ខេត្ត Songkhla ទុក្ខជាន់ទុក្ខ! អគ្គិភ័យឆេះអគារពាណិជ្ជកម្មនៅខាងលើ ទឹកជំនន់លិចនៅខាងក្រោម

ថៃកំពុងតែទុក្ខជាន់ទុក្ខ ដោយនៅទីក្រុង Hat Yai នៃខេត្ត Songkhla ឯណោះ ទឹកជំនន់កំពុងវាយប្រហារធ្ងន់ធ្ងរទៅហើយនោះ ស្រាប់តែកើតមានគ្រោះអគ្គិភ័យឆាបឆេះអគារពាណិជ្ជកម្មនៅកណ្តាលទឹកជំនន់ថែមទៀត។

តាមការផ្សាយរបស់ Amarin នៅថ្ងៃអង្គារទី២៥ខែវិច្ឆិកាឆ្នាំ២០២៥ អគារពាណិជ្ជកម្មស្ថិតនៅចំណុចប្រសព្វ Wiriyathian​ ត្រូវអគ្គិភ័យឆាបឆេះនៅជាន់ខាងលើ ទាំងដែលទឹកជំនន់កំពុងលិចខាងក្រោម។

តាមរយៈរូបភាពដែលបង្ហោះលើទំព័រ Facebook របស់អង្គភាពអគ្គិភ័យនិងជួយសង្គ្រោះថៃ គេឃើញផ្សែងខ្មៅខ្មួលខ្មាញ់ហុយចេញពីជាន់ខាងលើនៃអគារ ដែលព័ទ្ធជុំវិញទៅដោយទឹកជំនន់។

អគ្គិភ័យនេះកើតឡើងស្របពេល ទឹកជំនន់កំពុងបង្កទុក្ខវេទនាខ្លាំងនៅប្រទេសថៃ សម្លាប់មនុស្ស៨នាក់ ជាពិសេសភាគខាងត្បូងគឺទីក្រុង Hat Yai នៃខេត្ត Songkhla នេះតែម្តង។

នៅ Hat Yai គេឃើញអ្នកខ្លះជាប់ក្នុងផ្ទះចេញទីណាមិនរួចរង់ចាំការជួយសង្គ្រោះទាំងគ្មានសង្ឃឹម អ្នកខ្លះតោងបង្គោលភ្លើងចរាចរណ៍ រីឯអ្នកខ្លះទៀតបង្ខំចិត្តឱបបង្គោលអគ្គិសនី ទោះដឹងថា មានគ្រោះថ្នាក់នៃការឆក់ស្លាប់ក៏ដោយ។ ពួកគេបាននាំគ្នាស្រែកសុំឲ្យគេជួយ ហើយសម្រែករបស់ពួកគេបានលាន់ទ្រហឹងពេញទីក្រុង ស្តាប់ទៅគួរឲ្យរន្ធត់។

ខេត្តភាគខាងត្បូងដែលប្រកាសអាសន្នមានដូចជា៖ Chumphon, Surat Thani, Nakhon Si Thammarat, Satun, Songkhla, Phatthalung, Trang, Narathiwat, Pattani និង Yala៕

អត្ថបទ៖ សុខ សុវណ្ណ