អាវុធហត្ថខេត្តតាកែវ ឃាត់ខ្លួនស្ត្រីម្នាក់ពាក់ព័ន្ធករណីគ្រឿងញៀន

ស្ត្រីម្នាក់ត្រូវបានកម្លាំងកងរាជអាវុធហត្ថខេត្តតាកែវ សហការណ៍ជាមួយកម្លាំងអាវុធហត្ថស្រុកគិរីវង់ ចុះឃាត់ខ្លួនករណីជាប់ពាក់ព័ន្ធគ្រឿងញៀនខុសច្បាប់។ ការឃាត់ខ្លួនស្ត្រីសង្ស័យនេះ ធ្វើឡើងកាលពីវេលាម៉ោង០២និង៥០នាទីរសៀល ថ្ងៃទី១៩ ខែកក្កដា ឆ្នាំ២០២៥ នៅភូមិពោធិ៍ ឃុំព្រះបាទជាន់ជុំ ស្រុកគិរីវង់ ខេត្តតាកែវ។

ក្នុងប្រតិបត្តិការ សមត្ថកិច្ចឃាត់ខ្លួនជនសង្ស័យឈ្មោះ ដា ពៅ ភេទស្រី អាយុ៤៥ឆ្នាំ មុខរបរមិនពិតប្រាកដរស់នៅភូមិពោធិ៍ ឃុំព្រះបាទជាន់ជុំ ស្រុកគិរីវង់ ខេត្តតាកែវ។ ចំណែក វត្ថុ តាងដកហូតវត្ថុតាងរួមមាន ជញ្ជីងថ្លឹងថ្នាំញៀនចំនួន០១ គ្រឿង ទូរស័ព្ទដៃចំនួន០៥ គ្រឿង (ខូច២) ម៉ូតូចំនួន០១ គ្រឿង អត្តសញ្ញាណប័ណ្ណសញ្ជាតិខ្មែរចំនួន០១ សន្លឹក ឯកសណ្ឋានយោធាចំនួន០១ កំផ្លេ វ៉ាលីប៉ារ៉ាចំនួន០១ សម្ភារៈវិចខ្ចប់ និងសម្ភារៈប្រើប្រាស់គ្រឿងញៀនមួយចំនួន។

បច្ចុប្បន្នស្ត្រីខាងលេី និងវត្ថុតាង ត្រូវបានការិយាល័យជំនាញកងរាជអាវុធហត្ថខេត្តកសាងសំណុំរឿង បញ្ជូនទៅអយ្យការអមសាលាដំបូងខេត្តតាកែវ ចាត់ការតាមនីតិវិធី៕

អត្ថបទ៖ វីរៈ