លោកគ្រូ សាំង សារឿន តួឯកល្ខោនបាសាក់ដ៏ល្បីកំពុងសង្គ្រោះបន្ទាន់នៅវៀតណាម

ទស្សនិកជនពិតជាបានស្គាល់ច្បាស់ពីតួឯកល្ខោនបាសាក់ដ៏ល្បីឈ្មោះ គឺលោកគ្រូ សាំង សារឿន ដែលពេលនេះកំពុងតែសង្គ្រោះនៅប្រទេសវៀតណាមដោយសារតែជំងឺស្ទះសរសៃឈាមបេះដូងធ្ងន់ធ្ងរ។ លោកគ្រូ សាំង សារឿន គឺជាតួសម្តែងល្ខោនបាសាក់ក្នុងក្រុមល្ខោនបាសាក់​ខេត្តកំពង់ចាមវង់​ទី​២ ។

តាមការផ្តល់ព័ត៌មានពីម្ចាស់ហ្វេសប៊ុកឈ្មោះ Nhom NabSlot​ បានបញ្ជាក់ថា បច្ចុប្បន្នលោកគ្រូ សាំង សារឿន កំពុងសម្រាកព្យាបាលនៅមន្ទីរពេទ្យមួយឯប្រទេសវៀតណាមបន្ទាប់ពីស្ថានភាពជំងឺធ្ងន់ធ្ងរក៏ត្រូវបានក្រុមគ្រួសារសម្រេចបញ្ជូនទៅសង្គ្រោះនៅទីនោះ។ ប្រភពបានលើកឡើងថា សូមទេវតាឆ្នាំថ្មី និងវត្ថុស័ក្កសិទ្ធក្នុងលោកជួយតាមថែរក្សាលោកពូ សាំង សារឿន ឲ្យឆាប់ជាសះស្បើយត្រឡប់មកដូចដើមវិញក្នុងពេលឆាប់ៗនេះផងចុះ។

ម្ចាស់គណនីហ្វេសប៊ុកខាងបានបញ្ជាក់ថា“លោកគ្រូកំពុងតែសង្គ្រោះបន្ទាន់នៅក្នុងមន្ទីរពេទ្យនៅប្រទេសវៀតណាមដោយសារជំងឺស្ទះសសៃឈាមបេះដូង លោកគ្រូគឺជាវីរ:សិល្បករជើងចាស់មួយរូប និងជាតួឯកល្ខោនបាសាក់ដ៏ឆ្នើម ដែលបងប្អូនសិល្បករ សិល្បការិនី ល្ខោនបាសាក់ទាំងអស់ពិតជាបានស្គាល់ និងដឹងពីទេពកោសល្យក្នុងការសម្ដែងរបស់លោក“។

លើសពីនេះទៀតតួឯកល្ខោនបាសាក់ដ៏ល្បីរូបនេះក៏បានលះបង់កំលាំងកាយចិត្តដើម្បីបង្ហាត់បង្រៀនសិល្ប:ល្ខោនបាសាក់ផងដែរ ដូច្នេះមហាជនអ្នកគាំទ្រ និងសិស្សគុនរបស់លោកគ្រូសង្ឃឹមថា លោកនឹងឆាប់ជាសះស្បើយវិលត្រឡប់មកវិញក្នុងពេលឆាប់ៗនេះ។

ដំណឹងខាងលើនេះដែរគេឃើញមានសិល្បករ-សិល្បការិនីព្រមទាំងមហាជនអ្នកគាំទ្របានសម្តែងក្តីព្រួយបារម្ភ និងជូនពរឲ្យលោកឆាប់ជាសះស្បើយពីជំងឺផងដែរ៕

អត្ថបទ៖ ចាន់រ៉ា