ព្រះអើយ! គ្មានឈើបូជា សាច់ញាតិជនរងគ្រោះដោយសារកូវីដ បោះសពចូលទន្លេគង្គា អណ្តែតត្រៀបត្រា

ប្រព័ន្ធផ្សព្វផ្សាយបានរាយការណ៍ថា សាកសពប្រហែល១០០នាក់ ត្រូវបានគេឃើញអណ្តែតពេញទន្លេគង្គា ហើយស្ថានភាពសពទាំងនោះបានបង្ហាញថា ពួកគេប្រហែលជាស្ថិតនៅក្នុងទឹកទន្លេអស់រយៈពេលជាច្រើនថ្ងៃមកហើយ។

ការរកឃើញនៅជិតព្រំដែនរដ្ឋ Bihar និង Uttar Pradesh នេះ ត្រូវបានបញ្ជាក់ប្រាប់ BBC កាលពីថ្ងៃចន្ទ។

ទោះបីជាយ៉ាងណាក៏ដោយ គេមិនទាន់ដឹងច្បាស់ទេថាតើសាកសពទាំងនោះទៅដល់ទីនោះដោយរបៀបណា ប៉ុន្តែរបាយការណ៍ប្រព័ន្ធផ្សព្វផ្សាយក្នុងស្រុកបានបង្ហាញថា ពួកគេអាចជាជនរងគ្រោះដោយសារជំងឺកូវីដ-១៩។

ក្រុមមន្រ្តីបាននិយាយថា សពទាំងនោះ មានសភាពហើមនិងរលាកផ្នែកខ្លះ ហើយប្រហែលជាពួកគេត្រូវបានបោះចូលទន្លេ ដែលជាផ្នែកមួយនៃការធ្វើពិធីបូជាសពជនរងគ្រោះក្នុងរដ្ឋ Uttar Pradesh។

ប្រជាពលរដ្ឋនិងអ្នកសារព័ត៌មានក្នុងស្រុកមួយចំនួនបានប្រាប់ BBC ថា កង្វះខាតឈើសម្រាប់ការបូជា និងការឡើងថ្លៃនៃការរៀបចំពិធីបុណ្យសព បានធ្វើឲ្យក្រុមគ្រួសារមួយចំនួនគ្មានជម្រើសអ្វីក្រៅពីការបោះសពចូលទៅក្នុងទន្លេ៕

ប្រែសម្រួលដោយ៖ Vann Vann

ប្រភព៖ BBC

ចុចអាន៖ ខឹងព្យាបាលអ្នកជំងឺកូវីដអស់ថ្លៃពេក មេបក្សឥណ្ឌា វាយអ្នកគ្រប់គ្រងមន្ទីរពេទ្យ ផ្អើលគេឯង