កម្ពុជា-កូរ៉េដាក់ដំណើការជាផ្លូវការនូវសេវាចែករំលែកព័ត៌មានឥណទានឆ្លងដែន

ក្រុមហ៊ុនក្រេឌីត ប្យួរ៉ូ ខេមបូឌា (CBC) និងក្រុមហ៊ុន កូរ៉េ ក្រេឌីត ប្យួរ៉ូ (KCB) បានដាក់ដំណើការជាផ្លូវការនូវសេវាចែករំលែកព័ត៌មានឥណទានឆ្លងដែនរវាងប្រទេសទាំងពីរ ​ដែលជាការបើកផ្លូវឱ្យប្រជាពលរដ្ឋខ្មែរដែលរស់នៅប្រទេសកូរ៉េខាងត្បូង អាចទទួលបានសេវាហិរញ្ញវត្ថុដោយផ្អែកលើប្រវត្តិឥណទានរបស់ខ្លួននៅកម្ពុជា ចំណែកឯប្រជាពលរដ្ឋកូរ៉េដែលរស់នៅប្រទេសកម្ពុជា ក៏អាចស្នើសុំឥណទាននៅកម្ពុជាបានផងដែរ ដោយប្រើប្រាស់ប្រវត្តិឥណទានរបស់ខ្លួននៅប្រទេសកូរ៉េ។

ការដាក់ឱ្យដំណើការនេះត្រូវបានធ្វើឡើងកាលពីថ្ងៃទី២៤ ខែមេសា ​​ក្រោមវត្តមានរបស់ ឯកឧត្តម យឹម លាត អគ្គទេសាភិបាលរង ធនាគារជាតិនៃកម្ពុជា រួមជាមួយគណៈគ្រប់គ្រងជាន់ខ្ពស់មកពីក្រសួង ធនាគារ ស្ថាប័នហិរញ្ញវត្ថុ និងសមាគមនផងដែរ។

បើយោងតាម CBC៖«កិច្ចសហការនេះដើរតួនាទីយ៉ាងសំខាន់ក្នុងការបង្កើនលទ្ធភាពទទួលបានហិរញ្ញប្បទានសម្រាប់ប្រជាពលរដ្ឋកម្ពុជាប្រមាណជាង ៥០០០០ នាក់ ដែលកំពុងបម្រើការងារលើវិស័យនានានៅសាធារណរដ្ឋកូរ៉េ»។

CBC ថា តាមរយៈប្រព័ន្ធនេះ ប្រជាពលរដ្ឋខ្មែរដែលរស់នៅប្រទេសកូរ៉េខាងត្បូង អាចទទួលបានសេវាហិរញ្ញវត្ថុដោយផ្អែកលើប្រវត្តិឥណទានរបស់ខ្លួននៅកម្ពុជា ចំណែកឯប្រជាពលរដ្ឋកូរ៉េដែលរស់នៅប្រទេសកម្ពុជា ក៏អាចស្នើសុំឥណទាននៅកម្ពុជាបានផងដែរ ដោយប្រើប្រាស់ប្រវត្តិឥណទានរបស់ខ្លួននៅប្រទេសកូរ៉េ។

លោក យឹម លាត ​បានថ្លែងថា ពិធីដាក់ឱ្យប្រើប្រាស់ជាផ្លូវការនូវសេវាចែករំលែកព័ត៌មានឥណទានទ្វេភាគីនេះ មានគោលបំណងសម្រួលដល់គ្រឹះស្ថានធនាគារនិងហិរញ្ញវត្ថុក្នុងការទទួលបានរបាយការណ៍ឥណទានរបស់អតិថិជនពីប្រទេសដើមកំណើតរបស់ខ្លួនយ៉ាងឆាប់រហ័ស និងងាយស្រួលជាងមុន ក្រោមកិច្ចសហការរវាង ក្រុមហ៊ុន ក្រេឌីត ប្យួរ៉ូ (ខេមបូឌា) ខូ អិលធីឌី (CBC) និង ក្រុមហ៊ុន កូរ៉េ ក្រេឌីត ប្យួរ៉ូ ខូ អិលធីឌី។

លោកថា ក្នុងក្របខ័ណ្ឌនៃកិច្ចសហប្រតិបត្តិការនេះ គ្រឹះស្ថានធនាគារនិងហិរញ្ញវត្ថុនឹងមានលទ្ធភាពសិក្សាកាន់តែមានប្រសិទ្ធភាពលើកម្រិតហានិភ័យរបស់អតិថិជន រួមទាំងប្រជាជនកម្ពុជាធ្វើការនៅប្រទេសកូរ៉េ និងអ្នកជំនួញកូរ៉េនៅប្រទេសកម្ពុជា មានលទ្ធភាពក្នុងការទទួលបានកម្ចីផ្លូវការ និងបំពេញតម្រូវការហិរញ្ញវត្ថុ។

ក្នុងឆ្នាំ ២០២៤ ទំហំពាណិជ្ជកម្មទ្វេភាគី កម្ពុជា-​​កូរ៉េ សម្រេចបាន ៧៦២លានដុល្លារអាម៉េរិក​កើនឡើង១១,៤៩ភាគរយ ធៀបនឹងឆ្នាំ២០២៣។  ក្នុងនោះ ការនាំចេញរបស់កម្ពុជាសម្រេចបាន ២៨៨លានដុល្លារ កើន​ឡើង ១៣,៧៧ភាគរយ។នេះបើយោងតាមរបាយការណ៍​របស់ក្រសួង​ពាណិជ្ជកម្ម៕