លីម តិចម៉េង ថា មួយជីវិតមិនផ្សាយល្បែងហើយក៏មិនធ្វើគំរូអ្នកណាដែរ តែអ្វីដែលតាំងចិត្ត ជាគោលការណ៍ជីវិត

តារាចម្រៀងប្រុសវ័យក្មេងដ៏មានប្រជាប្រិយភាព របស់ផលិតកម្មរស្មីហង្សមាស លីម តិចម៉េង បានចេញបញ្ជាក់ជំហរខ្លួនជាថ្មីទាក់ទងនឹងការផ្សព្វផ្សាយល្បែងអនឡាញ ដោយគូសបញ្ជាក់ថា “ខ្ញុំគ្មានបំណង ឬចេតនាស្អីទេ គ្រាន់តែនិយាយពាក្យពិត « មួយជីវិតមិនផ្សាយល្បែង » ហើយក៏មិនមែនសម្រាប់ឱ្យអ្នកណាមកធ្វើគំរូតាមស្អីដែរ គ្រាន់តែនេះជាគោលការណ៍ជីវិតរបស់ខ្ញុំខ្លួនឯង”។

ការលើកឡើងនេះ អាចទំនងជាជាប់ទាក់ទងនឹងសារមួយរបស់លោកកាលពីថ្ងៃទី៩ កញ្ញានេះ ដោយមានខ្លឹមសារសង្កត់ធ្ងន់ពីការតាំងចិត្តយ៉ាងដាច់ណាត់ ក្នុងការផ្សព្វផ្សាយល្បែងអនឡាញនោះឡើយ។ លោកថា “ស្រុកទេសមានបញ្ហា សេដ្ធកិច្ចធ្លាក់ចុះ ការងាររអាក់រអួល ស្រាប់តែមានល្បែងអនឡាញជាច្រើន ចង់សហការចចារតម្លៃល្អប្រូម៉ូត”។ ដោយបែបនេះ លោកក៏ប្រកាសជាសាធារណៈជូនជាដំណឹងតែម្តងថា ពុំចាំបាច់ចរចារឿងនេះនាំតែហត់ទេ ព្រោះបើទោះបីជាទាក់ទងទៅអ្នកគ្រប់គ្រងលោកផ្ទាល់ ឬទាក់ទងទៅខាងក្រុមហ៊ុន ហង្សមាស ក៏លោកមិនអាចធ្វើបានដែរ”។

មិនតិចដងនោះឡើយ ដែលតារាចម្រៀងប្រុសដ៏លេចធ្លោរូបនេះ អះអាងមិនបៀតជាដាច់ខាត ទាក់ទងនឹងការផ្សព្វផ្សាយហ្គេមអនឡាញ ព្រោះយល់ថា សកម្មភាពនេះមិនត្រឹមតែមិនបានជួយអ្វីជាប្រយោជន៍ ថែមទាំងប៉ះពាល់ដល់សង្គមជាតិ និងពលរដ្ឋខ្មែរផងដែរ ខណៈកន្លងមក កើតមានករណីលង់ខ្លួនអស់ទ្រព្យសម្បត្តិ សម្លាប់ខ្លួន ថែមទាំងជាកត្តាដែលជំរុញឱ្យកើតបញ្ហាក្នុងសង្គមថែមទៀតផង។

គោលជំហរមិនរាថយរបស់តារាចម្រៀងប្រុសរូបនេះ ក៏ធ្វើឱ្យមហាជនបង្ហាញការកោតសរសើរផងដែរ ដោយយល់ថា សកម្មភាពនេះ ជាផ្នែកមួយជួយទប់ស្កាត់បញ្ហាក្នុងសង្គមជាតិផងដែរ៕