សម្តេចតេជោ ជឿជាក់ថាកម្ពុជា-តួកគី អាចសម្រេចទំហំពាណិជ្ជកម្មទ្វេភាគី ១ពាន់លានដុល្លារ

សម្តេចតេជោ ហ៊ុន សែន ប្រធានព្រឹទ្ធសភាកម្ពុជា បានជំរុញឱ្យពង្រីកនូវទំនាក់ទំនងសេដ្ឋកិច្ច ពាណិជ្ជកម្ម និងការវិនិយោគ រវាងកម្ពុជា និងតួកគី បន្ថែមទៀត ដើម្បីឈានទៅសម្រេចគោលដៅទំហំពាណិជ្ជកម្មទ្វេភាគីរហូតដល់ ១ ០០០ លានដុល្លារអាមេរិក។

ការជំរុញរបស់សម្តេចតេជោ ហ៊ុន សែន បានធ្វើឡើងនៅក្នុងសន្និសីទសារព័ត៌នរួមគ្នា ជាមួយសាស្ត្រាច្ចារ្យបណ្ឌិត នូម៉ាន គូទលមុស ប្រធានរដ្ឋសសភាសាធារណរដ្ឋតួគី  កាលពីថ្ងៃទី​១២ ខែ ធ្នូ ឆ្នាំ ២០២៤ ក្នុងឱកាសដែលសម្តេច បំពេញទស្សនកិច្ចនៅតួកគី។

សម្តេចបានថ្លែងថា​ សម្រាប់កម្ពុជា ទោះបីថាពេលនេះ ទទួលយកនូវភាពជាដៃគូថ្មីៗជាមួយប្រទេសផ្សេងក៏ដោយ សម្តេចនៅតែអះអាងបន្តនូវនយោបាយ និងកិច្ចខិតខំប្រឹងប្រែង អំពីការពង្រីកដៃគូសន្ទនាជាមួយតួកគី ។ សម្តេចបញ្ជាក់ថា ក្នុងកាលៈទេសៈនេះ អ្វីដែលជាស្នូលទំនាក់ទំនង គឺការពង្រីកនូវទំនាក់ទំនងសេដ្ឋកិច្ច ពាណិជ្ជកម្ម និងការវិនិយោគ ដែលយើងគួរផ្តោតលើការយកចិត្តទុកដាក់ ជំរុញការងារនេះ ឱ្យសម្រេចគោលដៅ បើទោះបីថាមានការកើនឡើងបន្តិច​ម្តងៗ។

សម្តេចតេជោ មានប្រសាសន៍ថា៖«ខ្ញុំគិតថា យើងគង់នឹងឈានដល់ការសម្រេចកម្រិត ១ពាន់លានដុល្លារ ព្រោះថាសម្រាប់ប្រទេសយើងជាមួយប្រទេសដ៏ទៃទៀត សម្រេចបានលើសពី ១ពាន់លានដុល្លារ រហូតដល់ប្រទេសខ្លះមានទៅដល់ ៥ ពាន់ដុល្លារ ឬ ១០ ពាន់ដុល្លារ។ ពិតមែនតែ តួកគី មានប្រជាជនជាង ៨០ លាននាក់ ហើយកម្ពុជាមាន ១៧ លាននាក់ ប៉ុន្តែយើងមានកម្លាំងទិញធំ ហើយក៏មានផលិតផលសម្រាប់ការនាំចេញផងដែរ»។

សម្តេចក៏បានយកឱកាសនោះ ថ្លែងអំណរគុណចំពោះ រដ្ឋាភិបាល ក៏ដូចជាប្រជាជនតួកគី ដែលបានផ្តល់នូវជំនួយឧបត្ថម្ភទាំងឡាយសម្រាប់កម្ពុជា  ក្នុងនោះនិស្សិតអាហារូបករណ៍ កំពុងសិក្សានៅតួកគី ហើយមួយចំនួនបានវិលត្រឡប់ទៅកាន់ប្រទេសកម្ពុជាវិញ។ សម្តេចសង្ឃឹមថា កម្ពុជានឹងទទួលបាននូវជំនួយឧបត្ថម្ភទាំងនៅទីនេះ ក៏ដូចជាការជួយពង្រឹងសមត្ថភាព ធនធានមនុស្ស ក៏ដូចជាស្ថាប័ននៅក្នុងព្រះរាជាណាចក្រកម្ពុជាផងដែរ។

សម្តេចតេជោ ហ៊ុន សែន បានថ្លែងអំណរគុណតួកគី ដែលបានអញ្ជើញសម្តេចមកបំពេញទស្សនកិច្ច និងការចរចាប្រកបដោយផ្លែផ្កា ដោយចាត់ទុកទស្សនកិច្ចនេះ បង្ហាញអំពីមិត្តភាពរវាងកម្ពុជា-តួកគី ដែលមានរយៈពេលដ៏យូរលង់មកហើយ។

គួររំឭកថា កម្ពុជា-តួកគី បានដាក់ចេញគោលដៅកាលពីឆ្នាំ ២០១៨ ដើម្បីជំរុញ ពង្រីកទំហំពាណិជ្ជកម្ម រវាងប្រទេសទាំងពីរ សំដៅឈានទៅសម្រេចបានទំហំពាណិជ្ជកម្ម ១ ពាន់លានដុល្លារ។ ប៉ុន្តែគិតត្រឹមឆ្នាំ ២០២៤នេះ ពាណិជ្ជកម្មទ្វេភាគីសម្រចបានប្រហែល ២០០ លានដុល្លារ ។

យ៉ាងណាមិញ សម្តេចតេជោ ហ៊ុន សែន បង្ហាញការជឿជាក់ថា ដោយសារតែ តួកគី បានយកចិត្តទុកដាក់ទៅលើតំបន់អាស៊ីដែលជាដៃគូមួយដ៏ល្អ ក្នុងសហវត្សថ្មី គឺនឹងអាចធ្វើឱ្យមានការជឿនលឿនទៅក្នុងទំនាក់ទំនងជាមួយកម្ពុជាបន្ថែមទៀត ហើយអាចសម្រេចគោលដៅបាននាពេលខាងមុខនេះ៕