ណុប បាយ៉ារិទ្ធ សាទរចំពោះលទ្ធផលនៃកិច្ចខិតខំថ្នាក់ដឹកនាំកម្ពុជា ដែលធ្វើឱ្យស្ថានការណ៍ព្រំដែនឈានមួយជំហាន ប្រកបដោយភាពច្បាស់លាស់ជាងមុន

តារាចម្រៀងចាស់វស្សារបស់ផលិតកម្មហង្សមាស លោក ណុប បាយ៉ារិទ្ធ បានបង្ហាញអារម្មណ៍រំភើប និងសប្បាយចិត្តខ្លាំង បន្ទាប់ពីឃើញព័ត៌មានពាក់ព័ន្ធនឹងការដោះស្រាយបញ្ហាព្រំដែនកម្ពុជា-ថៃ ពិសេសនៅភូមិព្រៃចាន់ និងភូមិជោគជ័យក្នុងឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ។

ការបង្ហាញអារម្មណ៍សប្បាយចិត្តរបស់លោក ណុប បាយ៉ារិទ្ធ គឺស្របពេលដែលសម្ដេចមហាបវរធិបតី បានសារពិសេសពាក់ព័ន្ធនឹងការដោះស្រាយបញ្ហាព្រំដែន ជាពិសេសនៅភូមិព្រៃចាន់ និងភូមិជោគជ័យ ក្នុងឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ ព្រោះស្ថានការណ៍បានបោះមួយជំហានទៅមុខប្រកបដោយភាពច្បាស់លាស់ជាងពេលមុន ដោយភាគីទាំងពីរ អាចយកគោលការណ៍ច្បាប់មកជជែកគ្នា ដើម្បីរកដំណោះស្រាយមួយដោយសន្តិវិធី។

តារាចម្រៀងភ្នែកតឹងលោក ណុប បាយ៉ារិទ្ធ បានឱ្យដឹងថា “កម្ពុជាខ្ញុំអើយឃើញព័ត៌មានហើយធូរទ្រូងបន្តិច កម្ពុជាស្ងាត់តែមិនស្ងៀម ធ្វើច្បាស់លាស់លទ្ធផលច្បាស់។ សង្ឃឹមថា បងប្អូនប្រជាពលរដ្ឋអ្នកភូមិព្រៃចាន់ ឃុំអូរ៣ជាន់ ខេត្តបន្ទាយមានជ័យ ជៀសផុតពីការឈ្លានពានបំពានទៀត”។

តារាចម្រៀងប្រុសលោក ណុប បាយ៉ារិទ្ធ បានបន្ថែមថា ជូនពរដល់បងប្អូនទទួលបាននៅសេចក្តីសុខសុវត្ថិភាពគ្មានការរំខានមកបៀតបៀនទៀត។ ដោយឡែក តារាសម្តែងទឹកភ្នែកកញ្ញា នី មុន្នី្ននាថ ម្សិលមិញនេះ ក៏បានសម្តែងអារម្មណ៍រំភើបរីករាយជាខ្លាំង បន្ទាប់ពីបានអានពិសេសរបស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ពាក់ព័ន្ធនឹងការដោះស្រាយបញ្ហាព្រំដែនកម្ពុជា-ថៃ៕ ចាន់រ៉ា