោតលើទំនាក់ទំនងល្អកន្លងមក​ ហើយមានឆន្ទៈក្នុងការពង្រីកបន្ថែមនូវការងារបណ្តុះបណ្តាល និងវិនិយោគរវាងរដ្ឋនិងរដ្ឋ ហើយត្រៀមបន្តពិភាក្សាបង្កើតក្របខ័ណ្ឌការងារជាយុទ្ធសាស្ត្រមួយចំនួន។​

ប្រទសកាណាដាវាយតម្លៃខ្ពស់ចំពោះភាគរយថាមពលបៃតងខ្ពស់របស់កម្ពុជានាពេលបច្ចុប្បន្ន​ ជាពិសេសការដាក់ពង្រាយថាមពលពន្លឺព្រះអាទិត្យប្រកបដោយចីរភាពនិងសមធម៌។

ភាគីកាណាដា ទទួលស្គាល់អំពីសក្ដានុពលរបស់កម្ពុជា ដូចជាកត្តាសុខសន្តិភាព ស្ថិរភាពនយោបាយ និងសេដ្ឋកិច្ច ការបើកចំហរ នៃរបបលើកទឹកចិត្តវិនិយោគ និងកម្លាំងពលកម្មវ័យក្មេង។

យោងតាម​អគ្គនាយកដ្ឋាន​គយ និង​​​រដ្ឋាករ​កម្ពុជា ​(GDCE)​ នៅក្នុងរយៈពេល ៨ ខែ ឆ្នាំ ២០២៤ (មករា-សីហា) ពាណិជ្ជ​កម្មទ្វេភាគីកម្ពុជា-កាណាដា សម្រេចបានទឹកប្រាក់ជាង ៧៨២ លានដុល្លារអាមេរិក កើនឡើង ២៧,៧ ភាគរយ បើប្រៀប​រយៈពេលដូចគ្នា នៅឆ្នាំ ២០២៣។

ក្នុងនោះកម្ពុជានាំទំនិញទៅកាណាដា មានជាង ៧៣៦ លានដុល្លារ និង​ទំនិញកាណាដានាំចូលមកកម្ពុជាមានតម្លៃជាង ៤៦ លានដុល្លារ៕