អតីតស្វាមី សាន់ឆាយ ឈ្លោះគ្នាបែកផ្សែងជាមួយនាង រឿងពូកគេង

ទោះជាលែងលះគ្នាយូរឆ្នាំ និងមានស្វាមីថ្មីក៏ពិតមែន ប៉ុន្តែ សាន់ឆាយ នៅតែជាប់ពាក់ព័ន្ធរឿងអាស្រូវជាមួយអតីតស្វាមីជាហូរហែ រហូតពេលនេះអ្នកទាំងពីរមានរឿងឈ្លោះប្រកែកគ្នាកណ្ដាលទីសាធារណៈ ផ្អើលទស្សនិកជនសារជាថ្មី។

ប៉ុន្មានថ្ងៃមកនេះ រឿងរ៉ាវជម្លោះរវាង តារាស្រីតៃវ៉ាន់ Barbie Hsu (សាន់ឆាយ) និងអតីតស្វាមីជាអ្នកជំនួញចិនលោក Wang Xiaofei កំពុងទាក់ទាញមហាជនជាខ្លាំង ដោយសារ សាន់ឆាយ រៀបការស្វាមីទី២ ជិតមួយឆ្នាំទៅហើយ ស្រាប់តែអតីតស្វាមី បានចេញមុខមកចោទប្រកាន់នាងថាបានកេងប្រវ័ញ្ចកម្លាំងញើសឈាមរបស់លោក។

ជាក់ស្តែង អាជីវកររូបនេះ បានចែករំលែកថា សាន់ឆាយ និងស្វាមីថ្មី ឌីជេ គូ កំពុងស្នាក់នៅផ្ទះដែលខ្លួនបានទិញ និងប្រើប្រាស់គ្រឿងសង្ហារិមដែលជាកម្មសិទ្ធិរបស់លោក លោកថែមទាំងបង្ខំឱ្យរើរបស់របរទាំងអស់ចេញពីផ្ទះ សូម្បីតែពូកគេង ក៏មិនឱ្យទុកដាច់ខាត។

ឆ្លើយតបនឹងការចោទប្រកាន់របស់អតីតស្វាមី និងការទាមទារយ៉ាងទទូច សាន់ឆាយ បានសម្រេចចិត្តប្រគល់ពូក ទៅឱ្យអតីតស្វាមីវិញភ្លាមៗ។ ប៉ុន្តែ​មហាជនពិតជា​ភ្ញាក់​ផ្អើលមិនធម្មតា គឺនៅ​ពេលលោក Wang Xiaofei ទទួលបានពួកហើយ លោកបែរជាសម្រេច​ចិត្ត​កាត់​ពូក​ជាចម្រៀកៗចោលខ្ទេច នៅ​ចំពោះ​មុខអ្នក​សារព័ត៌មាន និង​ប្រព័ន្ធ​ផ្សព្វផ្សាយ ហើយ​បញ្ជាក់​ថា​ ពូកនោះ​ជា​របស់​ក្លែងក្លាយ ព្រោះពូកដែលលោកធ្លាប់ទិញវាមានតម្លៃដល់ទៅ ២៨ម៉ឺនដុល្លារ ប៉ុន្តែរបស់ដែលអតីតភរិយាផ្ញើឱ្យលោកមានតម្លៃត្រឹមតែ ៣,២០០ដុល្លារប៉ុណ្ណោះ។

ចំពោះរឿងនេះ សាន់ឆាយ នៅមិនទាន់ចេញមុខបកស្រាយនៅឡើយទេ ខណៈអតីតស្វាមី និងអតីតម្ដាយក្មេកបន្តហែកហួរនាងច្រើនឡើងៗ៕  

ប្រែសម្រួល៖ សន្យា

ចុចអាន៖ វិលចូលសិល្បៈវិញ សាន់ ឆាយ នៅតែរក្សាតំណែងជារាជិនីសម្រស់របស់តៃវ៉ាន់

ចុចអាន៖ និស្សិតចិនម្នាក់ ទទួលការចាប់អារម្មណ៍ខ្លាំង ដោយសារមានមុខមាត់ស្រដៀង Jisoo សឹងបេះបិទ