វៀតណាម និងចិន​ ជំរុញកិច្ចសហប្រតិបត្តិការសាងសង់ផ្លូវរថភ្លើង

គណៈប្រតិភូវៀតណាមបានចូលរួមក្នុងកិច្ចប្រជុំ​គណៈកម្មាធិការសហប្រតិបត្តិការផ្លូវដែករួមវៀតណាម-ចិននៅទីក្រុងប៉េកាំង​ នៅថ្ងៃទី ២៣-២៤ ខែកញ្ញា ​ដោយ​កិច្ចប្រជុំនេះមានគោលបំណង​ជំរុញកិច្ចសហប្រតិបត្តិការលើ​គម្រោងផ្លូវដែកសំខាន់ៗរវាងប្រទេសទាំង២។ នេះបើតាមការចុះផ្សាយរបស់កាសែត Viet Nam News កាលពីថ្ងៃពុធ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងនោះ ភាគីទាំង២ បាន​ពិភាក្សា​គ្នា​ផ្តោតលើការអនុវត្តន៍កិច្ចព្រមព្រៀងមុនៗ រួមទាំងកិច្ចព្រមព្រៀងដែលបានចុះហត្ថលេខាក្នុងខែធ្នូ ឆ្នាំ ២០២៤ ស្តីពីកិច្ចសហប្រតិបត្តិការផ្លូវ​រថភ្លើងខ្នាតស្តង់ដារ និងអនុស្សរណៈខែមេសា ឆ្នាំ ២០២៥ ដើម្បីបង្កើតគណៈកម្មាធិការរួម។ ភាគីទាំង២​បានសង្កត់ធ្ងន់លើការធ្វើឱ្យប្រសើរឡើងនូវការតភ្ជាប់ផ្លូវ​រថភ្លើង​ឆ្លងកាត់ព្រំដែន ដែលជាផ្នែកមួយនៃភាពជាដៃគូ​ប្រកបដោយ​ការរីកចម្រើន។

អនុរដ្ឋមន្ត្រីក្រសួងសំណង់វៀតណាម​ លោក Nguyễn Danh Huy ដែល​ចូលរួមកិច្ចប្រជុំផងដែរនោះ បាន​ថ្លែងថា កិច្ចសហប្រតិបត្តិការផ្លូវដែកនាពេលនេះ គឺជានិមិត្តរូបនៃទំនាក់ទំនងដ៏រឹងមាំរវាងវៀតណាម និងចិន ចំពេលដែល​វៀតណាម​ជំរុញ​ការអភិវឌ្ឍផ្លូវរថភ្លើង ដើម្បីបង្កើនប្រព័ន្ធដឹកជញ្ជូនក្នុងស្រុក និងសេដ្ឋកិច្ចរបស់ប្រទេស។

ក្នុងកិច្ចប្រជុំដដែល ចិន​ និងវៀតណាម​បានពិនិត្យមើលវឌ្ឍនភាពលើគម្រោងផ្លូវដែក​​ដែល​តភ្ជាប់ពីក្រុងជាប់ព្រំដែនចិន Lào Cai ទៅក្រុងហាណូយ បន្តឆ្ពោះទៅក្រុងកំពង់ផែ ហៃ ផុង ហើយ​បាន​ពិភាក្សាគ្នា​អំពីជំហានសំខាន់ៗដូចជាការរចនាបច្ចេកទេស ផែនការហិរញ្ញវត្ថុ និងការសិក្សាលទ្ធភាព។ ​ភាគីទាំង២ ក៏បានយល់ព្រមចាប់ផ្តើមរៀបចំផែនការផ្លូវ​រថភ្លើង​ដែលតភ្ជាប់ក្រុង​ជាប់ព្រំដែនចិន​ ២ ទៀត គឺគម្រោង​ Đồng Đăng-Hà Nội និងគម្រោង​ Móng Cái-Hạ Long-Hải Phòng៕