ត្រូវគេហាមមិនឲ្យរកលុយពីសិល្បៈ ៧ឆ្នាំ ប៉ុន្តែ​នាង Fan Bingbing នៅតែរស់យ៉ាងរំភើយ ពីចំណូលខ្ទង់​លានដុល្លារ

គិតមកដល់សព្វថ្ងៃនេះ វាមានរយៈពេល ៧ឆ្នាំហើយ ចាប់តាំងពីនាង Fan Bingbing ត្រូវបានហាមឃាត់មិនឲ្យបង្ហាញមុខដោយសាររឿងអាស្រូវគេចពន្ធ។ មនុស្សជាច្រើនបានសម្តែងការព្រួយបារម្ភអំពីអ្វីដែលនឹងកើតឡើងចំពោះតារាស្រី ដែលរកចំណូលបានច្រើនជាងគេនៅក្នុងវិស័យសិល្បៈចិន នៅពេលដែលនាងមិនអាចបង្ហាញខ្លួននៅលើកញ្ចាក់ទូរទស្សន៍របស់ប្រទេសចិនបានដូចពីមុនទៀត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យ៉ាងណាមិញ កាលពីថ្មីៗនេះ សារព័ត៌មាន Sohu បានធ្វើឲ្យគ្រប់គ្នាភ្ញាក់ផ្អើល បន្ទាប់ពីទម្លាយថា នារីដ៏ស្រស់ស្អាតម្នាក់នេះ នៅតែរកលុយបានយ៉ាងច្រើន ជាមួយនឹងប្រាក់ចំណូលរហូតដល់ ១.៤ លានយ័ន (១៩៤លានដុល្លារ) ក្នុងរយៈពេលត្រឹមតែ ១ ឆ្នាំប៉ុណ្ណោះ ដោយសារការលក់ម៉ាសថែរក្សាស្បែករបស់នាង។

វាត្រូវបានគេដឹងថា ម៉ាកគ្រឿងសំអាងដែលបង្កើតឡើងដោយរាជីនីសម្រស់ចិនរូបនេះ បានចូលក្នុងម៉ាកយីហោសម្រស់កំពូលរបស់ចិនទាំង ១០០ ក្នុងឆ្នាំ ២០២៤ ហើយបានឈរនៅលំដាប់ទី ៣៥ ជាមួយនឹងប្រាក់ចំណូលខ្ពស់សឹងមិនធ្លាប់មាន។

យោងតាមដារព័ត៌មាន ​​Sohu ក្រុមហ៊ុនរបស់ Fan Bingbing ពឹងផ្អែកជាចម្បងលើការលក់ផលិតផលតាមរយៈបណ្តាញសង្គម ហើយ រូបនាងផ្ទាល់គឺជាមុខតំណាងសម្រាប់ម៉ាកយីហោដែលនាងបានបង្កើតដោយខ្លួនឯង។ ជាក់ស្តែង ក្នុងនាមជាម្ចាស់យីហោ នាងអាចទទួលបានប្រាក់ចំណេញយ៉ាងច្រើន ដោយសារតែនាងមិនចាំបាច់ចំណាយច្រើនលើបរិវេណ ឬធនធានមនុស្សនោះទេ។ Sohu ប៉ាន់ប្រមាណថា តួឯកស្រីក្នុងរឿង «The Empress of China» រកចំណូលបានប្រហែល ៧០០លានយ័នឯណោះ កាលពីឆ្នាំ ២០២៤។

មនុស្សជាច្រើនជឿថា តារាស្រីវ័យ៤៣ឆ្នាំ លក់ម៉ាសបិទមុខច្រើនជាងការសម្ដែង ជាពិសេសនៅពេលដែលឧស្សាហកម្មភាពយន្តចិនកំពុងឆ្លងកាត់ពីភាពអន់ថយ ដោយបានធ្វើឲ្យតារាល្បីៗដូចជាលោក Andy Lau និងលោក Louis Koo ត្រូវកាត់បន្ថយប្រាក់ខែរបស់ពួកគេ។ សូម្បីតែនៅក្នុងវិស័យសិល្បៈបច្ចុប្បន្ននេះ ប្រហែលជាមានមនុស្សមិនច្រើនទេដែលរកលុយបានលឿន និងងាយស្រួលដូចជារូបនាង។

ទោះយ៉ាងណាក៏ដោយ វាហាក់បីដូចជា Fan Bingbing នៅតែចង់ត្រលប់ទៅសម្ដែងវិញ។ យោងតាមប្រភពព័ត៌មាន តួសម្តែងក្នុងរឿង «My Fair Princess» ធ្លាប់បានទាក់ទងជាមួយឥស្សរជនដ៏មានឥទ្ធិពលក្នុងវិស័យកម្សាន្តដូចជាអ្នកដឹកនាំរឿង Feng Xiaogang និង Li Yu ដើម្បីរកវិធីវិលមកវិញ។ ទោះជាយ៉ាងណាក៏ដោយ នៅពេលដែលការហាមប្រាមការផ្សាយរបស់អាជ្ញាធរនៅតែមានដដែល គ្មានអ្នកដឹកនាំរឿងណាហ៊ានឈោងដៃជួយតារាស្រីជួរមុខដែលពាក់ព័ន្ធនឹងរឿងអាស្រូវផ្អើលប្រទេសនោះទេ។

មកដល់បច្ចុប្បន្ននេះ Fan Bingbing អាចចូលរួមព្រឹត្តិការណ៍នានា និងបង្ហាញមុខក្នុងភាពយន្តមួយចំនួននៅលើទីផ្សារបរទេស បន្ទាប់ពីការលើកលែងទោសពាក់ព័ន្ធនឹងរឿងអាស្រូវគេចពន្ធ។ រាល់ពេលដែលនាងបង្ហាញខ្លួនម្តងៗ សម្រស់មួយនេះ នៅតែធ្វើឲ្យមហាជនសរសើរមិនដាច់ពីមាត់ថា សម្រស់ដ៏លេចធ្លោរបស់នាង មានមន្តស្នេហ៍ និងស្ទីលម៉ូដទាន់សម័យខ្លាំង។ ជាពិសេស រាល់ពេលដែលនាងបង្ហាញ​កម្រាល​ព្រំ​ក្រហម​របស់​ប្រទេស​ចិន​ នាងនៅ​តែ​រក្សាចំណាត​ថ្នាក់​មិន​ចាញ់​អ្នកជំនាញ​ ជាពិសេសភាពប៉ិនប្រសប់​មិនសាបសូន្យទៅណាឡើយ៕

អត្ថបទ៖ សាង ស្រីល័ក្ខ

ចុចអាន៖កញ្ញា​ Tian Tian ​​បង្អួត​ក្រវិល​ថ្លៃ​ជាង​៣១ម៉ឺនដុល្លារ ធ្វើឲ្យ​ឪពុកអស់តំណែងហើយ ​រងការស៊ើបទៀត​