ថៃ៖ លែងមានលទ្ធភាពចរចាផ្នែកការទូត ជាមួយកម្ពុជាហើយ

ខណៈជម្លោះព្រំដែនកម្ពុជា-ថៃកាន់តែធ្ងន់ធ្ងរ រដ្ឋមន្ត្រីការបរទេសថៃ Sihasak Phuangketkeow បានប្រាប់ទៅ Al Jazeera ថា លែងមានលទ្ធភាពនៃការចរចាផ្នែកការទូតហើយ។

ក្នុងបទសម្ភាសនៅថ្ងៃអង្គារទី៩ខែធ្នូឆ្នាំ២០២៥លោក Sihasak និយាយថា ផ្នែកតាមស្ថានភាពជម្លោះនាពេលនេះ គឺលែងមានលទ្ធភាពសម្រាប់ដំណោះស្រាយផ្នែកការទូតហើយ។ ផ្នែកការទូតនឹងដំណើរការតែពេលមានលទ្ធភាពប៉ុណ្ណោះ ប៉ុន្តែស្តាយណាស់ ពេលនេះគឺមិនមានឡើយ។

មុននេះរដ្ឋមន្ត្រីការបរទេសថៃ ក៏ផ្តល់បទសម្ភាសទៅ BBC ដែរ ដោយលោក Sihasak បានបញ្ជាក់យ៉ាងច្បាស់ថា បទឈប់បាញ់គឺមិនដំណើរការទេ។

តាមសម្តីលោក Sihasak, បទឈប់បា​ញ់កម្ពុជា-ថៃ មិនដំណើរការឡើយ ហើយប្រសិនបើសហរដ្ឋអាមេរិកនៅតែបន្តពាក់ព័ន្ធនោះ ថៃត្រូវការជំនួ​យពីអាមេរិកដើម្បីស្វែងរក សន្តិភាពពិតប្រាកដ មិនមែនគ្រាន់តែជាអ្វីដែលសរសេរលើក្រដាសនោះទេ។

ជម្លោះព្រំដែនកម្ពុជា-ថៃដែលផ្ទុះឡើងថ្មីនេះ គឺផ្តើមចេញពីការឈ្លានពានឥតឈប់ឈរពីសំណាក់ភាគីថៃ ហើយថៃ គឺជាអ្នកបាញ់មកលើកម្ពុជាមុន។

កម្ពុជាបានអត់ធ្មត់កម្រិតខ្ពស់បំផុតរយៈពេល២៤ម៉ោង ដោយមិនតបតឡើយ ប៉ុន្តែថៃមិនព្រមឈប់នៅតែវាយប្រហារមកលើកម្ពុជា ទើបកម្ពុជា ប្រើសិទ្ធិការពារខ្លួន ដើម្បីវាយបកតបតទៅវិញ៕

អត្ថបទ៖ សុខ សុវណ្ណ