អ៊ីរ៉ង់៖ មានតែ​ការ​ខាតបង់សេដ្ឋកិច្ច​ដ៏ធ្ងន់ធ្ងរ​ទេ ទើប​អាច​បង្ខំ​អាមេរិក​ឲ្យ​ដក​ថយ​បាន

ពេលនេះ សម្ពាធរវាងប្រទេសអ៊ីរ៉ង់ និងសហរដ្ឋអាមេរិកបានឈានដល់ចំណុចរបត់ថ្មីមួយ ដែលមិនមែនត្រឹមតែជាការគំរាមកំហែងដោយអាវុធនោះទេ ប៉ុន្តែគឺជាការវាយប្រហារចំចំណុចសរសៃឈាមសេដ្ឋកិច្ចតែម្ដង។

ក្នុង​បទ​សម្ភាសន៍​ជាមួយ CNN កាល​ពី​ថ្ងៃទី​៩​ ខែ​មីនា ឆ្នាំ​២០២៦ លោក Kamal Kharazi ដែលជាអ្នករៀបចំគោលនយោបាយក្រៅប្រទេសដ៏មានឥទ្ធិពលរបស់អ៊ីរ៉ង់ បានប្រកាសយ៉ាងច្បាស់​ថា ទ្វារនៃការចរចាត្រូវបានបិទជិតឈឹងហើយ។ លោកបានសង្កត់ធ្ងន់ថា អ៊ីរ៉ង់លែងជឿទុកចិត្តលើពាក្យសម្ដីរបស់លោកប្រធានាធិបតី ដូណាល់ ត្រាំ ទៀតហើយ ដោយចោទប្រកាន់ថា មេ​ដឹកនាំ​អាមេរិក​រូប​នេះ​គឺជា​មនុស្ស​បោកប្រាស់ដែលមិនដែលគោរព​សម្ដីឡើយ។ ដូច្នេះ អ៊ីរ៉ង់ជឿជាក់ថា មានតែការធ្វើ​ឲ្យ​អាមេរិក និងសម្ព័ន្ធមិត្តខាតបង់សេដ្ឋកិច្ច​ឲ្យ​វិនាសអន្តរាយប៉ុណ្ណោះ ទើបអាចបង្ខំ​​ពួកគេដកថយចេញពីតំបន់នេះបាន។

ស្របពេលជាមួយគ្នានេះ ទីផ្សារថាមពលពិភពលោកកំពុងតែរញ្ជួយយ៉ាងខ្លាំង ខណៈដែលតម្លៃប្រេងឆៅបានហក់ឡើងខ្ពស់ហួសពី១០០ដុល្លារ​ក្នុងមួយបារ៉ែល បន្ទាប់ពីមានការរំខានដល់ការដឹកជញ្ជូននៅច្រកសមុទ្រ Hormuz។ បើតាមការប៉ាន់ស្មាន ប្រេងដល់ទៅ​២០% នៃប្រភពផ្គត់ផ្គង់ទូទាំងសកលលោកត្រូវបានកាត់ផ្ដាច់ ដែលចំនួននេះគឺច្រើនជាងទ្វេដងនៃកំណត់ត្រាវិបត្តិព្រែកជីកស៊ុយអេកាលពីឆ្នាំ១៩៥៦​ទៅទៀត។ រដ្ឋមន្ត្រីការបរទេសអ៊ីរ៉ង់ លោក Abbas Araghchi ថែមទាំងបានពោលពាក្យចំអក​ឲ្យ​យុទ្ធនាការយោធារបស់អាមេរិកថា ជាការគណនាខុសដ៏គួរ​ឲ្យ​ខ្លាចបំផុត ព្រោះវាកាន់តែជំរុញ​​ឲ្យ​តម្លៃប្រេងឡើងថ្លៃ ដែលជាការផ្ដល់ផលចំណេញដល់អ៊ីរ៉ង់ ហើយលោកក៏បានព្រមានទៀតថា អ៊ីរ៉ង់នៅមាន «រឿងភ្ញាក់ផ្អើល» ជាច្រើនទៀតដែលមិនទាន់បញ្ចេញអស់នៅឡើយ។

ក្រឡេកមកមើលផ្ទៃក្នុងប្រទេសវិញ អ៊ីរ៉ង់បានធ្វើ​ឲ្យ​ពិភពលោកភ្ញាក់ផ្អើលតាមរយៈការតែងតាំងលោក Mojtaba Khamenei ជាមេដឹកនាំកំពូលថ្មីរបស់ខ្លួន។ ទោះបីជាខាងសហរដ្ឋអាមេរិកបានរិះគន់ថា ការផ្លាស់ប្ដូរនេះគឺជារឿងដែលមិនអាចទទួលយកបានក៏ដោយ ក៏​អ៊ីរ៉ង់បានឆ្លើយតបវិញយ៉ាងខ្លីថា រឿងផ្ទៃក្នុងរបស់គេ គឺមិនមែនជាការងារដែលអាមេរិកត្រូវមកចេះដឹងនោះទេ។ បច្ចុប្បន្ន កងកម្លាំងការពារបដិវត្តន៍អ៊ីរ៉ង់ (IRGC) កំពុងប្រើប្រាស់កម្លាំងយោធា និងអាវុធប្រមាណ៦០% ដើម្បីបើកការវាយប្រហារលើមូលដ្ឋានទ័ព និងផលប្រយោជន៍យុទ្ធសាស្ត្ររបស់អាមេរិកនៅទូទាំងតំបន់ ដើម្បីបង្កើនសម្ពាធ​ឲ្យ​កាន់តែធ្ងន់ធ្ងរឡើងៗរហូតដល់អាមេរិកទ្រាំលែងបាន៕

ប្រែសម្រួល៖ ឈាង