ឈុតដែល Janie ស្លៀកទៅមង្គលការ Mark- Kim រងមតិក្តៅគគុកថា ប្រជែងនឹងកូនក្រមុំ

តារាសម្ដែង Janie Tienphosuwan ​ត្រូវ​បាន​គេ​ចាប់អារម្មណ៍យ៉ាងខ្លាំង បន្ទាប់ពីរូបនាងស្លៀកឈុតពណ៌ផ្កាឈូកបង្អួត​រាង​ស្រឡូន​ដ៏សិចស៊ី​​ប្រៀបបាននឹង Barbie ចូលរួមអបអរក្នុងពិធី​មង្គល​ការ​របស់ Mak Prin និង Kimberly។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រៅពីការចាប់អារម្មណ៍ឈុតដ៏សិចស៊ីនោះផងដែរ​ ទស្សនិកជាច្រើនក៏ចង់ដឹងតម្លៃឈុតមួយនេះថា តើវាមានតម្លៃប៉ុន្មានដែលនាងហ៊ានចាយលើវា? ស្របពេលដែលអ្នកខ្លះរិះគន់នឹងការស្លៀកពាក់នាង ហាក់ប្រជែងយកមុខជាងកូនក្រមុំខ្លាំង។នេះបើតាមការបញ្ចាក់ពីសារព័ត៌មាន kapook។

តាមពិតទៅ សំលៀកបំពាក់របស់ Janie គឺបានមកពីម៉ាកយីហោកំពុងល្បី Pipatchara ជាម៉ាកសំលៀកបំពាក់របស់អ្នករចនាថៃ Petch Pipatchara Kaewjinda ដែលនាំមកនូវគំនិតនៃនិរន្តរភាព​លាយជាមួយនឹងម៉ូដទាន់សម័យព្រមទាំងយក​បន្ទះ​ប្លាស្ទិក​ដែល​មិន​ប្រើ​រួច​មក​ប៉ាក់​ចូល​ជាសាច់រ៉ូប។ ចំណែកឯតម្លៃ​ប្រហែល ៣០,០០០ បាតប៉ុណ្ណោះ ។

ទន្ទឹមនឹងការកោតសរសើរសម្រស់របស់អ្នកម្ដាយកូនមួយ ក្នុងនោះមានទាំងមតិក្ដៅគគុកនិងផ្ទុះការរិះគន់នាងពីសំណាក់​អ្នក​លេង​អ៊ីនធឺណិត​ថា នាងមិនគួរស្លៀកមកចូលរួមមង្គលការរបស់ Mak Prin និង Kimberly ឡើយ។ ការស្លៀកពាក់បែបនេះហាក់ប្រជែងគ្នាជាមួយឈុតកូនក្រមុំ ដែលជាថ្ងៃដ៏ពិសេសរបស់គូស្នេហ៍រង់ចាំមកជាយូរ។ គ្មាន​អ្នក​ណា​មើល​កូនក្រមុំ​ទេ ភ្ញៀវប្រាកដជាក្រឡេកមើល Janie វិញមិនខាន។

ទោះយ៉ាងណាក៏ដោយ មតិខ្លះក៏បានចេញមុខការពារនាងវិញថា ឈុតនេះមើលទៅមិនលេចធ្លោជាងកូនក្រមុំនោះទេ ហើយវាជាការល្អដែលភ្ញៀវមានបំណងស្លៀកពាក់យ៉ាងស្រស់ស្អាត មកចូលរួមក្នុងពិធីនោះ ចាត់ទុកថាជាការផ្ដល់កិត្តិយសដល់ម្ចាស់កម្មវិធី ដែលជាកូនក្រមុំ និងកូនកំលោះផងដែរ៕

ប្រែសម្រួល៖ សាង ស្រីល័ក្ខ

ចុចអាន៖ចូលរួមមង្គលការ Mark-Kim ម្ដង Janie តែងខ្លួនសិចស៊ីមួយអស់ដៃ