ARDB អំពាវនាវឱ្យឈ្មួញប្រមូលទិញដំឡូងមី និង​ពោតក្រហមពីកសិករ នៅចំពេលថៃបិទព្រំដែន

ធនាគារអភិវឌ្ឍន៍ជនបទ និងកសិកម្ម (ARDB) បានអំពាវនាវឱ្យឈ្មួញប្រមូលទិញដំឡូងមី និងពោតក្រហម ពីកសិករ ខណៈធនាគារ ARDB បន្តគាំទ្រផ្នែកឥណទាន។

លោកបណ្ឌិត កៅ ថាច ប្រតិភូរាជរដ្ឋាភិបាលទទួលបន្ទុកជាអគ្គនាយកនៃធនាគារអភិវឌ្ឍន៍ជនបទ និងកសិកម្ម បានលើកឡើងនៅក្នុងពិធីសំណេះសំណាលជាមួយកសិករ ឈ្មួញ អំពីបញ្ហាប្រឈមទីផ្សារដំឡូងមី និងពោតក្រហម នៅថ្ងៃទី ២៥ ខែមិថុនា ឆ្នាំ ២០២៥។

លោកបណ្ឌិត កៅ ថាច បានអំពាវនាវដល់ពាណិជ្ជករ និងឈ្មួញបន្តប្រមូលទិញដំឡូមីពីបងប្អូនកសិករ ហើយធនាគារ ARDB បន្តគាំទ្រផ្នែកឥណទាន។ ដើម្បីដោះស្រាយកង្វល់កង្វះទ្រព្យធានាបំណុលដោយបានប្រើប្រាស់ជាមួយគ្រឹះស្ថានធនាគារឯកជនអស់ហើយនោះ, លោកបណ្ឌិតបានផ្តល់ជាជម្រើសដំណោះស្រាយតាមរយៈ ទី១.យន្តការ កិច្ចសន្យាត្រីភាគីលើប្រតិបត្តការទិញលក់ដំឡូងមី-ពោត (ឈ្មូញប្រមូលទិញ-ក្រុមហ៊ុននាំចេញ-ធនាគារ ARDB) ហើយលំហូរសាច់ប្រាក់ទូទាត់លើការប្រមូលទិញដំឡូងមី-ពោត ត្រូវធ្វើឡើងតាមរយ: ARDB Mobile App។

កិច្ចសន្យាទិញលក់រវាងក្រុមហ៊ុននាំចេញ និងពាណិជ្ជករប្រមូលទិញដំឡូមី-ពោត ជាយន្តការជួយសម្រួលបន្ទុកដល់ពាណិជ្ជករ និងឈ្មួញប្រមូលទិញមិនមានទ្រព្យធានាបំណុល ក្នុងការទទួលបានឥណទានពី ធនាគារ ARDB។

ទី២ យន្តការយកសន្និធិដំឡូង និងពោតក្រហមស្ងួតដើម្បីធ្វើជាទ្រព្យធានាឥណទាន (ទំហំឥណទាន ៧០% នៃតម្លៃសន្និធិ) ដោយតម្រូវឱ្យមានកិច្ចសន្យាទិញ-លក់ច្បាស់លាស់ជាមួយក្រុមហ៊ុននាំចេញ និងឬក្រុមហ៊ុនកែច្នៃ។

កសិករដាំដំឡូងមី នៅខេត្តឧត្តរមានជ័យបានប្រាប់ឱ្យដឹងថា ការបិទព្រំដែនរបស់ភាគីថៃ​បច្ចុប្បន្នមិនទាន់មាន​ផលប៉ះ​ពាល់​​​ទៅ​លើវិស័យដំឡូងមី​នៅ​កម្ពុជា​​នោះ​ទេ ដោយសារមិនមែនជារដូវប្រមូលផលច្រើន ខណៈ​ថៃ​​​បានរឹតបន្តឹងគុណភាពការនាំចូលដំឡូងមីពីកម្ពុជា។

លោក អិល ឈិញ ប្រធានសមា​គមកសិករដំឡូងមីខ្មែរ ប្រាប់កម្ពុជាថ្មី នៅថ្ងៃទី ២៣ ខែមិថុនា ឆ្នាំ ២០២៥ ថា៖ «រាល់ថ្ងៃយើងមិនបារម្ភទេ ព្រោះវាមិនមែនជាខែប្រមូលផលពេញលេញ តែបើ​ការ​បិទ​នេះ វាអូសបន្លាយទៅដល់ខែ១១ ខែ១ ឬខែ២ បានយើងបារម្ភ»។

ក្នុងមួយឆ្នាំៗ ដំឡូងមីត្រូវបានផលិតដោយកសិករលើផ្ទៃដីដាំដុះប្រមាណជាង ៨៤ ម៉ឺនហិកតា (ទិន្នផលស្រស់ប្រមាណ ១៥ លានតោន) ជាមួយផលសេដ្ឋកិច្ចប្រមាណណ ១,២៥៥ លានដុល្លារ គិតត្រឹមឆ្នាំ២០២៤ និងពោតក្រហមប្រមាណជាង ២៨ ម៉ឺនហិកតា (ទិន្នផលស្រស់ប្រមាណ ១ លានតោន) ជាមួយផលសេដ្ឋកិច្ចប្រមាណជាង ២00 លានដុល្លារ។

​ដំឡូងមីត្រូវ​បាន​ដាំ​ដុះនាដើមរដូវចាប់ពីខែមីនា និង​ប្រមូល​ផល​ជាបន្តបន្ទាប់ចាប់ពីខែកក្កដា ជា​រៀង​រាល់​ឆ្នាំ​។ ដោយឡែក ពោតក្រហមត្រូវបានដាំដុះចាប់ពីខែមេសា ជាបន្តបន្ទាប់ និងប្រមូលផលចាប់ពីខែកក្កដា៕