រដ្ឋមន្ត្រីរ៉ែ ជំរុញឱ្យម្ចាស់ស្ថានីយប្រេងឥន្ធនៈ យកចិត្តទុកដាក់លើសុវត្ថិភាព

លោក កែវ រតនៈ រដ្ឋមន្ត្រីក្រសួងរ៉ែ និងថាមពល​បានប្រាប់ឱ្យដឹងថា ក្រសួងរ៉ែ និងថាមពលនឹងបន្តផ្តល់សេវារដ្ឋបាល​ដែលមាន​ភាពងាយស្រួល និងទឹកចិត្តដល់ម្ចាស់​ស្ថានីយប្រេងឥន្ធនៈ និងឧស្ម័នទាំងអស់ យកចិត្តទុកដាក់លើការងារសុវត្ថិភាព និងចូលរួមបំពេញនីតិវិធីស្នើសុំវិញ្ញាបនបត្របញ្ជាក់បច្ចេកទេសពីក្រសួងរ៉ែ ដើម្បីធានាបានការប្រកបអាជីវកម្មដោយសុវត្ថិភាព។

លោក កែវ រតនៈ បានលើកឡើងថា៖ «បងប្អូនដែលប្រកបរបរទទួលទានផ្នែហ្គារាស់សាំង ជាលក្ខណៈ​មីក្រូ​ដែលគាត់ពិបាក ជួនកាលក្រដាសស្នាមគាត់អត់យល់ ឬមួយក៏គាត់ពិ​បាកធ្វើ​ដំណើរមក ឬមួយក៏យ៉ាងម៉េច ឬមួយក៏គាត់អស់​លុយ ហើយអស់លុយហ្នឹង អស់លុយក្រៅច្បាប់ ឬក្នុង​ច្បាប់ ខ្ញុំគិតថា នរណាក៏ចង់គោរពច្បាប់ដែរ ប៉ុន្តែមានតែប៉ុន្មានរឿង ដែល​គេមិនធ្វើ​ ឬមួយយើង​យកលុយក្រៅសេវា ដែលគេមិនចង់បង់ ឬមួយក៏បែបបទយើងស្មុគស្មាញដែលគ្នាមិនយល់ លំបាក»។

លោករដ្ឋមន្ត្រីក៏បានស្នើឱ្យមន្ត្រីក្រសួងរ៉ែ និងថាមពល ត្រូវមានឥរិយាបទទន់ភ្លន់ មើលកិច្ចការ​របស់ម្ចាស់ស្ថានីយប្រេងឥន្ធនៈ តាមនិតិវិធីរបស់គោលការណ៍ ហើយជួយសម្រួល​ ឱ្យអស់​លទ្ធភាព ធ្វើឱ្យស្ថានីយប្រេងឥន្ធនៈ និងឧស្ម័នបានបំពេញ​ស្របតាមច្បាប់៕