កញ្ញា​ Tian Tian ​​បង្អួត​ក្រវិល​ថ្លៃ​ជាង​៣១ម៉ឺនដុល្លារ ធ្វើឲ្យ​ឪពុកអស់តំណែងហើយ ​រងការស៊ើបទៀត​

តារាសម្ដែងស្រីជនជាតិចិន Huang Yang Tian Tian បានបង្កើត​ឲ្យ​មាន​ភាពចម្រូងចម្រាស​លើ​បណ្តាញ​សង្គម​​ បន្ទាប់ពីនាង​បង្ហោះរូបថតក្រវិលដែលមានតម្លៃ ២.៣ លានយន់​ (៣១ម៉ឺនដុល្លារអាមេរិក) បង្កជាចម្ងល់អំពីទ្រព្យសម្បត្តិរបស់គ្រួសារនាង និងអតីតភាព​របស់ឪពុកធ្លាប់ជា​​មន្ត្រី​កាន់តំណែង​ខ្ពស់​ក្នុង​ជួរ​រដ្ឋាភិបាលចិន​​។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមកាសែត Dimsum Daily រូបថតទាំងនេះត្រូវបានថតក្នុងពិធីចូល​​សាលារបស់ Tian Tian។ តារា​ស្រី​រូប​នេះ បាន​ប្រាប់​ថា​ នាង​បាន​ខ្ចី​ក្រវិល​ពី​ម្ដាយ​នាង។ ប៉ុន្តែមហាជនជាច្រើនបានចូលទៅបញ្ចេញមតិនៅលើប្រព័ន្ធផ្សព្វផ្សាយសង្គម​ ខណៈអ្នកលេងអ៊ីនធឺណិតបានទម្លាយរូបភាពរបស់នាង បង្ហាញពីការរស់នៅដ៏ប្រណីត រួមទាំងវិមានតម្លៃរាប់​លាន​យន់​ និង​ការប្រមូលផ្តុំ​ដោយ​​គ្រឿងអលង្ការថ្លៃៗយ៉ាងច្រើន។

ប្រភព​ដែល​អះអាង​ថា​ស្និទ្ធ​នឹង​ក្រុម​គ្រួសារ​របស់​នាង​ បាន​ចោទ​ថា​ ឪពុក​របស់​ Tian Tian គឺលោក Yang Wei ធ្លាប់​កាន់​​តំណែង​រដ្ឋាភិបាល​នៅ​ទីក្រុង Ya’an ខេត្ត Sichuan។ គាត់បានធ្វើការជាមួយក្រុមពង្រឹងការគ្រប់គ្រងទីក្រុង Ya’an ក្នុងឆ្នាំ ២០១១ មុនពេលផ្លាស់ទៅការិយាល័យជំរុញការវិនិយោគរបស់ទីក្រុងក្នុងឆ្នាំ ២០១៥ ដោយលាលែងពីមុខតំណែងរបស់គាត់នៅឆ្នាំ២០១៧ ដើម្បីបន្តការបណ្តាក់ទុនអាជីវកម្មនៅទីក្រុង Shenzhen។

យោងតាមសារព័ត៌មាន Qianjiang Evening News បន្ទាប់ពីចាកចេញពីមុខតំណែងជាមន្ត្រីរាជការ លោក Yang បានបង្កើតក្រុមហ៊ុនភាពយន្តមួយដាក់ឈ្មោះតាមកូនស្រីរបស់គាត់ នៅឆ្នាំ ២០១៨ ហើយក្រោយមកគាត់បានក្លាយជាតំណាងស្របច្បាប់របស់ក្រុមហ៊ុននៅក្នុងឧស្សាហកម្មផលិតផលថែរក្សាសម្ផស្ស។ នៅថ្ងៃទី ១៤ ខែឧសភា បីថ្ងៃបន្ទាប់ពីភាពចម្រូងចម្រាសជុំវិញក្រវិលរបស់កូនស្រី គាត់បានលាឈប់ពីដំណែងជាអ្នកតំណាងស្របច្បាប់របស់ក្រុមហ៊ុន ហើយបានដកខ្លួនចេញក្នុងនាមជាម្ចាស់ភាគហ៊ុន។

កាលពីសប្តាហ៍មុន គណៈកម្មាធិការត្រួតពិនិត្យវិន័យទីក្រុង​ Ya’an បានប្រកាសថា អាជ្ញាធរពាក់ព័ន្ធកំពុងស៊ើបអង្កេតករណីនេះ ហើយលោក Yang ត្រូវបានតម្រូវឲ្យបញ្ជាក់ពីដំណើរការការងាររបស់គាត់។ បើតាមសមត្ថកិច្ច លោក Yang​ បានបញ្ជាក់ថា ក្រវិលដែលកូនស្រីគាត់ពាក់នោះ មិនមែនជារបស់ពិតទេ ហើយក្រុមគ្រួសារបានបិទជិត និងរក្សាទុកដើម្បីត្រួតពិនិត្យ។ លោកបានគូសបញ្ជាក់បន្ថែមថា ក្នុងកំឡុងពេលកាន់តំណែង លោកមិនបានបំពានលើបទប្បញ្ញត្តិ ឬច្បាប់ណាមួយឡើយ ហើយលោកក៏មិនបានកេងប្រវ័ញ្ចថវិកាបរិច្ចាគណាមួយ ដែលសំដៅលើការកសាងក្រុង Ya’an ឡើងវិញក្រោយការរញ្ជួយដីនោះ​ដែរ​។

លោក​បាន​ថ្លែង​ថា​៖«​ប្រសិន​បើ​នរណា​ម្នាក់​រក​ឃើញ​សញ្ញា​នៃ​ការ​បំពានច្បាប់​​ នោះ​ពួកគេ​អាច​រាយការណ៍​បាន​។ ខ្ញុំនឹងសហការយ៉ាងសកម្មជាមួយនឹងការស៊ើបអង្កេត និងទទួលនូវលទ្ធផលទាំងអស់»។

ទោះ​បី​ជា​គាត់​បដិសេធ​ក៏​ការ​ពិនិត្យ​ជា​សាធារណៈ​នៅ​តែ​បន្ត​កើត​មាន។ ប្រព័ន្ធផ្សព្វផ្សាយចិនបានយកចិត្តទុកដាក់លើបញ្ហានេះ ដោយសង្កត់ធ្ងន់ថា អ្នកប្រើប្រាស់ប្រព័ន្ធផ្សព្វផ្សាយសង្គមជាច្រើនបានអំពាវនាវឲ្យមានតម្លាភាពកាន់តែច្រើនទាក់ទងនឹងហិរញ្ញវត្ថុរបស់គ្រួសារ។

នៅអាយុ ១៨ ឆ្នាំ តារាស្រី Huang Yang Tian Tian បានបង្ហាញខ្លួនក្នុងនាមជាតារាសម្តែងក្នុងឆ្នាំ ២០១៧ ។ ស្នាដៃដែលគួរឲ្យកត់សម្គាល់របស់នាងរួមមានគម្រោងធំៗជាមួយតារាក្នុងបញ្ជី A ដូចជារឿងភាគទូរទស្សន៍ «Princess Agents» ដែលសម្តែងដោយ Shawn Dou និង Zhao Liying, «Nirvana in Fire Season 2: The Wind Blows in Chang Lin» សំដែងដោយ Huang Xiaoming និង «Love the Zhou’s Palace» ៕

អត្ថបទ៖ សាង ស្រីល័ក្ខ

ចុចអាន៖​លេចឮថា អ្នកច្នៃម៉ូដ​​​ម្នាក់​​ជាអ្នកគាំទ្រ​ សាន់ឆាយ បាន​បដិសេធរចនា​ឈុត​រៀបការ​ឲ្យភរិយាក្រោយ របស់ Wang Xiaofei