ជីវិតកម្សាន្ដ

ដាំ សុភក្រ័ស៊ីនឌី ខាំធ្មេញ សង្កត់ផ្លូវអារម្មណ៍ ត្រៀមតំណាងកម្ពុជាប្រកួតជាអន្តរជាតិ ក្រោយជួបទុក្ខធ្ងន់

បានផុស

៣ years មុន

នៅ

ថ្ងៃចន្ទ ១៨ កញ្ញា ២០២៣

ដោយ

តារាសម្ដែង និងម៉ូដែល កញ្ញា ដាំ សុភក្រ័ស៊ីនឌី កាលពីថ្មីៗនេះ ជួបទុក្ខដ៏ក្រៀមក្រំ សោកសៅ ខណៈអ្នកម្ដាយជាទីស្រលាញ់បានទទួលមរណភាពទាំងអាល័យ។ ប៉ុន្តែតារាស្រីរូបនេះ ទោះបីនាងកំពុងមានទុក្ខធំ ក៏ខាំធ្មេញសង្កត់ផ្លូវអារម្មណ៍ ដើម្បីត្រៀមតំណាងកម្ពុជាប្រកួតជាអន្តរជាតិនាពេលឆាប់ៗ ខាងមុខនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សម្រាប់កញ្ញា ដាំ សុភក្រ័ស៊ីនឌី បានទទួលតំណែងជាកញ្ញាឯកនៅក្នុងកម្មវិធី «Miss plenet Cambodia 2023» ដែលនឹងតំណាងកម្ពុជាសម្រាប់ចូលរួមការប្រកួតលើឆាកអន្តរជាតិ។ ជាមួយគ្នានេះ បន្ទាប់ពីរៀបចំចាត់ចែងពិធីបុណ្យម្ដាយរួចរាល់ សុភក្រ័ស៊ីនឌី ក៏បានបង្ហាញការតាំងចិត្តយ៉ាងមុតមាំ ដើម្បីឈោងយកឱកាស និងភាពជោគជ័យនៅលើវិថីសិល្បៈ។

កញ្ញា ដាំ សុភក្រ័ស៊ីនឌី ថ្លែងបញ្ជាក់ថា «នាងមានកាតព្វកិច្ចធំណាស់ ព្រោះអ្វីដែលនាងកំពុងតែបំពេញគឺមិនមែនសម្រាប់ខ្លួនឯង… ទោះបីជាកំពុងតែមានធុរៈទូលទុក្ខធ្ងន់លើសព្រះធរណី តែក៏មិនទោរទន់ទៅទណ្ឌកម្មជីវិត ឬបង្អែបង្អង់យូរដែរ ត្រូវតែជម្នះ ខាំធ្មេញ សង្កត់ផ្លូវអារម្មណ៍ខ្លាំងបំផុត ព្រោះដំណើរជីវិតនៅវែងឆ្ងាយណាស់ ដើម្បីបន្តឆ្ពោះទៅមុខទៀតត្រូវតែតស៊ូ!»។

កញ្ញា ដាំ សុភក្រ័ស៊ីនឌី រៀបរាប់ទៀតថា «អរគុណសម្រាប់កម្លាំងចិត្តទាំងឡាយដែលបានមកពីអ្នកទាំងអស់គ្នា សង្ឃឹមថាពេលវេលានឹងព្យាបាលដំបៅដែលឈឺគ្មានថ្ងៃជានេះបន្តិចម្តងៗ ជាចុងក្រោយ សូមអរគុណដល់គ្រប់ស្ថាប័នទាំងអស់ដែលតែងតែយោគយល់ អធ្យាស្រ័យ អនុគ្រោះដល់នាងខ្ញុំ ដោយក្តីមេត្តា»។

កញ្ញា ដាំ សុភក្រ័ស៊ីនឌី បាននិយាយបន្ថែមថា «នាងខ្ញុំសុំផ្ញើក្តីស្រលាញ់ក្តីអាណិត ក្តីយល់ចិត្ត ទៅអ្នកទាំងអស់គ្នា ហើយសូមទទួលយកនាងខ្ញុំទុកនៅក្នុងបេះដូងផង»។

គេកត់សម្គាល់ឃើញដែរថា បន្ទាប់ពីពិធីបុណ្យអ្នកម្តាយបានបញ្ចប់ហើយ ដាំ សុភក្រ័ស៊ីនឌី និងប្អូនប្រុស ក៏បានចូលរួមកម្មវិធីសប្បុរសធម៌ចែកសម្ភារៈសិក្សា សម្លៀកបំពាក់ នំចំណី និងរបស់របរលេងផ្សេងៗ ដល់ប្អូនៗ ស្ថិតនៅភូមិរាំងទិល ខេត្តពោធិ៍សាត់ ផងដែរ៕

អត្ថបទ ៖ ចាន់រ៉ា