កម្ពុជា-កាណាដា បន្តពង្រីកកិច្ចសហប្រតិបត្តិការ និងការវិនិយោគ

នាព្រឹកថ្ងៃទី១៧ ខែមីនា ឆ្នាំ២០២៦ លោក វង្សី វិស្សុត ឧបនាយករដ្ឋមន្ត្រីប្រចាំការ បានទទួលជួបពិភាក្សាការងារជាមួយឯកឧត្តម Christian DesRoches ឯកអគ្គរដ្ឋទូតកាណាដាប្រចាំកម្ពុជា នៅទីស្តីការគណៈរដ្ឋមន្ត្រី ដើម្បីពង្រឹង និងពង្រីកកិច្ចសហប្រតិបត្តិការទ្វេភាគី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងជំនួបនេះ លោកបានគូសរំលេចអំពីទំនាក់ទំនងល្អប្រសើររវាងកម្ពុជា និងកាណាដា ចាប់តាំងពីឆ្នាំ១៩៥៣ ព្រមទាំងបានស្វាគមន៍ការបើកដំណើរការឡើងវិញនៃស្ថានទូតកាណាដា ដែលជាសញ្ញាវិជ្ជមានសម្រាប់ការពង្រឹងទំនាក់ទំនង និងកិច្ចសហការរវាងប្រទេសទាំងពីរ។

លោកក៏បានបញ្ជាក់ពីគោលនយោបាយការបរទេសរបស់កម្ពុជា ដែលផ្អែកលើពហុភាគីនិយម និងច្បាប់អន្តរជាតិ ព្រមទាំងការខិតខំកែលម្អអភិបាលកិច្ច និងបរិយាកាសវិនិយោគ ដើម្បីទាក់ទាញវិនិយោគិនបរទេសបន្ថែម។ ជាមួយគ្នានេះ លោកបានលើកទឹកចិត្តឱ្យកាណាដាបន្តពង្រីកការវិនិយោគ ជាពិសេសក្នុងវិស័យអាទិភាព។

ជាការឆ្លើយតប ឯកអគ្គរដ្ឋទូតកាណាដា បានបញ្ជាក់ពីការប្តេជ្ញាចិត្តក្នុងការពង្រឹងទំនាក់ទំនងទ្វេភាគី និងបានវាយតម្លៃខ្ពស់ចំពោះការអភិវឌ្ឍសេដ្ឋកិច្ច និងហេដ្ឋារចនាសម្ព័ន្ធរបស់កម្ពុជា ដែលបង្កើតឱកាសល្អសម្រាប់ពាណិជ្ជកម្ម និងវិនិយោគ។

ភាគីទាំងពីរ ក៏បានពិភាក្សាពាក់ព័ន្ធនឹងការកែទម្រង់ច្បាប់ ការកសាងសមត្ថភាពមន្ត្រី និងការប្រយុទ្ធប្រឆាំងបទល្មើសឆបោកតាមប្រព័ន្ធអនឡាញ។ ភាគីកម្ពុជា បានបញ្ជាក់ពីការខិតខំយ៉ាងខ្លាំងក្នុងការបង្ក្រាបបញ្ហានេះ ដើម្បីការពារបរិយាកាសវិនិយោគ និងកេរ្តិ៍ឈ្មោះប្រទេស។

នៅចុងបញ្ចប់ ភាគីទាំងពីរ បានបញ្ជាក់ជាថ្មីនូវការប្តេជ្ញាចិត្តក្នុងការពង្រឹងកិច្ចសហប្រតិបត្តិការឱ្យកាន់តែរឹងមាំ ខណៈកិច្ចប្រជុំកំពូល Francophonie ឆ្នាំ២០២៦ ដែលកម្ពុជាធ្វើជាម្ចាស់ផ្ទះ ត្រូវបានរំពឹងថានឹងជួយលើកកម្ពស់ទំនាក់ទំនងទ្វេភាគីបន្ថែមទៀត៕