វីរុសបំប្លែងខ្លួនឥណ្ឌា វាយលុកកាន់តែខ្លាំងនៅអង់គ្លេស រកឃើញអ្នកឆ្លងជិត ៣ពាន់ករណីហើយ

រដ្ឋមន្ត្រីក្រសួងសុខាភិបាលអង់គ្លេស បានប្រាប់សមាជិកសភាថា បច្ចុប្បន្ននេះមានករណីនៃវីរុសកូវីដ-១៩បំប្លែងខ្លួនឥណ្ឌាជិត ៣,០០០ ករណីហើយ នៅក្នុងចក្រភពអង់គ្លេស។

លោក Matt Hancock បាននិយាយថា បច្ចុប្បន្ន ករណីនៃវីរុសបំប្លែងខ្លួននេះ ចំនួន ២,៩៦៧ ករណី ត្រូវបានកត់ត្រា។

ស្របពេលជាមួយគ្នានោះ យុទ្ធនាការធ្វើតេស្តនិងចាក់វ៉ាក់សាំង នឹងត្រូវធ្វើឡើងក្នុងល្បឿនដ៏លឿនមួយនៅទីក្រុង Bedford, Burnley, Hounslow, Kirklees, Leicester និង North Tyneside ។

លោករដ្ឋមន្ត្រី បានប្រាប់សមាជិកសភាថា នៅទីក្រុង Bolton និង Blackburn ដែលជាកន្លែងវីរុសបំប្លែងខ្លួនភាគច្រើនត្រូវបានគេកត់ត្រា, ការចាក់វ៉ាក់សាំងដល់ប្រជាជន២៦,០៩៤នាក់និងការធ្វើតេស្តលើមនុស្ស៧៥,០០០នាក់បន្ថែមទៀត ត្រូវបានធ្វើឡើងកាលពីសប្តាហ៍មុន។

ការរីករាលដាលនៃវីរុសបំប្លែងខ្លួនឥណ្ឌា បានបង្កឲ្យមានការភ័យខ្លាចថា ផែនការរបស់ប្រទេសអង់គ្លេស ក្នុងការចាកចេញពីវិធានការរឹតត្បិតជំងឺកូវីដ-១៩ អាចត្រូវបានពន្យារពេល។

ថ្លែងនៅក្នុងសន្និសីទសារព័ត៌មាន Downing Street លោករដ្ឋមន្ត្រីបាននិយាយថា ភ័ស្តុតាងដំបូងបង្ហាញថា វីរុសបំប្លែងខ្លួននេះគឺអាចចម្លងខ្លាំងជាងវីរុសដទៃទៀត។

ក្រុមអ្នកវិទ្យាសាស្រ្តអង់គ្លេសបានទទួលស្គាល់ថា វីរុសកូវីដ-១៩បំប្លែងខ្លួនឥណ្ឌា មានលទ្ធភាពចម្លងខ្លាំងជាងវីរុសបំប្លែងខ្លួនអង់គ្លេស Kent ទៅទៀត។

ក្រុមអ្នកវិទ្យាសាស្រ្តអំពីជំងឺរាតត្បាតហៅកាត់ SPI-M បាននិយាយថា ពួកគេមានទំនុកចិត្តថា មេរោគប្រភេទ B.1.617.2 គឺងាយឆ្លងជាងវីរុសបំប្លែងផ្សេងៗនាពេលបច្ចុប្បន្នទៅទៀត ហើយវាអាចឆ្លងខ្លាំងជាងវីរុសទាំងនោះបានយ៉ាងងាយដល់ទៅ ៥០ភាគរយឯណោះ។

វីរុសបំប្លែងខ្លួនអង់គ្លេស Kent ត្រូវបានគេដឹងថា ឆ្លងខ្លាំងជាងកូវីដ-១៩ទម្រង់ដើមរហូតដល់ទៅ៧០ភាគរយ ដូចនេះបើតាមការគណនាទៅ វីរុសបំប្លែងខ្លួនឥណ្ឌា អាចឆ្លងសាហាវជាងកូវីដធម្មតា រហូតដល់ទៅ១២០ភាគរយឯណោះ៕

ប្រែសម្រួលដោយ៖ Vann Vann

ប្រភព៖ Sky

ចុចអាន៖ បារម្ភខ្លាំង! វីរុសបំប្លែងខ្លួនឥណ្ឌា ឆ្លងសាហាវជាងកូវីដ-១៩ទម្រង់ដើម ដល់ទៅ១២០ភាគរយឯណោះ