ក្លាយជាឧកញ៉ា កំពូលតារាចម្រៀងព្រាប សុវត្ថិ បន្តអាជីពច្រៀងឬឈប់?

កំពូលតារាចម្រៀងមានងារជាឧកញ៉ាលោក ព្រាប សុវត្ថិ ថ្មីៗនេះបានចេញមុខស្រាយចម្ងល់ ដើម្បីឆ្លើយតបសំនួរនិងបញ្ជាក់ច្បាស់ៗនូវមន្ទិលរបស់អ្នកគាំទ្រ ក៏ដូចមហាជនដែលសួរថាតើលោកនៅបន្តអាជីពច្រៀងឬឈប់ ក្រោយក្លាយជាឧកញ៉ានិងមានមុខជំនួញក្តាប់ពេញដៃ?។

ជាការពិតណាស់កាលពីថ្មីៗកន្លងទៅ ស្របពេលដំណឹងនៃការឡើងងារជាឧកញ៉ារបស់តារាចម្រៀងលំដាប់កំពូលលោក ព្រាប សុវត្ថិ បានធ្វើឲ្យអ្នកគាំទ្រនិងមិត្តភក្តិសិល្ប:រួមអាជីពជាច្រើន បានបង្ហាញការចាប់អារម្មណ៍ ហើយព្រមទាំងសម្តែងការចូលរួមអបអរគ្រប់គ្នា ខណ:មានអ្នកគាំទ្រខ្លះទៀតក៏បានសូមណោមពរកុំឲ្យលោកឈប់ពីអាជីពមួយនេះផងដែរ។

ឆ្លើយតបនិងមន្ទិលនេះឧកញ៉ាព្រាប សុវត្ថិ បានថ្លែងប្រាប់អ្នកសារព័ត៌មានក្នុងឱកាសសន្និសីទសារកាសែតកាលពីថ្មីៗកន្លងទៅដោយបានប្រកាសពីជំហររបស់ខ្លួន លោកនៅតែបន្តអាជីពចម្រៀងដដែលព្រោះអាជីពនេះទើបលោកអាច​ឈាន​ជើង​មកដល់ពេលនេះ។

​ឧកញ៉ាគូសបញ្ជាក់ទៀតថា «សព្វថ្ងៃអាជីពខ្ញុំជាអ្នកចម្រៀង។ ខ្ញុំមិនទៅណាទេព្រោះ​ខ្ញុំនៅច្រៀងបានហើយខ្ញុំពេញចិត្តនូវអ្វីដែលខ្ញុំមាន»។

តារាចម្រៀង ព្រាប សុវត្ថិ បន្ទាប់ពីជោគជ័យលើការងារសិល្បៈលោកបានសាងកេរ្តិ៍ឈ្មោះ ល្បីល្បាញខ្លាំង ប៉ុន្មានឆ្នាំចុងក្រោយនេះលោកក៏បានងាកមកចាប់ជំនួញថ្មីមួយទៀត គឺលើវិស័យអចលនទ្រព្យ ដោយបានធ្វើការអភិវឌ្ឍន៍ជាផ្ទះនិងដីឡូតិ៍ជាដើម។

ឧកញ៉ា ព្រាប សុវត្ថិ បច្ចុប្បន្នគឺជាតារាចម្រៀងប្រ ចាំក្នុងផលិតកម្មGalaxy Navatra ដែល​បាន​ក្លាយជាអ្នកចម្រៀងបុរសលំដាប់លេខមួយប្រចាំ​ប្រទេសអស់រយៈពេលជិត ៣ ទសវត្សមកហើយ ដោយមិនទាន់មានតារាប្រុសរូបណាអាច​បំបែក​កំណត់ត្រានេះបាន​នៅ​ឡើយ​ទេ៕

អត្ថបទ៖ ចាន់រ៉ា