តារាកំប្លែងនាយ ឃ្លោក ព្រមានចាត់វិធានការផ្លូវច្បាប់ចំពោះអ្នកយកឈ្មោះបង្កើតផេកក្លែងក្លាយ

បន្ទាប់ពីមានជនអនាមិកយកឈ្មោះទៅបង្កើតផេកក្លែងក្លាយក្នុងចេតនាមិនល្អតារាកំប្លែងជើងចាស់នាយ ឃ្លោក បានចេញមកព្រមានចាត់វិធានការតាមផ្លូវច្បាប់បើសិនជាបុគ្គលរូបនោះមិនព្រមប្តូរឈ្មោះ ឬលុបចោលជាបន្ទាន់។

តារាកំប្លែងនាយ ឃ្លោក បានបង្ហោះខ្លឹមសារថា សូមជម្រាបជូនសាធារណជនឲ្យបានជ្រាបថា ចំពោះផេក page នាយ ឃ្លោក គាំទ្រគុនខ្មែរនេះ មិនមែនជាផេករបស់ខ្ញុំបាទនោះទេ។ ផេក page ផ្លូវការរបស់ខ្ញុំបាទ គឺផេកឈ្មោះ (នាយឃ្លោក Neay Klok) ដែលមាសញ្ញាសម្គាល់ដែលទទួលស្គាល់ពី Facebook blue verifier។

នាយ ឃ្លោក បញ្ជាក់ទៀតថា ដូច្នេះសូមឲ្យអ្នកដែលបង្កើតផេកក្លែងក្លាយដែលមានឈ្មោះផេក នាយឃ្លោក គាំទ្រគុនខ្មែរនេះដូរឈ្មោះចេញជាបន្ទាន់បើមិនដូច្នេះទេ លោកនឹងចាត់វិធានការតាមផ្លូវច្បាប់។

ការប្រកាសរបស់នាយ ឃ្លោក ខាងលើនេះ ក្រោយពេលដែលសង្កេតឃើញមានជនឆ្លៀតឱកាសបានយកឈ្មោះរបស់លោកបង្កើតផេកក្លែងក្លាយដើម្បីទាញយកផលបនរយោជន៍ផ្ទាល់ខ្លួន។

សូមជម្រាបដែថា អំឡុងមួយរយ:ពេលចុងក្រោយនេះ គេសង្កេតឃើញមានតារាសិល្ប:ល្បីៗរបស់ខ្មែរមួយចំនួនមកហើយដែលបានរងគ្រោះជួបបញ្ហានេះដូចគ្នានឹងតារាកំប្លែងជើងចាស់នាយ ឃ្លោក ពេលនេះ៕

អត្ថបទ៖ ចាន់រ៉ា