ប្រិយមិត្តនិយមតាមដានសិល្បៈថៃ មុខជាស្គាល់តារាសម្ដែង និងបង្ហាញម៉ូដ Janie ជាក់ជាមិនខាន។ ការប្រកាសវិលចូលពិភពកម្សាន្តវិញ និងការបង្ហាញរូបរាងស្គមស្ដើងរបស់នាងនាពេលថ្មីៗនេះ កំពុងទាក់ទាញចំណាប់អារម្មណ៍ពីទស្សនិកជនសឹងគ្រប់មជ្ឈដ្ឋាន។

អ្វីដែលប្រិយមិត្តចាប់អារម្មណ៍លើ Janie មិនត្រឹមតែរូបរាងច្រឡឹងរបស់នាងនោះទេ ប៉ុន្តែចង្កេះដ៏តូចស្ដើង ត្រឹមតែជាង ២២អ៊ីង បានធ្វើឱ្យអ្នកគាំទ្រខ្លះ ពោលចង់បានចង្កេះដ៏តូចនេះដូចជានាងផងដែរ។ យ៉ាងណាមិញ ​ទម្រាំបានចង្កេះលេខតូចប៉ុនណេះ Janie ត្រូវហាត់ប្រាណយ៉ាងខ្លាំង និងប្រុងប្រយ័ត្នចំពោះរបបអាហារខ្លាំងបំផុត។

និយាយនៅក្នុងបទសម្ភាសន៍នៅលើបណ្តាញ YouTube SEWA THAILAND កាលពីពេលថ្មីៗនេះ Janie ទម្លាយថា មុនទទួលបានរូបរាងត្រឹមតែ ៤៥គីឡូដូចបច្ចុប្បន្ន នាងត្រូវដាក់កំហិតខ្លួនឯងយ៉ាងតឹងរ៉ឹង។ ជារៀងរាល់យប់ នាងត្រូវចូលគេងនៅម៉ោង ៨ ហើយក្រោកនៅម៉ោង ៤ទៀបភ្លឺ។ ជាពិសេស នាងមិនទម្លាប់ញ៉ាំសាច់នោះទេ ពោលគឺសាច់អាំង សាច់ឆា សុទ្ធតែមិនប៉ះពាល់ ដោយភាគច្រើនញ៉ាំតែអាហារប្រភេទគ្រាប់ធញ្ញជាតិតែប៉ុណ្ណោះ ហើយជាទូទៅម៉ោងអាហារពេលល្ងាចរបស់ Janie គឺនៅម៉ោង ៥ល្ងាច។

ក្រៅពីនោះ តារាស្រីវ័យ ៤១ឆ្នាំរូបនេះ ទម្លាប់ហាត់ទៀងទាត់ណាស់។ រយៈពេល ២ឆ្នាំចុងក្រោយនេះ នាងវក់ហាត់ប្រាណរហូតស្រកបាន ១៥គីឡូ ចំណែករង្វង់ចង្កេះនៅសល់តែ ២២.៥អ៊ីងប៉ុណ្ណោះ៕

ប្រែសម្រួល៖ សន្យា

ចុចអាន៖ អ្នកលេងអ៊ីនធឺណិតស្រឡាំងកាំង ក្រោយ Janie ទម្លាយអាថ៌កំបាំងសម្រកទម្ងន់របស់នាង

ចុចអាន៖ ទម្លាយទ្រព្យសម្បត្តិរបស់ Janie ដែលខំរកដោយដៃឯង