លោក ខាំ ភូរិ ចេញបញ្ជាក់ ក្រោយមានការវែកញែកសម្លៀកបំពាក់ក្នុងរឿង​ «ក្រយាស្នេហ៍»ថាចម្លងពីសៀម

ក្រោយកើតមានការជជែកវែកញ៉ែកគ្នាច្រេីន​ ទាំងពលរដ្ឋខ្មែរ​-ថៃ ទាក់ទងនឹងរឿងសម្លៀកបំពាក់ក្នុង​ «រឿង​ ក្រយាស្នេហ៍»​ រហូតមានការចូលរួមវែកញែកពីវេបសាយថៃខ្លះផងនោះ លោក ខាំ ភូរិ អ្នក​និពន្ធ​ និង​ដឹកនាំ​ល្បី​ឈ្មោះ​ អះអាងថាសម្លៀកបំពាក់ដែលថតក្នុង «រឿង​ ក្រយាស្នេហ៍»​ មិនបានចម្លងពីសៀមនោះឡើយ គឺធ្វេីតាមឯកសារយោងដែលបានចងក្រងទុកកន្លងមក​ និងកែច្នៃបែបសិល្បៈខ្លះបន្ថែមតែប៉ុណ្ណោះ។

ជាក់ស្តែង ក្រុមការងារលោកមិនបានតាំងចិត្តផលិតរឿងនេះឡេីង ដេីម្បីទាមទារកម្មសិទ្ធិផ្តាច់មុខថា សម្លៀកបំពាក់ទាំងនេះជារបស់ខ្មែរនោះទេ​ តែអ្វីដែលចង់បង្ហាញ គឺសម្លៀកបំពាក់​ និងគ្រឿងតែងកាយទាំងអស់នេះ ពិតជាបានប្រេីប្រាស់ជាប្រចាំថ្ងៃក្នុងសង្គមខ្មែរនាសម័យនោះពិតប្រាកដមែន។

លោកគូសបញ្ជាក់ដូច្នេះថា “យើងជាក្រុមផលិតភាពយន្ត​ មិនមែនជាក្រុមចងក្រងប្រវត្តិសាស្ត្រទេ​ យេីងគ្រាន់តែធ្វេីតាមឯកសារយោងដែលបានចងក្រងទុកកន្លងមក​ និងកែច្នៃបែបសិល្បៈខ្លះបន្ថែមតែប៉ុណ្ណោះ។ ខ្មែរ​ និង​ សៀម​ ជាប្រទេសភូមិផងរបងជាប់គ្នា​ ការជះឥទ្ធិពលលេីគ្នាទៅវិញទៅមកគឺជៀសមិនផុត”។

តែទោះជាបែបនេះ លោក​ និងក្រុមការងាររង់ចាំទទួលយកការរិះគន់ក្នុងន័យកែលម្អ​ ដេីម្បីអភិវឌ្ឍន៍សមត្ថភាពបន្តទៀតដោយក្តីគោរពជានិច្ច “ពីក្រុមការងារតូច​ តែមានបេះដូងធំ”។

គួរជម្រាបថា ទាក់ទងនឹងរឿងរ៉ាវនៃការខ្វែងគំនិតគ្នាទាក់ទងនឹងឈុតបុរាណខ្មែរ និងសៀមនេះ មិនមែនជាលើកទីមួយឡើយ និងធ្លាប់មានការវែកញែកគ្នា រហូតកក្រើកបណ្តាញផ្សាយព័ត៌មានថៃក៏មិនតិចដងនោះដែរ មិនថាសម្លៀកបំពាក់ ឬការតុបតែងកាយនោះឡើយ។

តួយ៉ាង កាលពីអំឡុងឆ្នាំ២០២២ ភាពយន្តភាគទូរទស្សន៍សម័យបច្ចុប្បន្នលាយសម័យលង្វែក ផ្សារភ្ជាប់វប្បធម៌ និងប្រវត្តិសាស្ត្ររបស់ខ្មែរ រឿង «ខោល» ក៏កើតមានការវែកញែកចម្លងតាមភាពយន្តថៃផងដែរ។ ករណីនេះអាចទាក់ទងនឹងការដែលភាពល្បីល្បាញនៃភាពយន្តបុរាណរបស់ប្រទេសក្បែរខាង បង្ហាញច្រើនជាង ទើបមនុស្សភាគច្រើន មានការយល់ដូច្នេះ។

សូម្បីតែ តារាសម្តែង ស៊ីន យូប៊ីន ក្នុងការបង្ហាញវត្តមានលើកម្រាលព្រំក្រហមក្នុងមហោស្រពភាពយន្ត Cannes ឆ្នាំ២០២៣ ជាមួយឈុតប្រណីត៤ ពិសេសឈុតស្បៃនាគរាជយ៉ាងស្រស់ស្អាត ក៏មានគេអ្នករិះគន់ថា បានចម្លងចេញពីថៃផងដែរ៕