រដ្ឋមន្ត្រីមហាផ្ទៃកម្ពុជា ផ្ដើមដំណើរទស្សនកិច្ចនៅតួកគី

រដ្ឋមន្ត្រីក្រសួងមហាផ្ទៃកម្ពុជា លោកឧបនាយករដ្ឋមន្ត្រី ស សុខា បានចាប់ផ្ដើមបំពេញដំណើរទស្សនកិច្ចនៅលើទឹកដីប្រទេសតួកគីយ៉េ។ បើតាមក្រសួងមហាផ្ទៃ ដំណើរបំពេញទស្សនកិច្ចនេះ ធ្វើឡើងចាប់ពីថ្ងៃទី៩ ដល់ថ្ងៃទី១៤ ខែកុម្ភៈ ឆ្នាំ២០២៦ ដោយមានការអនុញ្ញាតពីប្រមុខរាជរដ្ឋាភិបាល សម្ដេចធិបតី ហ៊ុន ម៉ាណែត។

នៅព្រឹកថ្ងៃទី១០ ខែកុម្ភៈ ឆ្នាំ២០២៦នេះ គណៈប្រតិភូជាន់ខ្ពស់ក្រសួងមហាផ្ទៃ ដែលដឹកនាំដោយលោកឧបនាយករដ្ឋមន្ត្រី ស សុខា បានទៅដល់តួកគីយ៉េហើយ បន្ទាប់ពីការធ្វើដំណើរចាកចេញពីរាជធានីភ្នំពេញ កាលពីព្រឹកថ្ងៃទី៩ ខែកុម្ភៈ។

មន្ត្រីអមលោក ស សុខា សម្រាប់ដំណើរទស្សនកិច្ចនៅតួកគីយ៉េពេលនេះ គឺរួមមានលោក ទូច វិសាលសុខ រដ្ឋលេខាធិការក្រសួងមហាផ្ទៃ លោកស្រី សំបូរ សម្ផស្ស អនុរដ្ឋលេខាធិការក្រសួងមហាផ្ទៃ និងឧត្តមសេនីយ៍ឯក សុខ វាសនា អគ្គនាយកនៃអគ្គនាយកដ្ឋានអន្តោប្រវេសន៍ ព្រមទាំងវត្តមានមន្ត្រីជាន់ខ្ពស់ក្រសួងមហាផ្ទៃមួយចំនួនទៀត។

ក្នុងដំណើរបំពេញទស្សនកិច្ចនេះ ត្រូវបានក្រសួងមហាផ្ទៃ បញ្ជាក់ថា ធ្វើឡើងនៅក្នុងក្របខណ្ឌនៃការផ្លាស់ប្ដូរបទពិសោធទៅលើការងារពាក់ព័ន្ធនឹងការគ្រប់គ្រងសន្តិសុខ សណ្តាប់ធ្នាប់សាធារណៈ និងសុវត្ថិភាពសង្គម៕

ដោយ៖ ធឿន វ៉ាន់សុង