ណុប បាយ៉ារិទ្ធ ប្រាប់ឲ្យអ្នកគាំទ្រប្រុងប្រយ័ត្ន ខណៈមានជនអនាមិកបង្កើតផេកក្លែងបន្លំ

តារា​ចម្រៀង​កូនកាត់ចិនលោក ណុប បាយ៉ារិទ្ធ បាន​សម្តែងការសោកស្តាយ និងហួសចិត្តជាខ្លាំង បន្ទាប់ពីមានជនអនាមិកបានបង្កើត​ផេកក្លែងក្លាយបន្លំជាលោក ដើម្បីទាញយកផលប្រយោជន៍ផ្ទាល់ ឬបោកបន្លំអ្នកគាំទ្រ និងមហាជនក្នុងបំណងមិនល្អ។

ជាមួយគ្នានេះដែរ តារាចម្រៀងចាស់វស្សា ណុប បាយ៉ារិទ្ធ បានប្រកាសឲ្យមហាជន អ្នកគាំទ្រ និង​អ្នកដែលស្គាល់លោកត្រូវមានការប្រុង​ប្រយ័ត្ន​ចំពោះ​ករណី​នេះ ព្រោះក្រែងមានការបោកប្រាស់ណា​​មួយ​ពីសំណាក់ជន​អនាមិក​ទាំងនោះ។ លោក បាយ៉ារិទ្ធ ក៏បានស្នើឲ្យអ្នកគាំទ្ររបស់​ខ្លួនជួយ report ផេកនោះផងដែរ។

លោក ណុប បាយ៉ារិទ្ធ បានប្រកាសនៅយប់ថ្ងៃទី១៥ ខែសីហា ថា «សូមបញ្ជាក់ប្រាប់ដល់បងប្អូនទាំងអស់គ្នាថា​ មានផេកមួយដែល​មានឈ្មោះ Nop bayyareth fan page ដែលបង្កើតឡើងដោយ​ដាក់រូបដូចជា page របស់ខ្ញុំ ហើយបានប្លុកខ្ញុំចោលទៀត​នេះបានបង្ហាញឲ្យ​ឃើញថាផេកនេះ បង្កើតឡើងក្នុងចេតនាមិនល្អនោះឡើយ ហើយក៏មិនមែនជា fans របស់ខ្ញុំដែរ” ។

លោក ណុប បាយ៉ារិទ្ធ បានបញ្ជាក់ទៀតថា បច្ចុប្បន្នផេក​នេះកំពុង​ឆាតទៅគេ​ឯងក្នុងចេតនា​មិនល្អ ដូច្នេះ លោកសូមបញ្ជាក់ថា ប្រសិនបើផេក​នេះឆាត​ទៅបោកប្រាស់​បងប្អូនណាម្នាក់លោក​សូមមិនទទួលខុសត្រូវឡើយ ហើយដើម្បីជៀសវាង​ការបោកប្រាស់​សូមបង ប្អូនជួយ report ផេកនេះចោលម្នាក់ ១ផង៕

អត្ថបទ៖ ចាន់រ៉ា