ថ្ងៃសមរាត្រី! នី មុន្នីនាថ រាំរបាំមុខប្រាសាទអង្គរ បំផុសការផ្សព្វផ្សាយវប្បធម៌ និងទេសចរណ៍ ទៅកាន់ពិភពលោក

សកម្មភាពនៃការបំផុសស្មារតីមហាជន តាមរយ:ការចូលរួមផ្សព្វផ្សាយទេសចរណ៍ និងវប្បធម៌ទៅកាន់ពិភពលោកពីសំណាក់តារាសម្តែងពូកែខាងទឹកភ្នែកកញ្ញា នី មុន្នីនាថ បានធ្វើឱ្យទស្សនិកជនកាន់តែមានការលើកសរសើរ និងផ្តល់កម្លាំងចិត្តសម្រាប់តារាស្រីរូបនេះ។

ជាការកត់សម្គាល់ នី មុន្នីនាថ ជាបន្តបន្ទាប់ គេតែងតែឃើញនាងបង្ហាញសារចូលរួម ឬអំពាវនាវដល់បងប្អូនប្រជាពលរដ្ឋខ្មែរ និងសិល្បករសិល្បការិនីក្នុងកិច្ចការងារសង្គមដូចជា ការផ្សព្វផ្សាយពីសិល្ប:វប្បធម៌ ទេសចរណ៍ និងការចូលរួមបរិច្ចាគឈាមជួយសង្គ្រោះអាយុជីវិតអ្នកដែលត្រូវការឈាមបន្ទាន់ជាដើម។

ក្នុងរូបភាពនៃការផ្សព្វផ្សាយវប្បធម៌តារាស្រីនី មុន្នីនាថ កាលពីថ្ងៃទី២១ ខែមីនា ឆ្នាំ២០២៥ បានលេចវត្តមាននៅមុខប្រាសាទអង្គរវត្តក្នុងព្រឹត្តិការណ៍ “សមរាត្រីអង្គរ” ដ៏អស្ចារ្យរបស់ប្រទេសកម្ពុជា។ នី មុន្នីនាថ ក៏បានគ្រងនូវឈុតរាំរបាំអប្សរាយ៉ាងរស់រវើកនិងទន់ភ្លន់សាកសមជានារីខ្មែរក្នុងការចូលរួមថែវប្បធម៌។

សកម្មភាពនេះគេឃើញកញ្ញា នី មុន្នីនាថ បានសម្តែងការរាំរបាំអប្សរា នៅឯប្រាសាទអង្គរវត្តនៃទឹកដីខេត្តសៀមរាប ដែលកំពុងទទួលបានការចាប់អារម្មណ៍ និងគាំទ្រយ៉ាងច្រើនពីសំណាក់មហាជន។ នី មុន្នីនាថ បានបានបញ្ជាក់ថា នាងពិតជាអរគុណសាធារណជន ដែលបានរួមចំណែកចូលរួមលើកទឹកចិត្តនិងកាចែករំលែកនូវវីដេអូនេះទៅកាន់ពិភពលោក៕ អត្ថបទ៖ ចាន់រ៉ា