លោកត្រាំ បង្ហាញសញ្ញាវិជ្ជមានក្នុងកិច្ចចរចានុយក្លេអ៊ែរនៅប្រទេសអូម៉ង់

ប្រធានាធិបតី​អាមេរិក​ ដូណាល់ ត្រាំ បានផ្ញើសារយ៉ាងម៉ឺងម៉ាត់ទៅកាន់ទីក្រុងតេហេរ៉ង់ ពីលើយន្តហោះ Air Force One ដោយអះអាងថា អ៊ីរ៉ង់ត្រូវ​សម្រេចកិច្ចព្រមព្រៀងមួយ ខណៈដែលជម្រើសផ្សេងពីនេះនឹងត្រូវប្រឈមមុខនឹង «ផលវិបាកយ៉ាងធ្ងន់ធ្ងរបំផុត»។

យោង​តាម CNN ថ្លែងទៅកាន់អ្នកសារព័ត៌មានកាលពីថ្ងៃសុក្រ​ទី​៦​ខែ​កុម្ភៈ​ឆ្នាំ​២០២៦​ បន្ទាប់ពីកិច្ចពិភាក្សានុយក្លេអ៊ែរដ៏សំខាន់នៅប្រទេសអូម៉ង់ លោកប្រធានាធិបតីបានទម្លាយថា គណៈប្រតិភូអាមេរិកបានធ្វើ «ការចរចាដ៏ល្អប្រពៃ» ជាមួយមន្ត្រីអ៊ីរ៉ង់។ ទោះបីជាមានភាពវិជ្ជមានចំពោះវឌ្ឍនភាពនៃកិច្ចសន្ទនាក៏ដោយ លោកត្រាំនៅតែរក្សាជំហរបន្ទាត់ក្រហមយ៉ាងរឹងមាំ ដោយប្រកាសថា ក្នុងលក្ខខណ្ឌណាក៏ដោយ អ៊ីរ៉ង់នឹងមិនត្រូវបានអនុញ្ញាត​ឲ្យ​មានអាវុធនុយក្លេអ៊ែរឡើយ។

ព្រឹត្តិការណ៍ការទូតនៅទីក្រុង Muscat នេះ បានប្រមូលផ្តុំនូវឥស្សរជនសំខាន់ៗរបស់អាមេរិក រួមមានបេសកជនពិសេសលោក Steve Witkoff លោក Jared Kushner និងលោក Brad Cooper ប្រមុខបញ្ជាការដ្ឋានកណ្តាលអាមេរិក (CENTCOM) ដែលបានជួបពិភាក្សាជាមួយរដ្ឋមន្ត្រីការបរទេសអ៊ីរ៉ង់ លោក Abbas Araghchi។ វត្តមានរបស់មេបញ្ជាការយោធាជាន់ខ្ពស់ប្រចាំតំបន់នៅក្នុងកិច្ចចរចានេះ បានសង្កត់ធ្ងន់លើទម្ងន់នៃព្រមានរបស់លោកត្រាំ។ ដ្បិត​លក្ខខណ្ឌជាក់លាក់នៃកិច្ចព្រមព្រៀងនាពេលអនាគតមិនទាន់ត្រូវបានបញ្ចេញក៏ដោយ ប៉ុន្តែសម្តីរបស់លោកត្រាំ​បានបង្ហាញថា យុទ្ធនាការដាក់សម្ពាធកំពុងរុញច្រានអ៊ីរ៉ង់​ឲ្យ​ត្រឡប់មក​កាន់​តុចរចាវិញ។

សម្រាប់ជំហានបន្ទាប់ សន្ទុះឆ្ពោះទៅរកដំណោះស្រាយហាក់បីដូចជាកំពុងកើនឡើងយ៉ាងរហ័ស។ លោកត្រាំ បានប្រកាសថា មន្ត្រីនៃប្រទេសទាំងពីរគ្រោងនឹងជួបគ្នាម្ដងទៀតនៅដើមសប្តាហ៍ក្រោយ ដើម្បីបន្តពង្រឹងមូលដ្ឋានគ្រឹះដែលបានបង្កើតឡើងនៅប្រទេសអូម៉ង់។ ពិភពលោកកំពុងតាមដានការចរចាដ៏សំខាន់នេះ ហើយ​ការលើកឡើងចុងក្រោយរបស់លោកប្រធានាធិបតី បានដើរតួជាការ​បង្ហាញ​អំពី​ការ​​ប្រើប្រាស់​ទាំង​មធ្យោបាយការទូតផង និងជាការរំលឹកយ៉ាងម៉ឺងម៉ាត់អំពីសម្ពាធយោធា និងសេដ្ឋកិច្ចដ៏ធំសម្បើមដែលកំពុងត្រៀមផង បើកិច្ច​ចរចានេះត្រូវបរាជ័យ៕

ប្រែសម្រួល៖ ឈាង