ជីវិតកម្សាន្ដ

នេន ទុំ ចេញមុខបកស្រាយ ក្រោយផ្ទុះការវែកញែករឿងចេញបទចម្រៀងជាមួយស្តេចអាយ៉ៃ ព្រហ្ម ម៉ាញ

បានផុស

៦ ម៉ោង មុន

នៅ

ថ្ងៃសុក្រ ១២ មេសា ២០២៤

ដោយ

បន្ទាប់ពីមានការវែកញែកក្រោយចេញបទចម្រៀងរួមជាមួយស្តេចអាយ៉ៃ លោក ព្រហ្ម ម៉ាញ ដែលមានចំណងជើងថា នែ !កូ តារាចម្រៀងរ៉េប នេន ទុំ ពេលនេះបានចេញមុខបកស្រាយច្បាស់ៗទៅកាន់មហាជន និងអ្នកគាំទ្រខណៈអ្នកខ្លះយល់ថាបទនេះច្រៀងចំរដូវក្តៅតែច្រៀងថាត្រជាក់ទៅវិញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ឆ្លើយតបចម្ងល់របស់អ្នកគាំទ្រតារាចម្រៀងលោក នេន ទុំ បានបញ្ជាក់ភ្ជាប់វីដេអូបកស្រាយថា “បកស្រាយខ្លះៗបទជាមួយពូ ព្រហ្ម ម៉ាញ ក្តៅចង់ដាច់ខ្យល់ម៉ិចថា ត្រជាក់ហៅប៉ាម៉ិចមិនហៅ [ ពុក ឬ ឪ ] អ្នកReactionអើយដាក់មួយទៅចំណេញទាំងអស់គ្នាទេ។ នេន ទុំ បានលើកឡើងថា អត្ថន័យនេះតាមពិតទៅលោកជាអ្នកនិពន្ធ គឺដឹងថាខែនេះក្តៅហើយតែអ្វីដែលចង់រំលេចដោយសារកូនប្រុសម្នាក់ទៅញ៉ោះឪពុកទេ……”។

លោកបន្តថា «ហេតុផលកូនទៅញ៉ោះឪគឺចង់បានប្រពន្ធ អញ្ចឹងហើយកូនហ្នឹងទោះបីដឹងថា ជាខែក្តៅក៏អាចថាខែរងាដែរ ព្រោះចង់បានប្រពន្ធអញ្ចឹងហើយក៏ចាប់ផ្តើមរំអុកឪពុកទាំងដឹងថា វាជាខែក្តៅ។ ម្យ៉ាងដើម្បីលួងលោមឪពុកឲ្យសប្បាយចិត្តឆាប់បានទៅស្តីដណ្តឹងប្រពន្ធឲ្យទេ អត្ថន័យគឺចង់និយាយអញ្ចឹងសុំបងបងប្អូនកុំមានការយល់ច្រឡំ»។

តារារ៉េប នេនទុំ បានបញ្ជាក់ទៀតថា «ចំណែកឯត្រង់ពាក្យ(ប៉ា និងឪពុក)មានបងប្អូនខ្លះគាត់ថាគួរតែដាក់ថាប៉ាវិញត្រង់ចំណុចនេះ, នេន ទុំ ថា ខ្ញុំនឹកឃើញអញ្ចឹងដែរបងប្អូនតែបទនេះគឺបុរាណលាយសម័យយើងមើលឃើញរូបភាពបុរាណប្រពៃណី នៅក្នុងហ្នឹងហើយយើងក៏ស្តាប់ឮសម្លេងមានខ្មុយ ទ្រខ្មែរ រនាថរបស់ខ្មែរលក្ខណៈប្រពៃណីដូច្នេះហើយមូលហេតុដែលខ្ញុំដាក់ពាក្យប៉ានេះដោយសារក្មេងៗសម័យឥឡូវប្រហែល ៩០ភាគរយដែលហៅលោកពុកគាត់ថាប៉ានេះ ជាចំណុចដែលខ្ញុំដាក់ថា ប៉ាព្រោះចង់ទាញអារម្មណ៍ឲ្យពួកគាត់ចូលមកស្តាប់ដែរ»។

លោកបន្តទៀតថា «បើសិនខ្ញុំដាក់ពាក្យពុក គឺបទនេះរបៀបប្រពៃណីហើយបទនេះទៀតសោតគឺទទួលបានអារម្មណ៍តែវ័យចាស់ៗចាប់ពី ៤០ជាងឡើងប៉ុណ្ណោះ ហេតុនេះហើយទើបខ្ញុំក៏សម្រេចលាយបញ្ចូលគ្នាបុរាណផង និងសម័យផង ដែលទាំងនេះមានជាង ៩៥ភាគរយទៅហើយនៅក្នុងបទចម្រៀងខាងលើ»។

យ៉ាងណាមិញ កាលពីថ្មីៗកន្លងទៅតារាចម្រៀងរ៉េប នេន ទុំ បានប្រកាសបង្ហាញពីបំណងក្នុងការផលិតបទចម្រៀងដើម្បីបន្សល់ទុកជាស្នាដៃចុងក្រោយក្នុងឆ្នាំ២០២៤ គឺ ការចាប់ដៃគូរចម្រៀងជាមួយគ្នាវិរៈសិល្បក រអាយ៉ៃជើងចាស់គឺលោក ព្រហ្ម ម៉ាញ។ ក្នុងនោះ នេនទុំ ក៏បានអំពាវនាវឲ្យមានការចូលរួមគាំទ្រនុងលើកទឹកចិត្តពីមហាជន ៕

អត្ថបទ៖ ចាន់រ៉ា