តួកគីសន្យាបន្តផ្ដល់ការបណ្ដុះបណ្ដាលដល់មន្ត្រីក្រសួងមហាផ្ទៃកម្ពុជា

រដ្ឋាភិបាលតួកគីយ៉េ សន្យាបន្តផ្ដល់ការបណ្ដុះបណ្ដាលដល់មន្ត្រីនគរបាលជាតិកម្ពុជា ខណៈក្រសួងមហាផ្ទៃកម្ពុជា និងក្រសួងមហាផ្ទៃតួកគីយ៉េ បានចុះហត្ថលេខាលើអនុស្សរណៈនៃការយោគយល់​គ្នាក្នុងកិច្ចសហប្រតិបត្តិការលើការបណ្ដុះបណ្ដាលមន្ត្រី។

ការសន្យាដូច្នេះ បានធ្វើឡើងដោយអនុរដ្ឋមន្ត្រីក្រសួងមហាផ្ទៃតួកគីយ៉េ លោក Mehmet Saglam​ ក្នុងជំនួបពិភាក្សាការងារជាមួយរដ្ឋមន្ត្រីក្រសួងមហាផ្ទៃនៃកម្ពុជា លោក ស សុខា កាលពីសប្ដាហ៍មុន ក្នុងពេលដែលលោក ស សុខា ទៅបំពេញទស្សនកិច្ចនៅតួកគីយ៉េ។

លោកឧបនាយករដ្ឋមន្ត្រី ស សុខា និងលោក Mehmet Saglam គឺបានចុះហត្ថលេខាលើអនុស្សរណៈនៃការយោគយល់គ្នាស្តីពីកិច្ចសហប្រតិបត្តិការបណ្តុះបណ្តាលលើការអនុវត្តច្បាប់រវាងរាជរដ្ឋាភិបាលកម្ពុជា និងរដ្ឋាភិបាលតួកគីយ៉េ។ បើតាមសេចក្តីប្រកាសព័ត៌មានរបស់ក្រសួងមហាផ្ទៃ ក្នុងជំនួបនោះ ភាគីទាំងពីរបានឯកភាពជំរុញការផ្លាស់ប្តូរបទពិសោធបង្ក្រាបអំពើឆបោកតាមប្រព័ន្ធបច្ចេកវិទ្យា កិច្ចសហប្រតិបត្តិការស្រាវជ្រាវ ចាប់ និងបញ្ជូនជនល្មើស ខណៈភាគីតួកគីយ៉េ នឹងផ្តល់អាហារូបករណ៍បន្ថែមទៀតដល់ក្រសួងមហាផ្ទៃ។

ភាគីទាំងពីរ ក៏បានពិភាក្សាអំពីការផ្លាស់ប្តូរ និងពង្រីកទំហំពាណិជ្ជកម្ម ទេសចរណ៍ និងការសម្រួលតម្លៃទិដ្ឋាការផងដែរ។

គួរជម្រាបថា ដោយមានការអនុញ្ញាតពីប្រមុខរាជរដ្ឋាភិបាល សម្ដេចធិបតី ហ៊ុន ម៉ាណែត រដ្ឋមន្ត្រីក្រសួងមហាផ្ទៃកម្ពុជា លោកឧបនាយករដ្ឋមន្ត្រី ស សុខា បានដឹកនាំគណៈប្រតិភូទៅបំពេញទស្សនកិច្ចនៅលើទឹកដីប្រទេសតួកគីយ៉េ ចាប់ពីថ្ងៃទី៩ ដល់ថ្ងៃទី១៤ ខែកុម្ភៈ ឆ្នាំ២០២៦ ក្នុងក្របខណ្ឌនៃការផ្លាស់ប្ដូរបទពិសោធទៅលើការងារពាក់ព័ន្ធនឹងការគ្រប់គ្រងសន្តិសុខ សណ្តាប់ធ្នាប់សាធារណៈ និងសុវត្ថិភាពសង្គម។ 

ដំណើរទស្សនកិច្ចនេះត្រូវបានក្រសួងមហាផ្ទៃចាត់ទុកថា ជាការឆ្លុះបញ្ចាំងពីឆន្ទៈដ៏មុតមាំរបស់រដ្ឋាភិបាលកម្ពុជា ដឹកនាំដោយសម្តេចធិបតី ហ៊ុន ម៉ាណែត ដែលបន្តផ្តល់សារសំខាន់ចំពោះមរតកកិច្ចសហប្រតិបត្តិការដ៏ល្អក្នុងវិស័យមហាផ្ទៃ រវាងរាជរដ្ឋាភិបាលកម្ពុជា ក្នុងនីតិកាលកន្លងទៅ ជាមួយរដ្ឋាភិបាលតួកគីយ៉េ៕