UN៖ ការបោះឆ្នោតមីយ៉ាន់ម៉ាចុងខែធ្នូ ត្រូវបានធ្វើឡើងក្រោមការភ័យខ្លាច និងការគាបសង្កត់

មន្ត្រីសិទ្ធិមនុស្សរបស់អង្គការសហប្រជាជាតិ​ បាននិយាយ​ថា ការបោះឆ្នោតដែលបានគ្រោងទុករបស់ប្រទេសមីយ៉ាន់ម៉ានាចុងខែធ្នូ​ខាង​មុខ កំពុងចាប់ផ្តើមប្រព្រឹត្តទៅក្រោមបរិយាកាសនៃការភ័យខ្លាច ការប្រើហិង្សា និងការគាបសង្កត់នយោបាយយ៉ាងធ្ងន់ធ្ងរ ដោយព្រមានថា ដំណើរការនេះប្រឈមនឹងការធ្វើ​ឲ្យ​អស្ថិរភាពកាន់តែខ្លាំង ជំនួស​ឲ្យ​ការឈានទៅរកលទ្ធិប្រជាធិបតេយ្យ។

យោង​តាម​ការ​ចុះ​ផ្សាយ​របស់ Peninsula លោក Jeremy Laurence អ្នកនាំពាក្យការិយាល័យសិទ្ធិមនុស្សអង្គការសហប្រជាជាតិ (OHCHR) បាន​លើក​ឡើង​ថា ការបោះឆ្នោតត្រូវបាន​រំពឹង​ថា​នឹងចាប់ផ្តើមនៅថ្ងៃទី២៨ខែធ្នូ ក្នុងអ្វីដែលលោកហៅថាជាសកម្មភាពដែលគ្រប់គ្រងដោយយោធា ការគំរាមកំហែង អំពើហិង្សា និងការបង្ក្រាបជាប្រព័ន្ធចំពោះការចូលរួមផ្នែកនយោបាយ។

លោកបាននិយាយថា គណបក្សនយោបាយសំខាន់ៗត្រូវបានហាមឃាត់មិន​ឲ្យ​ចូលរួម ហើយមនុស្សជាង៣០០០០នាក់ដែលជាគូប្រជែងនយោបាយ រួមទាំងសមាជិកសភាក្រុមអ្នកជាប់ឆ្នោត និងសមាជិករដ្ឋាភិបាលស៊ីវិលដែលត្រូវបានទម្លាក់ បានស្ថិតក្នុងការឃុំខ្លួនចាប់តាំងពីរដ្ឋប្រហារឆ្នាំ២០២១មក។

អង្គការសហប្រជាជាតិក៏កំពុងស៊ើបអង្កេតរបាយការណ៍ពីជនភៀសខ្លួនដែលនិយាយថា យោធាបានបញ្ជា​ឲ្យ​ពួកគេត្រឡប់ទៅភូមិរបស់ពួកគេវិញដើម្បីបោះឆ្នោត។ លោក Laurence បានកត់សម្គាល់ថា ក្រុមយោធាបានអះអាងថាបានផ្តល់ការលើកលែងទោសដល់សមាជិកបក្សប្រឆាំងប្រហែល៤០០០នាក់ ដែលធ្លាប់ត្រូវបានចោទប្រកាន់ ឬផ្តន្ទាទោសពីបទញុះញង់ និងបង្កចលាចល។

ស្នងការជាន់ខ្ពស់អង្គការសហប្រជាជាតិទទួលបន្ទុកសិទ្ធិមនុស្ស លោក Volker Türk បាន​ប្រាប់​ថា ការបោះឆ្នោតដែលបានគ្រោងទុកនេះ គ្រាន់តែធ្វើ​ឲ្យ​អសន្តិសុខ ការភ័យខ្លាច និងការបែកបាក់គ្នាមានការកើនឡើងប៉ុណ្ណោះ ហើយបន្ថែមថា ការបញ្ឈប់អំពើហិង្សា និងការអនុញ្ញាត​ឲ្យ​ជំនួយមនុស្សធម៌ទៅដល់ជនស៊ីវិលត្រូវតែនៅតែជាអាទិភាពចម្បង​របស់សហគមន៍អន្តរជាតិ៕

ប្រែសម្រួល៖ ឈាង