ជីវិតកម្សាន្ដ

លោក អុល សំអាង បារម្ភល្ខោនបាសាក់ខ្មែរបាត់បង់ទម្រង់ដើម និងកាន់តែឯកាបើគ្មានការជួយផ្សព្វផ្សាយ

បានផុស

១ year មុន

នៅ

ថ្ងៃអង្គារ ២៣ មករា ២០២៤

ដោយ

លោក អុល សំអាង ដែលជាប្រធានក្រុមល្ខោនបាសាក់រាជធានីភ្នំពេញវង់ទី១ ជាថ្មីម្តងទៀតបានបង្ហាញការព្រួយបារម្ភខ្លាំងពាក់ព័ន្ធល្ខោនបាសាក់ខ្មែរអាចបាត់បង់ទម្រង់ដើម និងកាន់តែឯកាបើសិនគ្មានការចូលរួមផ្សព្វផ្សាយឲ្យបានទូលំទូលាយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តួឯកល្ខោនបាសាក់លោក អុល សំអាង បានចេញមកស្នើដោយទទូចដល់ភាគីពាក់ព័ន្ធនិងកូនខ្មែរទាំងត្រូវរួមគ្នាលើកស្ទួយដល់វិស័យល្ខោនបាសាក់ដើម្បីជំរុញកាន់តែមានភាពល្បីល្បាញ។ ជាការពិតលោក អុល សំអាង គេកត់សម្គាល់ថា លោកតែងបានធ្វើការអំពាវនាវឲ្យមានការចូលរួមពីគ្រប់មជ្ឈដ្ឋានមហាជនខ្មែរក្នុងការរួមគ្នាផ្សព្វផ្សាយអភិរក្សនូវមរតកទម្រង់សិល្បៈល្ខោនបាសាក់ខ្មែរកុំឲ្យបាត់បង់ ឬធ្លាក់ចុះ។

លោក អុល សំអាង បានថ្លែងប្រាប់ឲ្យដឹងថា បើយើងជាកូនខ្មែរជំនាន់ថ្មី មិនអើពើ ស្ទាក់ស្ទើរ ធ្វើជាមិនដឹងមិនឮ បិតភ្នែក អូសរំលងមិននាំគ្នាជួយជ្រោងបណ្ដែតបណ្ដោយទុកចោលល្ខោនបាសាក់ ឲ្យកម្សត់ កំព្រាឯកោ កណ្ដែងកណ្ដោច ខ្លោចផ្សា សព្វថ្ងៃល្ខោនខ្លះបានក្លាយ បាត់បង់ទម្រង់ដើម ក៏ឲ្យព្រួយណាស់បាត់ក្បាច់ក្បួន ហួនល្ខោន សំនៀងច្រៀងរបៀបនិយាយរបៀបសម្ដែងរបៀបស្លៀកពាក់បែបបទផាត់មុខ។ល។

លោកនិយាយដោយស្នើដល់មហាជនថា «បងប្អូនអើយជួយផ្សព្វផ្សាយផង ផលិតល្ខោនបាសាក់ជាតិផង តាមទូរទស្សន៍នានាបើវង់ណា សម្ដែង កំប្លែង ជេរ បញ្ចោ អាសអាភាស អសីលធម៌ ឬបំពុល បំផ្លាញល្ខោនបុរាណខ្មែរសូមកុំបង្ហោះផ្សាយតាមយូធូបនាំឲ្យបាត់តម្លៃ កិត្តិយស វប្បធម៌ជាតិ បាត់សេចក្ដីថ្លៃថ្នូរជាសិល្បករល្ខោនកំប្លែងជោរ កំប្លែងជេរគ្នា យើងនាំគ្នាកែលំអរ»។

លោក អុល សំអាង បញ្ជាក់បន្ថែមថា«ខ្លាចណាស់សិល្ប:ល្ខោនខ្មែរបាត់បង់ ឬក៏ធ្លាក់ចុះអនថយតែបើល្ខោនផលិតត្រឹមត្រូវបានហើយហាក់មិនសូវជួយស៊ែរផ្សព្វផ្សាយចែករំលែកបន្ត អ្នកស៊ែនៅតែស៊ែរ អ្នកមិនស៊ែ នៅតែមិនសូវស៊ែ តើធ្វើដូចម្តេចទើបវប្បធម៌ខ្មែរកាន់តែរីកចម្រើនបានទៅ?»៕

អត្ថបទ៖ ចាន់រ៉ា