ណុប បាយ៉ារិទ្ធ ប្រកាសឱ្យប្រុងប្រយ័ត្ន ក្រោយមានជនខិលខូចបង្កើតតេឡេក្រាមដាក់ឈ្មោះខ្លួន ដើម្បីសុំជំនួយ

លោក ណុប បាយ៉ារិទ្ធ បានចេញសារអំពាវនាវ និងប្រកាសប្រាប់ដល់អ្នកគាំទ្រ ព្រមទាំងសិល្បករសិល្បការិនីឱ្យមានការប្រុងប្រយ័ត្ន ខណ:ដែលថ្មីៗនេះ មានជនឆ្លៀតឱកាសបានយកឈ្មោះរបស់លោកទៅបង្កើតតេឡេក្រាម ដើម្បីសុំជំនួយពីសប្បុរសជន។

តារាចម្រៀងកូនកាត់ចិន លោក ណុប បាយ៉ារិទ្ធ បានឱ្យដឹងថា ថ្មីៗនេះមានជនខិលខូច បង្កើតតេឡេក្រាមដាក់ឈ្មោះលោកដើម្បីសុំជំនួយពីបងប្អូន។ ដូច្នេះលោកសូមបញ្ជាក់ថា លោកគឺមិនបានប្រើប្រាស់តេឡេក្រាម ដើម្បីធ្វើការសូមជំនួយទេរាល់បញ្ហារបោកប្រាសណា មួយតាមតេឡេក្រាមខ្ញុំមិនទទួលខុសត្រូវឡើយ។

លោក ណុប បាយ៉ារិទ្ធ បន្តទៀតថា “រាល់ជំនួយសប្បុរសធម៌ ខ្ញុំប្រកាសស្វែងរកការចូលរួមពីបងប្អូនតិចក្តី ច្រើនក្តីតែក្នុង Facebook អាខោននិងផេកខ្ញុំប៉ុណ្ណោះ។ រឿងតេឡេក្រាមមួយ គឺអត់មានសូមប្រយ័ត្នចាញ់បោកជនឆបោកឆ្លៀតឱកាសមុននឹងសម្រេចចិត្តបាញ់លុយតាមតេឡេក្រាម ចូលរួមជាមួយគេ សូមប្រុងប្រយ័ត្នពួកឆបោកអស់នោះ គេមិនស្គាល់បុណ្យបាបអីទេ ស្រុកមានសង្គ្រាមអ៊ីចឹងហើយនៅឆ្លៀតដើរបោកប្រាសគេ ពួកពិតជាថោកទាបណាស់”។

សូមជម្រាបដែរថា តារាចម្រៀងប្រុសលោក ណុប បាយ៉ារិទ្ធ ក៏ត្រូវបានគេចាត់ទុកថាជាសិល្បករខ្មែរមួយរូបដែលបានបង្កើតមូលនិធិសប្បុរសធម៌ប្រមូលថវិកាពីសប្បុរសជនដើម្បីរៀបចំជាស្បៀងសម្ភារៈសម្រាប់ជួយដល់វីរកងទ័ពជួរមុខនិងបងប្អូនជនភៀសសឹកនៅតាមបន្ទាត់ព្រំដែនដែលកំពុងរងការឈ្លានពានពីសំណាក់កងទ័ពចោរសៀមផងដែរ៕ ដោយ ៖ ចាន់រ៉ា