ចិនព្រមានវាយបក​វិញ បើ​ជប៉ុន​ហ៊ានប្រើ​កម្លាំង​យោធា​នៅ​ច្រកសមុទ្រ​តៃវ៉ាន់

ប្រទេសចិនបានព្រមានកាលពីថ្ងៃព្រហស្បតិ៍​ទី​១៣​ខែ​វិច្ឆិកា​ថា ការចូលរួមផ្នែកយោធារបស់ជប៉ុននៅក្នុងជម្លោះតៃវ៉ាន់ណាមួយ នឹងត្រូវបានចាត់ទុកថាជា«អំពើឈ្លានពាន» ដែលជាការបង្កើនជម្លោះការទូតដែលបង្កឡើងដោយ​ការ​លើក​ឡើង​របស់នាយករដ្ឋមន្ត្រីជប៉ុនលោកស្រី Sanae Takaichi។

អ្នកនាំពាក្យក្រសួងការបរទេស​ចិន​លោក Lin Jian បាននិយាយថា ទីក្រុងប៉េកាំងនឹង«វាយបកយ៉ាងខ្លាំងក្លា» បើជប៉ុនប្រើប្រាស់កម្លាំងយោធានៅក្នុងច្រកសមុទ្រតៃវ៉ាន់ ដោយទទូចថា ចិននឹងការពារអធិបតេយ្យភាពរបស់ខ្លួនក្រោមធម្មនុញ្ញអង្គការសហប្រជាជាតិ និងច្បាប់អន្តរជាតិ។

ការព្រមាននេះកើតឡើងបន្ទាប់ពីលោកស្រី Takaichi បានប្រាប់សភាជប៉ុនកាលពីសប្តាហ៍មុនថា ជម្លោះលើតៃវ៉ាន់អាចបង្កើត«ស្ថានភាពគំរាមកំហែងដល់ការរស់រានមានជីវិត» សម្រាប់ប្រទេសជប៉ុន។ ក្រោមច្បាប់សន្តិសុខឆ្នាំ២០១៥របស់ជប៉ុន សេណារីយ៉ូនេះនឹងអនុញ្ញាត​ឲ្យ​ប្រទេសនេះដាក់ពង្រាយកងកម្លាំងស្វ័យការពាររបស់ខ្លួន ដើម្បីជួយសម្ព័ន្ធមិត្តដែលកំពុងត្រូវបានវាយប្រហារ។

លោកស្រី Takaichi ក្រោយមកបាននិយាយថា មតិរបស់លោកស្រីគឺ «គ្រាន់តែជាការឧបមា» ប៉ុណ្ណោះ។

លោក Lin បាន​ប្រាប់​ថា ចិន«ប្រឆាំងយ៉ាងដាច់អហង្ការ» ចំពោះ​សម្ដី​ទាំងនោះ ហើយទាមទារ​ឲ្យ​ទីក្រុងតូក្យូដកវាវិញ ដោយចោទប្រកាន់ជប៉ុនថាបាននិយាយដដែលៗនូវតក្កវិជ្ជាដែលខ្លួនធ្លាប់ប្រើ ដើម្បីបង្ហាញភាពត្រឹមត្រូវនៃការឈ្លានពានក្នុងសម័យសង្រ្គាម។ លោកបានចោទសួរថា តើលោកស្រី Takaichi មានបំណង «ធ្វើដដែលវិញនូវមាគ៌ាយោធានិយមនៃអតីតកាល» ឬ «បង្កើតសត្រូវជាមួយប្រជាជនចិនម្តងទៀត»។

ចិនចាត់ទុកតៃវ៉ាន់ជាផ្នែកមួយនៃទឹកដីរបស់ខ្លួន ហើយមិនបានបដិសេធក្នុងការប្រើប្រាស់កម្លាំងដើម្បីគ្រប់គ្រងតៃវ៉ាន់នោះទេ។ ខណៈដែលប្រទេសភាគច្រើន រួមទាំងជប៉ុន និងសហរដ្ឋអាមេរិក មិនទទួលស្គាល់តៃវ៉ាន់ជារដ្ឋអធិបតេយ្យ ទីក្រុងវ៉ាស៊ីនតោនប្រឆាំងនឹងការប៉ុនប៉ងណាមួយដើម្បីដណ្តើមយកកោះនេះដោយបង្ខំ ហើយបានផ្គត់ផ្គង់អាវុធដល់ទីក្រុងតៃប៉ិ។

ឆ្នាំនេះគឺជាខួបលើកទី៨០នៃជ័យជម្នះរបស់ចិនលើជប៉ុនក្នុងសង្គ្រាមលោកលើកទី២ ហើយទីក្រុងប៉េកាំងតែងតែលើកឡើងពីប្រវត្តិសាស្ត្រសម័យសង្រ្គាម នៅពេលរិះគន់គោលនយោបាយសន្តិសុខរបស់ជប៉ុន។

លោក Lin បាន​បញ្ជាក់​ថា បញ្ហាតៃវ៉ាន់គឺជាកិច្ចការផ្ទៃក្នុងរបស់ចិន ហើយបានព្រមានជប៉ុនមិន​ឲ្យ«លលេងជាមួយភ្លើង» ដោយ​សង្កត់​ធ្ងន់​ថា ការជ្រៀតជ្រែកពីបរទេសណាមួយនឹងធ្វើ​​ឲ្យ​ទំនាក់ទំនងចិន-ជប៉ុន ដែលកំពុងតានតឹងរួចទៅហើយ កាន់តែខូចខាត៕

ប្រែសម្រួល៖ ឈាង