សេដ្ឋកិច្ច

នៅសល់ស្ថានីយប្រេងឥន្ធនៈជាង ៤០០ ទីតាំង បិទដំណើរការ ដោយសារដាច់ស្តុក

បានផុស

៤ ខែ មុន

នៅ

ថ្ងៃសៅរ៍ ១៤ មីនា ២០២៦

ដោយ

ស្ថានីយ និងដេប៉ូចែកចាយប្រេងឥន្ធនៈជាង ២០០០ ទីតាំងបានបិទប្រតិបត្តិការអាជីវកម្មនៅអំឡុងពេលសហរដ្ឋអាមេរិក-អ៊ីស្រាអែល បើកការវាយប្រហារទៅលើប្រទេសអ៊ីរ៉ង់ កាលពីដំណាច់ខែកុម្ភៈ ឆ្នាំ ២០២៦។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រសួងពាណិជ្ជកម្មរកឃើញថា មានស្ថានីយ និងដេប៉ូប្រេងឥន្ធនៈជាង ២០០០ ទីតាំងបានបានបិទ ឬផ្អាកប្រតិបត្តិការដោយមិនទាន់បានវាយតម្លៃអនុលោមភាពពីអង្គភាពមានសមត្ថកិច្ច។

ក្រោយពីក្រុមការងារចម្រុះ បានចុះត្រួតពិនិត្យ និងវាយតម្លៃជាក់ស្តែងដល់ទីតាំងនៅសល់តែស្ថានីយ និងដេប៉ូប្រេងឥន្ធនៈជាង ៤០០ ទីតាំងប៉ុណ្ណោះនៅបន្តបិទ ឬផ្អាកប្រតិបត្តិការអាជីវកម្ម ដោយសារភាពយឺតយ៉ាវ នៃការមកដល់នៃស្តុកថ្មី ហើយក្រៅពីនោះបានបើកដំណើរការឡើងវិញជាបន្តបន្ទាប់ គិតត្រឹមថ្ងៃទី ១៣ ខែមីនា ឆ្នាំ២០២៦។

ក្រសួងពាណិជ្ជកម្ម បន្តណែនាំឱ្យស្ថានីយ និងដេប៉ូប្រេងឥន្ធនៈ ចូលរួមសហការ ដោយធ្វើការជូនដំណឹងដល់ក្រសួងរ៉ែ និងថាមពល ឬក្រសួងពាណិជ្ជកម្ម និងស្ថាប័នពាក់ព័ន្ធ ដើម្បីធានាដល់ការផ្គត់ផ្គង់ប្រេងក្នុងស្រុក។

ក្រសួងពាណិជ្ជកម្ម កាលពីថ្ងៃទី ៩ ខែមីនា ឆ្នាំ ២០២៦ បានណែនាំឱ្យស្ថានីយ និងដេប៉ូចែកចាយប្រេងឥន្ធនៈនៅតាមបណ្ដារាជធានី-ខេត្ត ត្រូវលក់ប្រេងទៅតាមតម្លៃដែលបានដាក់បង្ហាញជាសាធារណៈ ដើម្បីធានានូវតម្លាភាព។

ក្រសួងពាណិជ្ជកម្ម ណែនាំឱ្យស្ថានីយ និងដេប៉ូចែកចាយប្រេងឥន្ធនៈ ត្រូវធានាសុក្រឹតភាព នៃគុណភាព និងបរិមាណប្រេងដែលត្រូវលក់ជូនអតិថិជន និងត្រូវជូនដំណឹងមុនយ៉ាងតិចមួយថ្ងៃមកមន្ទីររ៉ែ និងថាមពល ឬមន្ទីរពាណិជ្ជកម្ម និងអាជ្ញាធរពាក់ពាក់ព័ន្ធ ក្នុងករណីប្រេងឥន្ធនៈអស់ពីសន្និធិ (ស្តុក) ឬមានបំណងផ្អាកលក់ប្រេងជាបណ្ដោះអាសន្ន។

សូមជំរាបថា តម្លៃប្រេងឥន្ធនៈលក់រាយនៅតាមស្ថានីយប្រេងឥន្ធនៈអនុវត្តចាប់ពីថ្ងៃទី ១៤ ដល់ថ្ងៃទី ១៦ ក្នុងនោះតម្លៃប្រេងសាំងធម្មតា លក់រាយ ៥២០០ រៀល ក្នុងមួយលីត្រ ខណៈប្រេងម៉ាស៊ូតកើនឡើងដល់ ៦ ៤០០ រៀល ក្នុងមួយលីត្រ៕