បារម្ភខ្លាំង! វីរុសបំប្លែងខ្លួនឥណ្ឌា ឆ្លងសាហាវជាងកូវីដ-១៩ទម្រង់ដើម ដល់ទៅ១២០ភាគរយឯណោះ

ក្រុមអ្នកវិទ្យាសាស្រ្តអង់គ្លេសបានទទួលស្គាល់ថា វីរុសកូវីដ-១៩បំប្លែងខ្លួនឥណ្ឌា មានលទ្ធភាពចម្លងខ្លាំងជាងវីរុសបំប្លែងខ្លួនអង់គ្លេស Kent ទៅទៀត។

ក្រុមអ្នកវិទ្យាសាស្រ្តអំពីជំងឺរាតត្បាតហៅកាត់ SPI-M បាននិយាយថា ពួកគេមានទំនុកចិត្តថា មេរោគប្រភេទ B.1.617.2 គឺងាយឆ្លងជាងវីរុសបំប្លែងផ្សេងៗនាពេលបច្ចុប្បន្នទៅទៀត ហើយវាអាចឆ្លងខ្លាំងជាងវីរុសទាំងនោះបានយ៉ាងងាយដល់ទៅ ៥០ភាគរយឯណោះ។

វីរុសបំប្លែងខ្លួនអង់គ្លេស Kent ត្រូវបានគេដឹងថា ឆ្លងខ្លាំងជាងកូវីដ-១៩ទម្រង់ដើមរហូតដល់ទៅ៧០ភាគរយ ដូចនេះបើតាមការគណនាទៅ វីរុសបំប្លែងខ្លួនឥណ្ឌា អាចឆ្លងសាហាវជាងកូវីដធម្មតា រហូតដល់ទៅ១២០ភាគរយឯណោះ។

ក្រុមប្រឹក្សាវិទ្យាសាស្ត្រទទួលបន្ទុកគ្រាអាសន្នអង់គ្លេសហៅកាត់ SAGE បានចេញការព្រមានខ្លាំងៗថា រយៈពេលប៉ុន្មានខែខាងមុខទៀត វីរុសកូវីដបំប្លែងខ្លួនឥណ្ឌា អាចបណ្តាលឲ្យមនុស្ស ១ម៉ឺននាក់ចូលព្យាបាលក្នុងមន្ទីរពេទ្យក្នុងមួយថ្ងៃ។

អ្នកវិទ្យាសាស្ត្ររបស់រដ្ឋាភិបាលក៏បានលើកឡើងផងដែរថា វាអាចបណ្តាលឲ្យមានមនុស្សស្លាប់រាប់ពាន់នាក់ក្នុងមួយថ្ងៃ នៅត្រឹមរដូវក្តៅ។

ទោះបីជាយ៉ាងណាក៏ដោយ អ្នកវិទ្យាសាស្ត្ររបស់រដ្ឋាភិបាលបាននិយាយថា ពួកគេជឿជាក់ថា វីរុសនេះមិនមានគ្រោះថ្នាក់ខ្លាំងទេ ហើយវ៉ាក់សាំងទំនងជាមានប្រសិទ្ធភាពប្រឆាំងនឹងវា៕

ប្រែសម្រួលដោយ៖ Vann Vann

ប្រភព៖ Daily Mail

ចុចអាន៖ អង់គ្លេសព្រមានខ្លាំងៗ មួយថ្ងៃ វីរុសបំប្លែងខ្លួនឥណ្ឌា អាចសម្លាប់មនុស្សរាប់ពាន់នាក់