ប្រមុខ​ណាតូ​ព្រមានពូទីន​ថា សម្ព័ន្ធមិត្តត្រៀមខ្លួនរួចជាស្រេច ដើម្បីប្រឈមមុខនឹងរុស្ស៊ី

អគ្គលេខាធិការ​អង្គការ​ណាតូ លោក ម៉ាក រូតេ បានព្រមានកាលពីថ្ងៃពុធ​ទី​៣​ខែ​ធ្នូ​ឆ្នាំ​២០២៥​ថា សម្ព័ន្ធមិត្តខ្លួន​«ត្រៀម​រួចជាស្រេច និងមានឆន្ទៈ» ក្នុងការការពារទឹកដីប្រឆាំងនឹងរុស្ស៊ី មួយថ្ងៃបន្ទាប់ពីប្រធានាធិបតី វ៉្លាឌីមៀរ ពូទីន បានគំរាមអឺរ៉ុបដោយសង្រ្គាមពេញទំហឹង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោង​តាម New York Post ថ្លែងនៅក្នុងកិច្ចប្រជុំរដ្ឋមន្ត្រីការបរទេសណាតូ​ក្នុ​ងទីក្រុងព្រុចសែល លោករូតេ បាននិយាយថា «អាកប្បកិរិយា​ព្រហើន» របស់រុស្ស៊ី រួមទាំងការរំលោភដែនអាកាសម្តងហើយម្តងទៀត ក្នុងអំឡុងពេលនៃការវាយប្រហារលើអ៊ុយក្រែន បានបង្កើនហានិភ័យសម្រាប់សម្ព័ន្ធមិត្ត។

លោកបាន​លើក​ឡើង​ថា «ណាតូ​ គឺជាសម្ព័ន្ធមិត្តការពារ។ យើងនឹងនៅតែជាសម្ព័ន្ធមិត្តការពារដដែល ប៉ុន្តែកុំយល់ច្រឡំ យើងត្រៀមខ្លួនរួចជាស្រេច និងមានឆន្ទៈក្នុងការធ្វើអ្វីដែលចាំបាច់ដើម្បីការពារប្រជាជនរបស់យើងចំនួន​​១ពាន់លាននាក់ និងធានាទឹកដីរបស់យើង»។

ទោះបីជាគ្មានវត្តមានតំណាង​អាមេរិកនៅក្នុងកិច្ចចរចា​នោះ​ក៏ដោយ ក៏លោករូតេ​ បាន​អះអាង​ថា លោកបានទាក់ទងយ៉ាងជិតស្និទ្ធជាមួយរដ្ឋមន្ត្រីការបរទេស Marco Rubio ដែលបានបើកកិច្ចពិភាក្សាបទឈប់បាញ់ជាមួយមន្ត្រីអ៊ុយក្រែននៅទីក្រុង Miami។ លោកបានកោតសរសើរចំពោះការចូលរួមរបស់ប្រធានាធិបតី ដូណាល់ ត្រាំ នៅក្នុងការចរចាសន្តិភាពនាពេលថ្មីៗនេះ ប៉ុន្តែបានព្រមានថា «ការសម្រេចបានសន្តិភាពនេះ មិនមែនជាអ្វីដែលអាចបញ្ចប់បានដោយត្រង់នោះទេ»។

ការព្រមាននេះ បានធ្វើឡើង ខណៈសហភាពអឺរ៉ុបបានបង្ហាញសំណើមួយដើម្បីប្រើប្រាស់ប្រហែលពាក់កណ្តាលនៃទ្រព្យសម្បត្តិរុស្ស៊ីដែលត្រូវ​បាន​បង្កកជាង១០០​​ពាន់លាន​អឺរ៉ូ ដែលរក្សាទុកនៅអឺរ៉ុប ដើម្បីគាំទ្រដល់រដ្ឋាភិបាល និងយោធាអ៊ុយក្រែនក្នុងរយៈពេលពីរឆ្នាំខាងមុខទៀត។

ប្រធានគណៈកម្មការអឺរ៉ុប លោកស្រី Ursula von der Leyen បាននិយាយថា «ថ្ងៃនេះយើងកំពុងផ្ញើសារយ៉ាងមុតមាំទៅកាន់ប្រជាជនអ៊ុយក្រែន។ យើងនៅជាមួយពួកគេក្នុងរយៈពេលយូរអង្វែង»។

ប្រទេសប៊ែលហ្ស៊ិក ដែលបានកាន់កាប់ទ្រព្យសម្បត្តិបង្កកភាគច្រើន តាមរយៈក្រុមហ៊ុន Euroclear ដែលមានមូលដ្ឋាននៅទីក្រុងព្រុចសែល បានសម្តែងការស្ទាក់ស្ទើរយ៉ាងខ្លាំង។ រដ្ឋមន្ត្រីការបរទេស Maxime Prévot បាន​ប្រាប់​ថា ផែនការប្រើប្រាស់លុយនេះជាវត្ថុបញ្ចាំសម្រាប់ការខ្ចីប្រាក់សំណង បានបង្ក«ហានិភ័យសេដ្ឋកិច្ច ហិរញ្ញវត្ថុ និងច្បាប់ធំៗ» ហើយបានព្រមានថា ប៊ែលហ្ស៊ិកមិនគួរត្រូវបានទុក​ឲ្យ​ «ប្រឈមមុខនឹងហានិភ័យតែម្នាក់ឯងនោះ​ឡើយ»។

យ៉ាង​ណា​មិញ លោកស្រី Von der Leyen បានការពារគម្រោងនេះ ដោយលើកហេតុផលថា វានឹងពង្រឹងជំហររបស់ទីក្រុងកៀវ​នៅក្នុងកិច្ចចរចាសន្តិភាព និងគូសបញ្ជាក់ប្រាប់ទីក្រុងមូស្គូថា «ការបន្តអូសបន្លាយសង្រ្គាម… នឹងត្រូវចំណាយថ្លៃដើមខ្ពស់សម្រាប់ពួកគេ»។

ជា​ការ​កត់​សម្គាល់ សំណើរបស់ EU នឹងតម្រូវ​ឲ្យ​មានការអនុម័តជាឯកច្ឆន្ទពីបណ្តាប្រទេសជាសមាជិកទាំង​២៧​នៃប្លុកនេះ៕

ប្រែសម្រួល៖ ឈាង