ជីវិតកម្សាន្ដ

យឿន សូតអនុស្សាវរីយ៍ ប្រកាសចេញពី សាន់ដេ ទំនងចូលទ្រនំផលិតកម្មធំមួយ

បានផុស

៩ ខែ មុន

នៅ

ថ្ងៃសុក្រ ៣០ មិថុនា ២០២៣

ដោយ

ម្ចាស់បទ «ទីងមោង និង ឆ្នាំងណាគ្របហ្នឹង» យឿន សូតអនុស្សាវរីយ៍ ប្រកាសបញ្ចប់កុងត្រាការងារជាមួយផលិតកម្ម សាន់ដេ (SUNDAY PRODUCTION) ជាផ្លូវការហើយ នៅថ្មីៗនេះ ដោយមានមតិអ្នកគាំទ្រខ្លះថា តារាចម្រៀងប្រុសរូបនេះ អាចនឹងចូលទ្រនំសម្បូរឧកញ៉ា ខណៈមួយរយៈចុងក្រោយ ឃើញលោកស្និទ្ធស្នាលជាមួយតារាចម្រៀងប្រចាំផលិតកម្ម Galaxy Navatra ដូចជា ឧកញ៉ា ព្រាប សុវត្ថិ ,ឧកញ៉ា ខេមរៈ សិរីមន្ត និងតារាចម្រៀង ខេម ជាដើម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តារាចម្រៀង យឿន សូតអនុស្សាវរីយ៍ បានឲ្យដឹងថា លោកបានបញ្ចប់កុងត្រាការងារជាមួយផលិតកម្ម សាន់ដេ (SUNDAY PRODUCTION) ជាផ្លូវការហើយ។ រយៈពេលជាច្រើនឆ្នាំមកនេះ លោកបានរួមរស់ក្រោមដំបូលសាន់ដេ ពិតជាទទួលបានភាពកក់ក្ដៅ និងការជួយជ្រោមជ្រែងជាច្រើនរាប់មិនអស់។ លោកថា «ខ្ញុំបាទ មានថ្ងៃនេះ គឺជាគុណបំណាច់ដ៏ធំធេងមិនអាចថ្លៃបានរបស់គ្រួសារសាន់ដេ ពេលវេលាកន្លងមក ធ្វើឲ្យខ្ញុំបាទ ចងចាំមិនអាចបំភ្លេចបានក្នុងមួយជីវិតនេះ»។

តារាចម្រៀងប្រុសទើបបញ្ចប់កុងត្រាការងារជាមួយផលិតកម្ម សាន់ដេ (SUNDAY PRODUCTION) យឿន សូតអនុស្សាវរីយ៍ បានបន្ថែមថា «គ្មានការជួបជុំណាដែលមិនបែកគ្នានោះទេ ប៉ុន្តែអនុស្សាវរីយ៍ល្អៗជាច្រើនរាប់មិនអស់ បានដក់ជាប់ក្នុងក្រអៅបេះដូងខ្ញុំជានិច្ចនិរន្តរ៍»។ ជាចុងក្រោយ តារាចម្រៀងរូបនេះ ក៏បានធ្វើការអរគុណដល់អ្នកគាំទ្រទាំងអស់ ដែលបានគាំទ្រលោក តាំងពីដើមរហូតដល់បច្ចុប្បន្ន។

យ៉ាងណាមិញតាមរយៈដំណឹងនេះ ក៏មានមតិខ្លះលើកឡើងស្រដៀងៗគ្នាថា តារាចម្រៀង យឿន សូតអនុស្សាវរីយ៍ អាចនឹងផ្លាស់ចូលទ្រនំសម្បូរឧកញ៉ា គឺ ផលិតកម្ម Galaxy Navatra។ ឯខ្លះទៀតថា អាចនឹងចូលផលិតកម្ម ហង្សមាស ជាដើម។